ಅಹಮದಾಬಾದ್: ಬೇಲಿಯೇ ಎದ್ದು ಹೊಲ ಮೇಯುವುದು ಅಂದರೆ ಇದೆ. ಪೋಲಿಗಳಿಂದ ಮಹಿಳೆಯರಿಗೆ ರಕ್ಷಣೆ ಕೊಡಬೇಕಾದ ಪೊಲೀಸರೇ ಕೆಲವೊಮ್ಮೆ ಈ ಪರಿ ವರ್ತಿಸುತ್ತಾರೆ. ಮಾಡಬಾರದ್ದನ್ನೆಲ್ಲಾ ಮಾಡುತ್ತಾರೆ!
ಗುಜರಾತ್ನ ಈ ಪೊಲೀಸಪ್ಪ ಮಾಡಿದ್ದೇನು ನೋಡಿ. ಅಹಮದಾಬಾದ್ನಲ್ಲಿ ಕಳೆದ ಡಿಸೆಂಬರ್ನಲ್ಲಿ ನಡೆದ ಉತ್ಸವವೊಂದರಲ್ಲಿ ಸೇರಿದ ಜನದಟ್ಟಣೆಯಲ್ಲಿ ಈ ಮಹಾಶಯ ಕರ್ತವ್ಯ ನಿರ್ವಹಿಸೋದನ್ನು ಬಿಟ್ಟು ಮಹಿಳೆಯರೊಂದಿಗೆ ಅಸಭ್ಯವಾಗಿ ವರ್ತಿಸಿರೋದು ಮೊಬೈಲ್ನಲ್ಲಿ ಸೆರೆಯಾಗಿದೆ. ಈ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಈಗ ಭಾರಿ ಸುದ್ದಿಯಾಗುತ್ತಿದೆ. ಜಾತ್ರೆಯಲ್ಲಿ ತಾನು ಸಾಗುವ ದಾರಿಯುದ್ದಕ್ಕೂ ತನ್ನ ಕರ್ತವ್ಯವನ್ನೇ ಮರೆತು ಮಹಿಳೆಯರ ಮೈ ಮುಟ್ಟಿ, ಅಸಭ್ಯವಾಗಿ ವರ್ತಿಸಿದ್ದಾನೆ ಈ ಮಹಾನುಭಾವ ಪೊಲೀಸಪ್ಪ. ಇದೀಗ ಅಹಮದಾಬಾದ್ ಸಿಟಿ ಪೊಲೀಸ್ ಈ ಪೊಲೀಸಪ್ಪನ ವಿಚಾರಣೆಗೆ ಆದೇಶಿಸಿದೆ. ತನಿಖೆ ನಡೆಸುವಂತೆ ಹೇಳಿದೆ.
ಹೆಚ್ಚೂಕಡಿಮೆ ಒಂದು ನಿಮಿಷದ ಈ ವೀಡಿಯೊ ಕ್ಲಿಪ್ನಲ್ಲಿ ಎಲ್ಲಿಯೂ ಪೊಲೀಸಪ್ಪನ ವರ್ತನೆ ಸೆರೆಹಿಡಿದಿರುವ ವ್ಯಕ್ತಿಯ ಬಗ್ಗೆಯಾಗಲಿ ಅಥವಾ ಪೊಲೀಸಪ್ಪ ಯಾರು ಎನ್ನುವ ಮಾಹಿತಿಯಾಗಲಿ ಇಲ್ಲ. ಎಲ್ಲಿಯೂ ಅವರ ಮುಖ ಕೂಡ ಕಾಣಿಸುವುದಿಲ್ಲ. ಕಂಕರಿಯಾ ಕೆರೆಯ ದಡದಲ್ಲಿ ಒಂದು ವಾರಗಳ ಕಾಲ ನಡೆದ ಈ ಉತ್ಸವದಲ್ಲಿ ಲಕ್ಷಾಂತರ ಮಂದಿ ಸೇರುತ್ತಾರೆ. ಕಾರಣ ಭದ್ರತೆ ಹಿನ್ನೆಲೆಯಲ್ಲಿ ಸಾಕಷ್ಟು ಪೊಲೀಸರನ್ನು ನಿಯೋಜನೆ ಮಾಡಲಾಗಿರುತ್ತದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮಣಿನಗರದ ಠಾಣೆಯ ಹಿರಿಯ ಪೊಲೀಸ್ ಇನ್ಸ್ಪೆಕ್ಟರ್ ಎನ್ಎಸ್ ದೇಸಾಯಿ, ಆಯೋಜನೆ ಮಾಡಲಾಗಿರುವ ಪೊಲೀಸರಲ್ಲಿ ಇದು ಯಾರು ಎನ್ನುವುದನ್ನು ಪತ್ತೆ ಹಚ್ಚಿ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ. ಹಾಗೇ ವೀಡಿಯೊ ಮಾಡಿದ ವ್ಯಕ್ತಿ ಯಾರು ಎನ್ನುವುದನ್ನೂ ಪತ್ತೆ ಹಚ್ಚುತ್ತಿದ್ದೇವೆ ಎಂದು ತಿಳಿಸಿದ್ದಾರೆ.
