ರಜನಿ-ಕಮಲ್‌ ಸ್ಟಾರ್‌ವಾರ್‌: ಮರುಕಳಿಸಲಿದೆಯೇ ಎಂಜಿಆರ್‌-ಶಿವಾಜಿ ರಾಜಕೀಯ ಕದನ?

ಚೆನ್ನೈ: ನಾಲ್ಕು ದಶಕಗಳ ಹಿಂದೆ ತಮಿಳುನಾಡಿನ ರಾಜಕೀಯದಲ್ಲಿ ಇಬ್ಬರು ಮಹಾನ್‌ ನಟರ ಮಧ್ಯೆ ತೀವ್ರ ಸ್ಪರ್ಧೆ ಏರ್ಪಟ್ಟಿತ್ತು. ಅವರೇ ಎಂಜಿಆರ್‌ ಮತ್ತು ಶಿವಾಜಿ ಗಣೇಶನ್‌. ಇಬ್ಬರೂ ಲಕ್ಷಾಂತರ ಅಭಿಮಾನಿಗಳನ್ನು ಹೊಂದಿದ್ದವರು, ಆದರೆ ಶಿವಾಜಿ ರಾಜಕೀಯದಲ್ಲಿ ಸೋತರು; ಎಂಜಿಆರ್‌ ಗೆದ್ದರು.

ಇಂದು ಮತ್ತೆ ಅದೇ ಇತಿಹಾಸ ಮರುಕಳಿಸುವಂತಿದೆ. ಈ ಬಾರಿ ಪರಸ್ಪರ ಎದುರಾಳಿಗಳಾಗಿರುವವರು ರಜನೀಕಾಂತ್‌ ಮತ್ತು ಕಮಲಹಾಸನ್‌. ಎರಡು ತಿಂಗಳ ಹಿಂದೆ ಕಮಲಹಾಸನ್‌ ರಾಜಕೀಯ ಪ್ರವೇಶಿಸಲು ನಿರ್ಧರಿಸಿದರು. ಚಿತ್ರರಂಗದಲ್ಲಿ ಅವರ ಕಡು ಪ್ರತಿಸ್ಪರ್ಧಿಯಾಗಿರುವ ರಜನೀಕಾಂತ್‌ ಕೂಡ ಎರಡು ದಿನಗಳ ಹಿಂದೆ ರಾಜಕೀಯ ಪ್ರವೇಶಿಸುವ ಘೋಷಣೆ ಮಾಡಿದರು.

ಇದೀಗ ಇಬ್ಬರು ಮಹಾನ್‌ ನಟರ ನಡುವೆ ರಾಜಕೀಯ ಕಾಳಗಕ್ಕೆ ವೇದಿಕೆ ತಮಿಳುನಾಡಿನಲ್ಲಿ ಸಿದ್ಧವಾಗುತ್ತಿದೆ. ಅಂದು ಎಂಜಿಆರ್‌ಗೆ ಅವರು ನಡೆಸುತ್ತಿದ್ದ ಸೇವಾ ಕಾರ್ಯಗಳಿಂದಾಗಿ (ಚಾರಿಟಿ) ಅವರದ್ದೇ ಕಟ್ಟರ್‌ ಅಭಿಮಾನಿ ವರ್ಗ ಸೃಷ್ಟಿಯಾಗಿತ್ತು. ಶಿವಾಜಿ ಅದರಲ್ಲಿ ಸೋತರು. ಅವರ ಅಭಿಮಾನಿಗಳು ಅವರನ್ನು ಮಹಾನ್‌ ನಟರಾಗಿ ಸ್ವೀಕರಿಸಿದರೇ ಹೊರತು ರಾಜಕೀಯ ನೇತಾರರಾಗಿ ಅಲ್ಲ.

ಈ ಬಾರಿ ರಜನಿ-ಕಮಲ್‌ ರಾಜಕೀಯ ಪ್ರವೇಶವೂ ಅದೇ ಸನ್ನಿವೇಶವನ್ನು ಪುನರಾವರ್ತಿಸುವಂತಿದೆ. ಕೆಲವು ವೀಕ್ಷಕರ ಪ್ರಕಾರ, ‘ರಜನಿ ಅವರೇ ಎಂಜಿಆರ್‌, ಕಮಲ್‌ ಅವರೇ ಶಿವಾಜಿ.’

