ಕಾಬೂಲ್: ಆಫ್ಘಾನಿಸ್ತಾನದ ಜಲಾಲಾಬಾದ್ ನಗರದಲ್ಲಿನ ಪಾಕಿಸ್ತಾನಿ ಕಾನ್ಸುಲೇಟ್ನನ್ನು ಗುರಿಯಾಗಿರಿಸಿಕೊಂಡು ಬುಧವಾರ ನಡೆದ ಭಯೋತ್ಪಾದಕ ದಾಳಿ ಸಂದರ್ಭದಲ್ಲಿ ಕನಿಷ್ಠ 6 ಮಂದಿ ಪೊಲೀಸರು ಸಾವನ್ನಪ್ಪಿದ್ದಾರೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ಪಾಕಿಸ್ತಾನಿ ಕಾನ್ಸುಲೇಟ್ಗೆ ಸಮೀಪದ ಮನೆಯೊಂದರಲ್ಲಿ ಅವಿತುಕೊಂಡಿರುವ ಶಸ್ತ್ರಧಾರಿಗಳ ಜೊತೆಗೆ ಆಫ್ಘನ್ ಭದ್ರತಾ ಪಡೆಗಳು ಗುಂಡಿನ ಸಮರ ನಡೆಸಿದ್ದಾರೆ ಎಂದು ಪಾಕಿಸ್ತಾನಿ ವರದಿಗಳು ಹೇಳಿವೆ.
ಪಾಕಿಸ್ತಾನಿ ಕಾನ್ಸುಲೇಟ್ ಸಮೀಪ ಭಾರಿ ಸ್ಫೋಟ ಸಂಭವಿಸಿದೆ ಎಂದು ಕ್ಷಿನ್ಹುವಾ ಸುದ್ದಿಸಂಸ್ಥೆ ಈ ಮುನ್ನ ವರದಿ ಮಾಡಿತ್ತು. ಪಾಕಿಸ್ತಾನಿ ಕಾನ್ಸುಲೇಟ್ ಭಾರತೀಯ ಕಾನ್ಸುಲೇಟ್ ಮತ್ತು ಇರಾನೀ ಕಾನ್ಸುಲೇಟ್ ಹಾಗೂ ಖಾಸಗಿ ಶಾಲೆಯೊಂದರ ಸಮೀಪದಲ್ಲಿದ್ದು, ಪ್ರಾಥಮಿಕ ವರದಿಗಳು ಭಾರತೀಯ ಕಾನ್ಸುಲೇಟ್ ಸಮೀಪ ಸ್ಫೋಟ ಸಂಭವಿಸಿದೆ ಎಂದು ತಿಳಿಸಿದ್ದವು. ‘ಪಾಕಿಸ್ತಾನಿ ಕಾನ್ಸುಲೇಟ್ ಸಮೀಪದ ಪೊಲೀಸ್ ವಾಹನವನ್ನು ಗುರಿಯಾಗಿರಿಸಿ ಈ ಬಾಂಬ್ ದಾಳಿ ನಡೆದಿದೆ ಎಂದು ಆ ಬಳಿಕ ಭದ್ರತಾ ಮೂಲವನ್ನು ಉಲ್ಲೇಖಿಸಿ ಕ್ಷಿನ್ಹುವಾ ವರದಿ ಮಾಡಿತು. ಆದರೆ ಡಾನ್ ಆನ್ಲೈನ್ ವರದಿ ಪ್ರಕಾರ ಪಾಕಿಸ್ತಾನಿ ಕಾನ್ಸುಲೇಟ್ ಸಮೀಪ ಆತ್ಮಾಹುತಿ ಬಾಂಬರ್ ಸ್ವಯಂ ಸ್ಫೋಟಿಸಿಕೊಂಡು 6 ಜನರನ್ನು ಬಲಿ ತೆಗೆದುಕೊಂಡ ಬಳಿಕ ಗುಂಡಿನ ಘರ್ಷಣೆ ಶುರುವಾಯಿತು ಎಂದು ವರದಿ ಡಾನ್ ಆನ್ಲೈನ್ ವರದಿ ಮಾಡಿದೆ.
