ಮಂಗಳೂರು : ಮಂಗಳೂರು ಆಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಳೆದ ನ.1ರಿಂದ ರದ್ದಾಗಿದ್ದ ರಾತ್ರಿ ವಿಮಾನ ನಿರ್ವಹಣೆ ಮೇ 1ರಿಂದ ಮತ್ತೆ ಆರಂಭವಾಗಲಿದ್ದು, ಅಂದಿನಿಂದ ಮತ್ತೆ 24*7 ಕಾರ್ಯಾಚರಣೆ ನಡೆಸಲಿದೆ.
ವಿಮಾನಗಳು ಲ್ಯಾಂಡಿಂಗ್ ಆದ ಬಳಿಕ ರನ್‌ವೇಯಿಂದ ಟರ್ಮಿನಲ್ ಕಟ್ಟಡದತ್ತ ಸಂಚರಿಸುವ ದ್ವಿತೀಯ ಸಮಾನಾಂತರ ಟ್ಯಾಕ್ಸಿವೇ ನಿರ್ಮಾಣ ಕಾಮಗಾರಿಗಾಗಿ ರಾತ್ರಿ ನಿರ್ವಹಣೆ ರದ್ದುಪಡಿಸಲಾಗಿದ್ದು, ರಾತ್ರಿ 11ರಿಂದ ಬೆಳಗ್ಗೆ 7.30ರವರೆಗೆ ವಿಮಾನಗಳು ಬರುತ್ತಿರಲಿಲ್ಲ. ಇದೀಗ ಕಾಮಗಾಗಿ ಏಪ್ರಿಲ್ ಅಂತ್ಯಕ್ಕೆ ಪೂರ್ಣಗೊಳ್ಳಲಿವೆ.
35 ಕೋಟಿ ಯೋಜನೆ: 35 ಕೋಟಿ ರೂ. ವೆಚ್ಚದ ದ್ವಿತೀಯ ಸಮಾನಾಂತರ ಟ್ಯಾಕ್ಸಿವೇಯ ಒಳಭಾಗದ ಕಾಮಗಾರಿ ರಾತ್ರಿ ವೇಳೆ ನಡೆಯುತ್ತಿದ್ದು, ಟೆಂಡರ್ ಶರತ್ತಿನಂತೆ ಏಪ್ರಿಲ್ 30ರೊಳಗೆ ಮುಗಿಯಲಿದೆ. ವಿಮಾನ ಲ್ಯಾಂಡಿಂಗ್ ಹಾಗೂ ಟೇಕ್‌ಆಫ್ ಆಗುವ ಪ್ರದೇಶದಲ್ಲಿ ನಡೆಯುವ ಕಾಮಗಾರಿ ಆಗಿರುವುದರಿಂದ ಹಗಲು ಹೊತ್ತು ಕಾಮಗಾರಿ ನಡೆಯುವುದಿಲ್ಲ. ಟ್ಯಾಕ್ಸಿವೇಯ ಸಂಪೂರ್ಣ ಕಾಮಗಾರಿ 2016ರ ಮಾರ್ಚ್ ಅಂತ್ಯಕ್ಕೆ ಮುಗಿಯುವ ಸಾಧ್ಯತೆ ಇದೆ.
1200ಮೀ. ಟ್ಯಾಕ್ಸಿವೇ : ಬಜಪೆ ಕಾರ್ಗೋ ವಿಮಾನ ನಿಲ್ದಾಣ ಕಡೆಯಿಂದ 600ಮೀ. ಹಾಗೂ ಹೊಸ ಕೆಂಜಾರಿನ ವಿಮಾನ ನಿಲ್ದಾಣದ ಕಡೆಯಿಂದ 600ಮೀ.ನಷ್ಟು ಟ್ಯಾಕ್ಸಿವೇ ನಿರ್ಮಾಣವಾಗಲಿದೆ. ಕೇಂದ್ರ ವಿಮಾನ ನಿಲ್ದಾಣ ಪ್ರಾಧಿಕಾರ ಈ ಯೋಜನೆ ಕೈಗೆತ್ತಿಕೊಂಡಿದೆ.
