ಮಲಯಾಳಂ ತಾರೆ ಕೀರ್ತಿ ಸುರೇಶ್ ತೆಲುಗು, ತಮಿಳಿನಲ್ಲಿ ಅಭಿನಯಿಸಿರುವ ಸಿನಿಮಾ ’ಮಹಾನಟಿ’. ಎಪ್ಪತ್ತು, ಎಂಬತ್ತರ ದಶಕದ ತಾರೆ ಸಾವಿತ್ರಿ ಜೀವನ ಕಥೆಯಾಧಾರಿತ ಸಿನಿಮಾ ಇದು. ಈ ಚಿತ್ರ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗಿದ್ದು ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡಿದೆ. ಈ ಸಿನಿಮಾದಲ್ಲಿ ಸಾವಿತ್ರಿ ಜೀವನವನ್ನು ಸುಂದರವಾಗಿ ತೋರಿಸಲಾಗಿದೆ ಎಂದು ಅವರ ಕುಟುಂಬಿಕರು ಕೊಂಡಾಡಿದ್ದಾರೆ. ಆದರೆ ಈ ಸಿನಿಮಾದಲ್ಲಿ ತನ್ನ ತಂದೆ ಜೆಮಿನಿ ಗಣೇಶನ್ ಪಾತ್ರವನ್ನು ತಪ್ಪಾಗಿ ತೋರಿಸಲಾಗಿದೆ ಎಂದು ಅವರ ಪುತ್ರಿ ಕಮಲಾ ಸೆಲ್ವರಾಜ್ ಆರೋಪಿಸಿದ್ದಾರೆ.
“ಚಿತ್ರದಲ್ಲಿ ನಮ್ಮ ತಂದೆಯವರ ಪಾತ್ರವನ್ನು ತಪ್ಪಾಗಿ ತೋರಿಸಲಾಗಿದೆ. ಜೆಮಿನಿ ಗಣೇಶನ್ಗೆ ಅಲಮೇಲು ಅಲ್ಲದೆ ಸಾವಿತ್ರಿಯನ್ನೇ ಹೆಚ್ಚಾಗಿ ಪ್ರೀತಿಸಿದಂತೆ ಹೇಗೆ ತೋರಿಸುತ್ತೀರಿ? ಅಲಮೇಲು ಮೇಲೆ ಗಣೇಶನ್ಗೆ ಪ್ರೀತಿ ಇರಲಿಲ್ಲ ಎಂಬಂತೆ ತೋರಿಸಲಾಗಿದೆ. ಆ ವಿಷಯ ನಿಮಗೇಗೆ ಗೊತ್ತು? ಅಲಮೇಲು, ಗಣೇಶನ್ಗೆ ಇಬ್ಬರು ಮಕ್ಕಳಿದ್ದಾರೆ ಎಂಬ ಸಂಗತಿಯನ್ನು ಮರೆತಿದ್ದೀರಾ?” ಎಂದು ಕಮಲಾ ಸೆಲ್ವರಾಜ್ ಪ್ರಶ್ನಿಸಿದ್ದಾರೆ.
ಸಿನಿಮಾದಲ್ಲಿ ಜೆಮಿನಿ ಗಣೇಶನ್‌ರನ್ನು ವಿಲನ್‍ರಂತೆ ತೋರಿಸಲಾಗಿದೆ ಎಂದು ಆರೋಪಿಸಿದ್ದಾರೆ ಕಮಲಾ. ಇದರಲ್ಲಿ ಎಳ್ಳಷ್ಟೂ ಸತ್ಯವಿಲ್ಲ ಎಂದು ಸ್ಪಷ್ಟಪಡಿಸಿರುವ ಅವರು, “ಸಾವಿತ್ರಿಗೆ ಕುಡಿತದ ಅಭ್ಯಾಸ ಮಾಡಿದ್ದು ಜೆಮಿನಿ ಗಣೇಶನ್ ಎಂಬಂತೆ ತೋರಿಸಲಾಗಿದೆ. ಸಾವಿತ್ರಿ ಕಷ್ಟದಲ್ಲಿದ್ದಾಗ ಗಣೇಶನ್ ಗಮನಕೊಡಲಿಲ್ಲ ಎಂದು ಹೇಳಲಾಗಿದೆ. ಇವೆಲ್ಲಾ ತಪ್ಪು” ಎಂದಿದ್ದಾರೆ.
