ಹೊಸದಿಲ್ಲಿ: ವಾಟ್ಸಪ್ನ ಮೆಸೇಜ್‌ಗಳ ಬಗ್ಗೆ ಮೈಯೆಲ್ಲ ಕಣ್ಣಾಗಿರಬೇಕು. ‘ಮೆಸೇಜ್‌ ನೋಡಲಿಲ್ಲ’, ‘ವಾಟ್ಸಾಪ್‌ ಅನ್ನು ನಮ್ಮುಡುಗರು ಬಳಸುತ್ತಾರೆ… ನನಗೆ ಗೊತ್ತಿಲ್ಲ’ ಅನ್ನುವಂಥ ಸಬೂಬುಗಳಿಗೆ ಕಾನೂನಿನಲ್ಲಿ ಬೆಲೆಯಿಲ್ಲ. ವಾಟ್ಸಪ್ನಲ್ಲಿ ಮೆಸೇಜ್‌ ತಲುಪಿರುವುದನ್ನು ದೃಢೀಕರಿಸುವ ಬ್ಲೂ ಟಿಕ್‌ (ನೀಲಿ ಬಣ್ಣದ ಟಿಕ್‌ ಮಾರ್ಕ್‌), ನಿಮ್ಮನ್ನು ಕಾನೂನಾತ್ಮಕ ಸಂಕಷ್ಟಕ್ಕೆ ಸಿಲುಕಿಸುವ ಸಾಧ್ಯತೆಯೂ ಇದೆ! ಅದು ನಿಮ್ಮ ವಿರುದ್ಧದ ಕಾನೂನುಬದ್ಧ ಪುರಾವೆಯಾಗಲಿದೆ.
ಇತ್ತೀಚಿನ ಪ್ರಕರಣ ಒಂದರಲ್ಲಿ ವಾಟ್ಸಪ್ನ ‘ಬ್ಲೂ ಟಿಕ್‌’ ಅನ್ನು ಕಾನೂನಾತ್ಮಕ ಸಾಕ್ಷ್ಯವೆಂದು ಬಾಂಬೆ ಹೈಕೋರ್ಟ್‌ ಪರಿಗಣಿಸಿದೆ. ಅಲ್ಲದೇ, ಮೆಸೇಜ್‌ನ ಅಟ್ಯಾಚ್‌ಮೆಂಟ್‌ ಅನ್ನು ಸಂವಹನಕ್ಕೆ ಸಂಬಂಧಿಸಿದ ಪ್ರತಿಗೆ ವಾಟ್ಸಪ್ ಬಳಕೆದಾರನ ಸಮ್ಮತಿಯೆಂದು ಪರಿಗಣಿಸುವುದಾಗಿ ಹೇಳಿದೆ.
ಮುಂಬಯಿ ಮೂಲದ ಗ್ರಾಹಕ ರೋಹಿತ್‌ ಜಾಧವ್‌ನಿಂದ 1.17 ಲಕ್ಷ ರೂ. ಬಾಕಿ ವಸೂಲಿಗಾಗಿ ಎಸ್‌ಬಿಐ ಕಾರ್ಡ್ಸ್ ಆ್ಯಂಡ್‌ ಪೇಮೆಂಟ್‌ ಸರ್ವೀಸಸ್‌ ಕಂಪನಿಯು ಹೈಕೋರ್ಟ್‌ನಲ್ಲಿ ಪ್ರಕರಣ ದಾಖಲಿಸಿತ್ತು. ಸಾಲ ಬಾಕಿ ವಸೂಲಿ ಸಂಬಂಧ ನೋಟಿಸ್‌ನ ಪಿಡಿಎಫ್‌ ಫೈಲ್‌ ಅನ್ನು ವಾಟ್ಸಪ್ ಮೂಲಕ ಬ್ಯಾಂಕ್‌ ರವಾನಿಸಿತ್ತು. ಇದಕ್ಕೆ ಬಾಂಬೆ ಹೈಕೋರ್ಟ್‌ ಕಾನೂನಿನ ಮಾನ್ಯತೆ ನೀಡಿದೆ. ಜತೆಗೆ, ಬ್ಯಾಂಕ್‌ ವಂಚಿಸಲು ಗ್ರಾಹಕ ಪ್ರಯತ್ನಿಸಿದ್ದಾನೆ ಎನ್ನುವ ಅಂಶವನ್ನು ಗಮನಿಸಿದೆ.
