ಬಹರೈನ್ ; ಇಲ್ಲಿನ ಬಸವ ಸಮಿತಿ ಸಂಘಟನೆಯು ಪ್ರತಿ ವರುಷವೂ ಬಸವ ಜಯಂತಿಯನ್ನು ಬಹಳ ಅದ್ದೂರಿಯಾಗಿ ಆಚರಿಸಿಕೊಂಡು ಬರುತಿದ್ದು ಈ ವರುಷ ಕೂಡ ಅದ್ದೂರಿಯ ಸಾಂಸ್ಕ್ರತಿಕ ಕಾರ್ಯಕ್ರಮವನ್ನು ಆಯೋಜಿಸಿದ್ದು ಅದಕ್ಕೆ ಈಗಾಗಲೇ ಕ್ಷಣಗಣನೆ ಆರಂಭವಾಗಿದೆ .
ನಾಡಿನ ಖ್ಯಾತ ಕಲಾವಿದರುಗಳ ಸಂಗಮದೊಂದಿಗೆ ಇಲ್ಲಿನ ಝಿಂಜ್ ಪರಿಸರದಲ್ಲಿರುವ ಮಿಲೇನಿಯಮ್ ಸ್ಕೂಲಿನ ಭವ್ಯ ಸಭಾಂಗಣದಲ್ಲಿ ಈ ಸಾಂಸ್ಕ್ರತಿಕ ಕಾರ್ಯಕ್ರಮವು ಶುಕ್ರವಾರ ಮೇ 1 ರಂದು ಜರುಗಲಿದೆ .
ನಾಡಿನ ಖ್ಯಾತ ಹಾಸ್ಯ ಕಲಾವಿದೆ ಸುಧಾ ಬರಗೂರ್ ತಮ್ಮ ಹಾಸ್ಯ ಚಟಾಕಿಗಳಿಂದ ಪ್ರೇಕ್ಷಕರನ್ನು ನಗಿಸಲಿದ್ದಾರೆ . ನಾಡಿನ ಜನಪ್ರಿಯ ನ್ರತ್ಯ ಪಟು ಡಾಕ್ಟರ್ ಸಂಜಯ್ ಶಾಂತರಾಮ್ ತಮ್ಮ ಹತ್ತು ಸದಸ್ಯರ ತಂಡದೊಂದಿಗೆ ಆಗಮಿಸಿ ತಾಂಡವ ,ಸೃಷ್ಟಿ ,ಲಯ ,ಸ್ಥಿತಿ ಮುಂತಾದ ನ್ರತ್ಯ ಭೇದಗಳನ್ನು ಪ್ರದರ್ಶಿಸಲಿರುವರು . ಸ್ಥಳೀಯ ಬಸವ ಸಮಿತಿಯ ಸದಸ್ಯರು ಕೂಡ ಈ ಸಂಧರ್ಭದಲ್ಲಿ ಜಾನಪದ ನ್ರತ್ಯಗಳಿಂದ ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ನೀಡಲಿದ್ದಾರೆ .
ಕಾರ್ಯಕ್ರಮವು ಸಂಜೆ 5:30 ಗೆ ಸರಿಯಾಗಿ ಪ್ರಾರಂಭವಾಗಲಿದ್ದು ದ್ವೀಪದ ಎಲ್ಲಾ ಕನ್ನಡಿಗರಿಗೂ ಪ್ರವೇಶ ಉಚಿತವಾಗಿದೆ . ಕಾರ್ಯಕ್ರಮದ ಬಗೆಗಿನ ಹೆಚ್ಚಿನ ವಿವರಗಳಿಗೆ ಬಸವ ಸಮಿತಿಯ ಅಧ್ಯಕ್ಷರಾದ ಶ್ರೀ ಶಿವಕುಮಾರ್ ರವರನ್ನು ದೂರವಾಣಿ ಸಂಖ್ಯೆ 39026765 ಮುಖೇನ ಸಂಪರ್ಕಿಸಬಹುದು .
ವರದಿ -ಕಮಲಾಕ್ಷ ಅಮೀನ್