‘ರಜನೀಕಾಂತ್‌ ಅವರಿಗೆ ತಮಿಳುನಾಡಿನಾದ್ಯಂತ ಬೃಹತ್‌ ಅಭಿಮಾನಿ ಬಳಗವಿದೆ. ಅವರು ಸುಲಭವಾಗಿ ಜನರ ಸಂಪರ್ಕಕ್ಕೆ ಸಿಗುತ್ತಿದ್ದು, ಸರಳತೆ-ಸಜ್ಜನಿಕೆ-ನೇರ ನಡೆನುಡಿಗೆ ಹೆಸರಾಗಿದ್ದಾರೆ. ಕಮಲ್‌ ಬುದ್ಧಿವಂತರಾಗಿದ್ದು, ಗೌರವಾನ್ವಿತರೂ ಆಗಿದ್ದಾರೆ. ಆದರೆ ರಾಜಕೀಯದಲ್ಲಿ ಮಾತ್ರ ಅವರ ಆಟ ನಡೆಯುವುದು ಕಠಿಣ’ ಎಂದು ದ್ರಾವಿಡ ವಿದ್ವಾಂಸ ಹಾಗೂ ‘ಎಂಜಿಆರ್‌:ಎ ಲೈಫ್‌’ ಮತ್ತು ‘ಅಣ್ಣಾ: ದ ಲೈಫ್‌ ಅಂಡ್‌ ಟೈಮ್ಸ್‌ ಆಫ್‌ ಸಿ.ಎನ್‌ ಅಣ್ಣಾದೊರೈ’ ಕೃತಿಗಳ ಕರ್ತೃ ಆರ್‌. ಕಣ್ಣನ್‌ ಹೇಳುತ್ತಾರೆ.

ಎಂಜಿಆರ್‌ ಅವರು ತಮ್ಮ ಚಿತ್ರಗಳಲ್ಲಿ ಸಾಮಾಜಿಕ ಕಾಳಜಿಗಳನ್ನು ಯಶಸ್ವಿಯಾಗಿ ಬಿಂಬಿಸಿ ರಾಜಕೀಯದ ಯಶಸ್ಸಿಗೆ ವೇದಿಕೆಯಾಗಿ ಬಳಸಿಕೊಂಡರು.

‘ಮೊದಲಿನಿಂದಲೂ ಎಂಜಿಆರ್‌ ಎಷ್ಟೋ ಕಲಾವಿದರು, ನಿರ್ದೇಶಕರು, ಕವಿಗಳು, ನಿರ್ಮಾಪಕರು ಮತ್ತು ತಂತ್ರಜ್ಞರನ್ನು ಬೆಳೆಸಿದರು. ಅವರೆಲ್ಲ ಎಂಜಿಆರ್‌ ರಾಜಕೀಯದ ಯಶಸ್ಸಿಗೆ ಪೋಷಕರಾದರು. 1971ರಲ್ಲಿ ಎಂಜಿಆರ್‌ ಅವರು ಕವಿ ಪುಲಮೈಪಿತನ್‌ ಅವರಿಗೆ ತಮ್ಮ ಪೂರ್ವಜರ ಮನೆಯನ್ನು ಹರಾಜಿನಿಂದ ಉಳಿಸಿಕೊಳ್ಳಲು ನೆರವಾದರು’ ಎಂದು ಕಣ್ಣನ್‌ ನೆನಪಿಸುತ್ತಾರೆ.

‘ಶಿವಾಜಿ ಗಣೇಶನ್‌ ಅವರು ಶ್ರೇಷ್ಠ ನಟರಾಗಿದ್ದರೂ, ಚಿತ್ರರಂಗದ ತಮ್ಮ ಜನಪ್ರಿಯತೆಯನ್ನು ರಾಜಕೀಯಕ್ಕೆ ವರ್ಗಾಯಿಸಿಕೊಳ್ಳಲು ವಿಫಲರಾದರು. ಆದರೂ ಎಂಜಿಆರ್‌-ಶಿವಾಜಿ ಗಣೇಶನ್‌ ಹೋರಾಟ ಸಾಮಾಜಿಕ ಮತ್ತು ಸಾಂಸ್ಕೃತಿಕ ನೆಲೆಯಲ್ಲಿ ದೀರ್ಘಕಾಲ ಮುಂದುವರಿಯಿತು. ಆದರೆ ರಾಜಕೀಯ ರಂಗದ ವಾತಾವರಣವೇ ಭಿನ್ನ. ಎಂಜಿಆರ್‌ ಸಿನಿಮಾ ಮತ್ತು ರಾಜಕೀಯ ಎರಡರಲ್ಲೂ ಯಶಸ್ವಿಯಾದರು. ಮತ್ತೊಬ್ಬ ನಟ-ರಾಜಕಾರಣಿ ವಿಜಯಕಾಂತ್‌ ಸ್ವಲ್ಪ ಮಟ್ಟಿನ ಯಶಸ್ಸು ಕಂಡರು. ಆದರೆ ಕೊನೆಗೆ ಅವರೂ ರಾಜಕೀಯದಿಂದ ಹೊರ ನಡೆಯುವಂತಾಯಿತು. ರಜನಿ ಅವರಿಗೆ ರಾಜ್ಯಾದ್ಯಂತ ಬೃಹತ್‌ ಅಭಿಮಾನಿ ವರ್ಗವಿದೆ. ಆದರೆ ರಜನಿ ತುಂಬಾ ನಾಚಿಕೆ ಸ್ವಭಾವದವರು. ಅವರು ತಮ್ಮ ಸಾರ್ವಜನಿಕ ಜೀವನವನ್ನು ಯಾವ ರೀತಿ ಬಿಂಬಿಸಿಕೊಳ್ಳುತ್ತಾರೆ ಎಂಬುದರ ಮೇಲೆ ಅವರ ರಾಜಕೀಯ ಯಶಸ್ಸು ನಿಂತಿದೆ’ ಎನ್ನುತ್ತಾರೆ ಕಣ್ಣನ್‌.