ಪ್ರಕರಣದ ವಿವರ:
2010ರಲ್ಲಿ ಜಾಧವ್‌ ಅವರು 85,000 ರೂ.ಗಳ ಕ್ರೆಡಿಟ್‌ ಕಾರ್ಡ್‌ ಬಾಕಿಯನ್ನು ಉಳಿಸಿಕೊಂಡಿದ್ದರು. ಬಡ್ಡಿ ಸಹಿತ 1.17 ಲಕ್ಷ ರೂ. ಬಾಕಿ ಪಾವತಿಸುವಂತೆ ಸೂಚಿಸಲಾಗಿತ್ತು. ಆದರೆ, ಬಾಕಿ ಪಾವತಿಸಲು ಅವರು ವಿಫಲರಾಗಿದ್ದರು. ಕೊನೆಗೆ ಸಾಲ ನೀಡಿದ್ದ ಕಂಪನಿಯು 2015ರಲ್ಲಿ ಕೋರ್ಟ್‌ ಮೊರೆ ಹೋಗಿತ್ತು. ಮನೆ ಬದಲಿಸಿದ್ದ ಕಾರಣ, ಕಳೆದ ಎರಡು ವರ್ಷಗಳಿಂದ ಜಾಧವ್‌ಗೆ ನೋಟಿಸ್‌ ನೀಡಲು ಬ್ಯಾಂಕ್‌ ನಡೆಸಿದ ಪ್ರಯತ್ನಗಳು ಫಲಿಸಿರಲಿಲ್ಲ. ಕಂಪನಿ ಮತ್ತು ಇತರೆ ವಕೀಲರಿಂದ ನೋಟಿಸ್‌ ಸ್ವೀಕರಿಸುವುದನ್ನು ಜಾಧವ್‌ ತಪ್ಪಿಸಿಕೊಳ್ಳುತ್ತಿದ್ದರು. ಹೇಗೋ ಅವರ ಮೊಬೈಲ್‌ ನಂಬರ್‌ ಪತ್ತೆ ಹಚ್ಚಿ ವಾಟ್ಸಪ್ ಮೂಲಕ ನೋಟಿಸ್‌ ಅನ್ನು ರವಾನಿಸಲಾಗಿದ್ದು, ಅದಕ್ಕೆ ಕಾನೂನಿನ ಮಾನ್ಯತೆ ಸಿಕ್ಕಿದೆ.
ಅವಕಾಶ ಇದೆಯೇ?
ಕಾನೂನಿನ ಪ್ರಕಾರ, ವ್ಯಕ್ತಿಗೆ ರಿಜಿಸ್ಟರ್‌ ಪೋಸ್ಟ್‌ ಮುಖಾಂತರ ನೋಟಿಸ್‌ ನೀಡಬೇಕು. ಆದರೆ, ಐಟಿ ಕಾಯ್ದೆ ಅನ್ವಯ ವಿದ್ಯುನ್ಮಾನ ಸಂವಹನವನ್ನೂ ಸಾಕ್ಷಿಯಾಗಿ ಪರಿಗಣಿಸಬಹುದು. ಇಮೇಲ್‌ ಮೂಲಕ ನೀಡುವ ನೋಟಿಸ್‌ಗಳಿಗೆ ಕೋರ್ಟ್‌ಗಳ ಸಮ್ಮತಿ ಇದೆ.
Comments are closed.