ಐಪಿಎಲ್ ರನ್ ಬೇಟೆ; ಮತ್ತೆ ಟಾಪ್‌ಗೇರಿದ ವಿರಾಟ್

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಕ್ರಿಕೆಚ್ ಚಾಂಪಿಯನ್‌ಶಿಪ್‌ನಲ್ಲಿ ಸರ್ವಕಾಲಿಕ ರನ್ ಬೇಟೆಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಮತ್ತೆ ಅಗ್ರಸ್ಥಾನಕ್ಕೇರಿದ್ದಾರೆ.

ಬುಧವಾರ ಮುಂಬಯಿ ಇಂಡಿಯನ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಆರ್‌ಸಿಬಿ 14 ರನ್ ಅಂತರದ ಗೆಲುವನ್ನು ದಾಖಲಿಸಿತ್ತು. ಆರ್‌ಸಿಬಿ ಪರ ಉಪಯುಕ್ತ ಬ್ಯಾಟಿಂಗ್ ಪ್ರದರ್ಶಿಸಿದ ಕೊಹ್ಲಿ 32 ರನ್ ಗಳಿಸಿದ್ದರು.

ಇದರೊಂದಿಗೆ ಐಪಿಎಲ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ ಅಗ್ರಸ್ಥಾನ ಅಲಂಕರಿಸಿದ್ದಾರೆ. ಇಲ್ಲಿ ವಿರಾಟ್ ಅವರು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಸುರೇಶ್ ರೈನಾ ಅವರನ್ನು ಹಿಂದಿಕ್ಕಿದ್ದಾರೆ.

ವಿರಾಟ್ ಇದುವರೆಗೆ ಆಡಿರುವ 157 ಪಂದ್ಯಗಳಲ್ಲಿ 4767 ರನ್ ಗಳಿಸಿದ್ದಾರೆ. ಅತ್ತ ಎರಡನೇ ಸ್ಥಾನದಲ್ಲಿರುವ ರೈನಾ 168 ಪಂದ್ಯಗಳಲ್ಲಿ 4745 ರನ್ ಗಳಿಸಿದ್ದಾರೆ. ಅಂದರೆ ಪ್ರಸಕ್ತ ಸಾಲಿನ ಐಪಿಎಲ್‌ನಲ್ಲಿ ಮತ್ತೆ ಅಗ್ರಸ್ಥಾನದಲ್ಲಿ ಬದಲಾವಣೆಯಾಗುವ ಸಾಧ್ಯತೆಯಿದೆ. ಪ್ರಸ್ತುತ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿರುವ ಮುಂಬಯಿ ಇಂಡಿಯನ್ಸ್ ನಾಯಕ ರೋಹಿತ್ ಶರ್ಮಾ 167 ಪಂದ್ಯಗಳಲ್ಲಿ 4403 ರನ್ ಗಳಿಸಿದ್ದಾರೆ.

ಅಂದ ಹಾಗೆ ಐಪಿಎಲ್ 11ರ ರನ್ ಬೇಟೆಯಲ್ಲೂ ವಿರಾಟ್ ಎರಡನೇ ಸ್ಥಾನಕ್ಕೆೇರಿದ್ದಾರೆ. ಎಂಟು ಪಂದ್ಯಗಳ್ನಾಡಿರುವ ವಿರಾಟ್ 58.16ರ ಸರಾಸರಿಯಲ್ಲಿ 349 ರನ್ ಗಳಿಸಿದ್ದಾರೆ. ಇದರಲ್ಲಿ ಗರಿಷ್ಠ ಮೊತ್ತ 92* ರನ್ ಸಹ ಸೇರಿದೆ. ಪ್ರಸ್ತುತ ಅಗ್ರಸ್ಥಾನದಲ್ಲಿರುವ ಓರೆಂಜ್ ಕ್ಯಾಪ್‌ಧಾರಿ ಚೆನ್ನೈ ಸೂಪರ್ ಕಿಂಗ್ಸ್‌ನ ಅಂಬಟಿ ರಾಯುಡು ಅಷ್ಟೇ ಪಂದ್ಯಗಳಲ್ಲಿ 46.25ರ ಸರಾಸರಿಯಲ್ಲಿ 370 ರನ್ ಗಳಿಸಿದ್ದಾರೆ. ರಾಯುಡು ಗರಿಷ್ಠ ಮೊತ್ತ 82.

ಐಪಿಎಲ್‌ ಇತಿಹಾಸದಲ್ಲೇ ಅತಿ ಹೆಚ್ಚು ರನ್ ಗಳಿಸಿದ ಬ್ಯಾಟ್ಸ್‌ಮನ್‌ಗಳ ಪಟ್ಟಿ:

01. ವಿರಾಟ್ ಕೊಹ್ಲಿ: ಪಂದ್ಯ: 157, ರನ್: 4767, ಗರಿಷ್ಠ ಮೊತ್ತ: 113, ಸರಾಸರಿ: 38.44, ಶತಕ: 4, ಅರ್ಧಶತಕ: 33
02. ಸುರೇಶ್ ರೈನಾ: ಪಂದ್ಯ: 168, ರನ್: 4745, ಗರಿಷ್ಠ ಮೊತ್ತ: 100*, ಸರಾಸರಿ: 34.38, ಶತಕ: 1, ಅರ್ಧಶತಕ: 33
03. ರೋಹಿತ್ ಶರ್ಮಾ: ಪಂದ್ಯ: 167, ರನ್: 4403, ಗರಿಷ್ಠ ಮೊತ್ತ: 109*, ಸರಾಸರಿ: 32.37, ಶತಕ: 1, ಅರ್ಧಶತಕ: 34
04. ಗೌತಮ್ ಗಂಭೀರ್: ಪಂದ್ಯ: 154, ರನ್: 4217, ಗರಿಷ್ಠ ಮೊತ್ತ: 93, ಸರಾಸರಿ: 31.00, ಅರ್ಧಶತಕ: 36
05. ಡೇವಿಡ್ ವಾರ್ನರ್: ಪಂದ್ಯ: 114, ರನ್: 4014, ಗರಿಷ್ಠ ಮೊತ್ತ: 126, ಸರಾಸರಿ: 40.54, ಶತಕ: 3, ಅರ್ಧಶತಕ: 36