ಮುಂಬಯಿ: ರೈಲಿನಲ್ಲಿ ಪ್ರಯಾಣಿಸುತ್ತ ಬರೋಬ್ಬರಿ 38 ಮೊಬೈಲ್ ಕದ್ದ ಇಬ್ಬರು ಕಾಲೇಜು ವಿದ್ಯಾರ್ಥಿನಿಯರನ್ನು ರೈಲ್ವೆ ಪೊಲೀಸರು ಬಂಧಿಸಿದ್ದಾರೆ. ಒಬ್ಬನೇ ಯುವಕನನ್ನು ಪ್ರೀತಿಸುತ್ತಿದ್ದ ಇಬ್ಬರು ಯುವತಿಯರು ಆತನನ್ನು ಒಲಿಸಿಕೊಳ್ಳಲು ಕಳ್ಳತನಕ್ಕೆ ಕೈ ಹಾಕಿದ್ದರು ಎಂದು ತಿಳಿದು ಬಂದಿದೆ.
ಆರೋಪಿಗಳನ್ನು ಟ್ವಿಂಕಲ್ ಸೋನಿ ( 20) ಮತ್ತು ತಿನಾಲ್ ಪರ್ಮಾರ್ ( 19) ಎಂದು ಗುರುತಿಸಲಾಗಿದ್ದು, ಇವರಿಬ್ಬರು ಹೃಷಿ ಸಿಂಗ್ ಎಂಬ ಯುವಕನ ಜತೆ ಡೇಟಿಂಗ್ ಮಾಡುತ್ತಿದ್ದರು. ಆತನಿಗಾಗಿ ಹಣ ವ್ಯಯಿಸಲು ಅವರು ಆಯ್ದುಕೊಂಡಿದ್ದು ಕಳ್ಳತನದ ಮಾರ್ಗವನ್ನು. ರೈಲ್ವೆಯ ಮಹಿಳಾ ಬೋಗಿಯಲ್ಲಿ ಪ್ರಯಾಣಿಸುತ್ತಿದ್ದ ಯುವತಿಯರು ಮಹಿಳೆಯರ ಪರ್ಸ್‌ಗಳಲ್ಲಿದ್ದ ಮೊಬೈಲ್‌ಗೆ ಕನ್ನ ಹಾಕುತ್ತಿದ್ದರು. ಹೀಗೆ ಕಳೆದ ಎರಡು ತಿಂಗಳಲ್ಲಿ ಅವರಿಬ್ಬರು ಕದ್ದ ಒಟ್ಟು ಮೊಬೈಲ್‌ಗಳ ಸಂಖ್ಯೆ 38 ಎಂದು ರೈಲ್ವೆಯ ಕ್ರೈಂ ವಿಭಾಗದ ಪೊಲೀಸರು ತಿಳಿಸಿದ್ದಾರೆ. ಅವರಿಂದ ಸುಮಾರು 3 ಲಕ್ಷ ರೂಪಾಯಿ ಮೌಲ್ಯದ ಮೊಬೈಲ್ ಪಡೆದುಕೊಂಡ ರಾಹುಲ್ ರಾಜ್‌ಪುರೋಹಿತ್ ( 28) ಎಂಬಾತ ಕೂಡ ಈಗ ಪೊಲೀಸರ ವಶದಲ್ಲಿದ್ದಾನೆ.
ಬೊರಿವಲಿ ಮತ್ತು ಸಾಂತಾಕ್ರುಜ್ ನಿಲ್ದಾಣಗಳಲ್ಲಿ ಇತ್ತೀಚಿಗೆ ಮೊಬೈಲ್ ಕಳ್ಳತನದ ಪ್ರಕರಣಗಳು ಸಾಕಷ್ಟು ಬೆಳಕಿಗೆ ಬಂದಿದ್ದು ಬೊರಿವಲಿ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣಗಳು ದಾಖಲಾಗಿದ್ದವು. ಇದನ್ನು ಗಂಭೀರವಾಗಿ ಪರಿಗಣಿಸಿದ ಪಶ್ಚಿಮ ರೈಲ್ವೆ ಡಿಸಿಪಿ ಪುರುಷೋತ್ತಮ್ ಕರಾದ್ ತನಿಖೆಗಾಗಿ ವಿಶೇಷ ತಂಡವನ್ನು ರಚಿಸಿದ್ದರು. ಪ್ರಕರಣವನ್ನು ಯಶಸ್ವಿಯಾಗಿ ಭೇದಿಸಿದ ಅಧಿಕಾರಿಗಳು ಯುವತಿಯರಿಬ್ಬರನ್ನು ಬಂಧಿಸಿದ್ದಾರೆ.
ಸೋನಿ ವಾಸ್ತುಶಿಲ್ಪದ ವಿದ್ಯಾರ್ಥಿನಿಯಾಗಿದ್ದು, ತಿನಾಲ್ ಪ್ರಥಮ ವರ್ಷದ ಪದವಿಯನ್ನೋದುತ್ತಿದ್ದಾಳೆ. ಪ್ರತಿದಿನ ಮೊಬೈಲ್ ಕದ್ದು ಸಂಜೆ ಸಿಂಗ್‌ನನ್ನು ಭೇಟಿಯಾಗುತ್ತಿದ್ದೆವು. ಮೊಬೈಲ್ ಮಾರಿ ಹಣ ಪಡೆಯಲು ಆತ ತಮಗೆ ಸಹಾಯ ಮಾಡುತ್ತಿದ್ದ ಎಂದು ಇಬ್ಬರು ಯುವತಿಯರು ಬಾಯ್ಬಿಟ್ಟಿದ್ದಾರೆ.
Comments are closed.