ಪುಣೆ: ಜಗತ್ತು ಇಷ್ಟು ಮುಂದುವರೆದರೂ ನಮ್ಮ ದೇಶದಲ್ಲಿ ಗಂಡು ಮಗುವೇ ಬೇಕೆಂಬ ಹುಚ್ಚು ಮಾತ್ರ ಬಿಟ್ಟಿಲ್ಲ. ಇದಕ್ಕೆ ತಾಜಾ ಉದಾಹರಣೆ ಮಹಾರಾಷ್ಟ್ರದಲ್ಲಿ ನಡೆದಿರುವ ಈ ಘಟನೆ.
ಪತ್ನಿಗೆ ಹುಟ್ಟುತ್ತಿರುವ ಎರಡನೆಯ ಮಗು ಸಹ ಹೆಣ್ಣೆಂದು ಸಿಟ್ಟಿಗೆದ್ದ ವ್ಯಕ್ತಿಯೊಬ್ಬ ಆಕೆಗೆ ಗರ್ಭಪಾತ ಮಾಡಿಸಿ, ಮಾನಸಿಕ , ದೈಹಿಕ ಹಿಂಸೆ ನೀಡಿದ್ದಲ್ಲದೇ ಮತ್ತೊಂದು ಮದುವೆಯಾಗಿದ್ದಾನೆ. ವಂಚಿತ ಪತ್ನಿ ಈಗ ನ್ಯಾಯಕ್ಕಾಗಿ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾಳೆ.
ದಾಖಲಾಗಿರುವ ದೂರಿನ ಪ್ರಕಾರ, ವಕಾಡ್ ಪ್ರದೇಶದ ನಿವಾಸಿಯಾಗಿರುವ ಕುನಾಲ್ ಬೈಜ್ಯನಾಥ್ ವಾವಾಲ್ಕರ್ 2013ರಲ್ಲಿ ಮದುವೆಯಾಗಿದ್ದ. 2015ರಲ್ಲಿ ದಂಪತಿಗೆ ಹೆಣ್ಣು ಮಗು ಹುಟ್ಟಿತು. ಇತ್ತೀಚಿಗೆ ಪತ್ನಿ ಮತ್ತೆ ಗರ್ಭಿಣಿಯಾದಾಗ ಲಿಂಗ ಪತ್ತೆ ಪರೀಕ್ಷೆ ಮಾಡಿಸಿದ ಆತ ಹೆಣ್ಣೆಂದು ಗೊತ್ತಾದ ಮೇಲೆ ಗರ್ಭಪಾತ ಮಾಡಿಸಿದ್ದಾನೆ. ಬಳಿಕ ವಿಚ್ಛೇದನ ನೀಡುವಂತೆ ಹಿಂಸೆ ಕೊಟ್ಟಿದ್ದಾನೆ. ಜತೆಗೆ ವರದಕ್ಷಿಣೆ ತರುವಂತೆ ಬಲವಂತ ಪಡಿಸಿದ್ದಾನೆ. ಅಷ್ಟೇ ಅಲ್ಲ ಆತನ ಸಹೋದರ ಕೂಡ ಆಕೆಯ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ.
ಎಷ್ಟೇ ಹಿಂಸೆ ನೀಡಿದರೂ ಪತ್ನಿ ಮನೆ ಬಿಟ್ಟು ಹೋಗದಿದ್ದಾಗ ಪಾಪಿ ಪತಿ ಮತ್ತೊಂದು ಮದುವೆಯಾಗಿದ್ದಾನೆ.
ನೊಂದ ಪತ್ನಿ ಈಗ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದು ವರದಕ್ಷಿಣೆ ಹಿಂಸೆ, ಲೈಂಗಿಕ ದೌರ್ಜನ್ಯ, ಅನುಮತಿ ಇಲ್ಲದೇ ಗರ್ಭಪಾತ ಮಾಡಿಸಲಾದ ಬಗ್ಗೆ ದೂರಿನಲ್ಲಿ ದಾಖಲಿಸಿದ್ದಾಳೆ.
ಮದುವೆಯಾದಾಗಿನಿಂದ ನನಗೆ ವರದಕ್ಷಿಣೆ ಹಿಂಸೆ ನೀಡಲಾಗುತ್ತಿತ್ತು. ಮೊದಲ ಮಗು ಹೆಣ್ಣಾಯಿತೆಂದು ಆತನ ಮನೆಯವರು ದೈಹಿಕ ಹಿಂಸೆ ನೀಡಲು ಪ್ರಾರಂಭಿಸಿದರು. ಎರಡನೆಯ ಬಾರಿ ನಾನು ಗರ್ಭ ಧರಿಸಿದಾಗ ಮತ್ತೆ ಗಂಡು ಮಗುವನ್ನು ನಿರೀಕ್ಷಿಸಿದ ಅವರು ಭ್ರೂಣಲಿಂಗ ಪತ್ತೆ ಮಾಡಿಸಿ ಹೆಣ್ಣೆಂದು ಗೊತ್ತಾದಾಗ ನನ್ನ ಒಪ್ಪಿಗೆ ಇಲ್ಲದಿದ್ದರೂ ಗರ್ಭಪಾತ ಮಾಡಿಸಿದರು ಎಂದು ಸಂತ್ರಸ್ತ ಮಹಿಳೆ ಅಳಲು ತೋಡಿಕೊಂಡಿದ್ದಾರೆ.
ದೂರು ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
Comments are closed.