ಸರಾಸರಿ 40ಯಾನ : ಮಂಗಳೂರು ಅಂತಾರಾಷ್ಟ್ರೀಯ ಏರ್‌ಪೋರ್ಟ್ ಮೂಲಕ ಪ್ರಸಕ್ತ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯವಾಗಿ ಪ್ರತಿ ದಿನ ಸರಾಸರಿ ಸುಮಾರು 40ವಿಮಾನ ನಿರ್ವಹಣೆ ಮಾಡಲಾಗುತ್ತಿದೆ. ಶಾರ್ಜಾ, ದೋಹಾ, ಬೆಹರಿನ್, ಮಸ್ಕತ್, ಅಬುದಾಬಿ, ದಮಾಮ್, ಕುವೈಟ್‌ಗೆ ವಿಮಾನ ಸೌಲಭ್ಯಗಳಿವೆ. ದೇಶೀಯವಾಗಿ ಬೆಂಗಳೂರಿಗೆ, ಮುಂಬಯಿ, ಹೈದರಾಬಾದ್, ಗೋವಾ, ಚೆನ್ನೈ ವಿಮಾನ ಯಾನ ಸೌಲಭ್ಯಗಳಿವೆ. ಜೆಟ್ ಏರ್‌ವೇಸ್, ಸ್ಪೈಸ್‌ಜೆಟ್, ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ಗಳು ಇಲ್ಲಿಂದ ಅಪರೇಟ್ ಮಾಡುತ್ತಿವೆ.
ಸಮಾನಾಂತರ ಟ್ಯಾಕ್ಸಿವೇ ಅಗತ್ಯತೆ: ಬಜಪೆ ಹಳೆ ವಿಮಾನ ನಿಲ್ದಾಣದಿಂದ ಕೆಂಜಾರಿನ ಹೊಸ ನಿಲ್ದಾಣದ ನಡುವೆ ಈಗಾಗಲೇ ಸುಮಾರು 250ಮೀ. ಉದ್ದದ ಒಂದು ಟ್ಯಾಕ್ಸಿ ವೇ ಇದೆ. ವಿಮಾನ ಲ್ಯಾಂಡಿಂಗ್ ಆದ ಬಳಿಕ ಟ್ಯಾಕ್ಸಿವೇ ಮೂಲಕ ಟರ್ಮಿನಲ್ ಕಟ್ಟಡದತ್ತ ವಿಮಾನ ಸಾಗುತ್ತದೆ. ವಿಮಾನ ನಿರ್ಗಮಿಸಲು ಕೂಡ ಅದೇ ಮಾರ್ಗದಲ್ಲಿ ಸಂಚರಿಸಬೇಕಾಗುತ್ತದೆ. ಒಂದೇ ಟ್ಯಾಕ್ಸಿವೇ ಇರುವುದರಿಂದ ವಿಮಾನಗಳ ಆಗಮನ ಮತ್ತು ನಿರ್ಗಮನಕ್ಕೆ ಸುಮಾರು 15 ನಿಮಿಷ ಕಾಯಬೇಕಾಗುತ್ತದೆ. ಹೊಸ ಟ್ಯಾಕ್ಸಿವೇ ನಿರ್ಮಾಣ ಪೂರ್ಣಗೊಂಡರೆ ಪ್ರತಿ ಎರಡು ನಿಮಿಷಕ್ಕೊಂದು ವಿಮಾನ ಆಗಮನ-ನಿರ್ಗಮನ ಸಂಚಾರ ಸಾಧ್ಯವಾಗುತ್ತದೆ. ಮಂಗಳೂರಿನಲ್ಲಿ ಪ್ರಯಾಣಿಕರ ಒತ್ತಡ ಹೆಚ್ಚಿರುವುದರಿಂದ ಟ್ಯಾಕ್ಸಿವೇ ಅವಶ್ಯಕತೆಯಾಗಿತ್ತು ಎಂದು ವಿಮಾನ ನಿಲ್ದಾಣ ಪ್ರಾಧಿಕಾರದ ನಿರ್ದೇಶಕ ಜೆ.ಟಿ. ರಾಧಾಕೃಷ್ಣ ಹೇಳಿದ್ದಾರೆ.
ವರದಿ ಕೃಪೆ : ಬಿ. ರವೀಂದ್ರ ಶೆಟ್ಟಿ, ವಿ.ಕೆ