“ನನಗೆ ಗೊತ್ತಿರುವಂತೆ ಸಾವಿತ್ರಿಗೆ ನಮ್ಮ ತಂದೆ ಬಗ್ಗೆ ಎಳ್ಳಷ್ಟೂ ಇಷ್ಟವಿರಲಿಲ್ಲ. ಆಕೆಗೆ ಈ ವಿಷಯದಲ್ಲಿ ಅದೆಷ್ಟೋ ಕೋಪ ಎಂದರೆ, ಒಮ್ಮೆ ನಾವು ಸಾವಿತ್ರಿ ಮನೆಗೆ ಹೋಗಿದ್ದಾಗ ಅವರು ನಮ್ಮ ಮೇಲೆ ಸಾಕುನಾಯಿಗಳನ್ನು ಛೂ ಬಿಟ್ಟಿದ್ದರು. ಒಬ್ಬ ವ್ಯಕ್ತಿಯ ಜೀವನದ ಬಗ್ಗೆ 3 ಗಂಟೆಗಳಲ್ಲಿ ಹೇಗೆ ಹೇಳಲು ಸಾಧ್ಯ?” ಎಂದು ಚಿತ್ರತಂಡದ ವಿರುದ್ಧ ಕಿಡಿಕಾರಿದ್ದಾರೆ.
ಗಣೇಶನ್, ಅಲಮೇಲು ದಂಪತಿಗಳ ಮಗಳಾಗಿರುವ ಕಮಲಾ ಅವರು ಚೆನ್ನೈನಲ್ಲಿ ಖ್ಯಾತ ಗೈನಕಾಲಜಿಸ್ಟ್ ಆಗಿ ಹೆಸರು ಮಾಡಿದ್ದಾರೆ. 1993ರಲ್ಲಿ ಅವರು ಅತ್ಯುತ್ತಮ ವೈದ್ಯ ಪ್ರಶಸ್ತಿಗೂ ಪಾತ್ರರಾಗಿದ್ದಾರೆ. ದಕ್ಷಿಣದಲ್ಲಿ ಮೊಟ್ಟ ಮೊದಲ ಟೆಸ್ಟ್ ಟ್ಯೂಬ್ ಬೇಬಿ ಸೃಷ್ಟಿಸಿದ ವೈದ್ಯರಾಗಿರುವುದು ಕಮಲಾ ಅವರ ಹೆಗ್ಗಳಿಕೆ. 1990ರಲ್ಲಿ ಈ ಘನತೆಯನ್ನು ಸಾಧಿಸಿದರು.
ಸಾವಿತ್ರಿ ಮತ್ತು ಜೆಮಿನಿ ಗಣೇಶನ್
ಸಾವಿತ್ರಿ ತನ್ನ ಕೊನೆಯ ದಿನಗಳಲ್ಲಿ ನತದೃಷ್ಟ ಜೀವನ ನಡೆಸಲು ಜೆಮಿನಿ ಗಣೇಶನ್ ಅವರೇ ಕಾರಣ ಎಂದು ಬಹಳಷ್ಟು ಮಂದಿ ಭಾವಿಸುತ್ತಿರುವ ಸಂದರ್ಭದಲ್ಲಿ ಕಮಲಾ ಮಾಡಿರುವ ಆರೋಪ ಪ್ರಾಮುಖ್ಯತೆ ಪಡೆದುಕೊಂಡಿದೆ. ಸಾವಿತ್ರಿ ವಿಚಾರದಲ್ಲಿ ಗಣೇಶನ್ ತುಂಬಾ ತಪ್ಪು ಮಾಡಿದರೆಂದು, ಸಿನಿಮಾದಲ್ಲಿ ತೋರಿಸಿದ್ದು ತುಂಬಾ ಕಡಿಮೆ ಎಂದು ಅಭಿಮಾನಿಗಳು ಹೇಳುತ್ತಿರುವುದು ಗಮನಾರ್ಹ.
Comments are closed.