ಮೈಸೂರು: ಸ್ವೀಡನ್‌ನ ‘ಕಿರಿಯಾಕ್‌’ ತಂಡದ ರಾಕ್‌ಬ್ಯಾಂಡ್‌ ಸೋಮವಾರ ಪ್ರವಾಸಿಗರನ್ನು ಮೋಡಿ ಮಾಡಿತು. ‘ಡ್ರಮ್ಸ್‌’ಗಳಿಂದ ನಿಯಮಿತವಾಗಿ ಹೊರಹೊಮ್ಮುತ್ತಿದ್ದ ನಿನಾದಕ್ಕೆ ಇಲ್ಲಿಯ ಅಂಬಾವಿಲಾಸ ಅರಮನೆ ಅಂಗಳದಲ್ಲಿ ನೆರೆದವರು ಪುಳಕಿತರಾದರು.
‘ಮರೆಯಲಾಗದ ಡಿಸೆಂಬರ್‌’ ಪ್ರವಾಸಿ ಉತ್ಸವದಲ್ಲಿ ಜಿಲ್ಲಾಡಳಿತ ಸೋಮವಾರ ಸಂಜೆ ಹಮ್ಮಿಕೊಂಡಿದ್ದ ಮೆರವಣಿಗೆಯಲ್ಲಿ ವಿದೇಶಿ ಬ್ಯಾಂಡ್ ಪ್ರಮುಖ ಆಕರ್ಷಣೆಯಾಯಿತು.
30 ಮಂದಿ ಯುವಕ–ಯುವತಿಯರ ತಂಡ ಸಂಗೀತದ ರಸಧಾರೆ ಹರಿಸಿತು. ಬ್ರಜಿಲ್‌ನ ಈಶಾನ್ಯ ಭಾಗದ ಜಾನಪದ ಹಾಗೂ ಸ್ವೀಡನ್‌ನ ಸಂಗೀತ ಬ್ಯಾಂಡ್‌ನಲ್ಲಿ ಮೇಳೈಸಿದ್ದವು. 13 ವರ್ಷದ ಹಿಂದೆ ಆರಂಭಗೊಂಡ ಈ ಬ್ಯಾಂಡ್ ವಿಶ್ವದ ವಿವಿಧ ದೇಶಗಳಲ್ಲಿ ಈಗಾಗಲೇ ಪ್ರದರ್ಶನ ನೀಡಿದೆ. ಉತ್ಸವಗಳಿಗೆ ಜೀವ ತುಂಬುವ ಈ ಬ್ಯಾಂಡ್‌ನಲ್ಲಿ 17ರಿಂದ 45ರೊಳಗಿನ ಹರೆಯದ ಕಲಾವಿದರು ಪಾಲ್ಗೊಂಡಿದ್ದರು.
ಭಿನ್ನವಾಗಿ ಗೋಚರಿಸಿದ ಈ ಬ್ಯಾಂಡ್ ಅನೇಕರನ್ನು ಸೆಳೆಯಿತು. ಸೊಂಟಕ್ಕೆ ನೇತು ಹಾಕಿಕೊಂಡಿದ್ದ ವಾದ್ಯಕ್ಕೆ ಎರಡೂ ಕೈಯಲ್ಲಿದ್ದ ದಂಡದಿಂದ ಬಾರಿಸುತ್ತಿದ್ದ ರೀತಿ ಹೃನ್ಮನ ಸೆಳೆಯಿತು.
