ಹೊಸದಿಲ್ಲಿ: ಪ್ರತಿಕೂಲ ಹವಾಮಾನ ಹೀಗೆಯೇ ಮುಂದುವರಿದರೆ ನೇಪಾಳ ಮಾರ್ಗದ ಮೂಲಕ ಕೈಲಾಸ ಮಾನಸ ಸರೋವರ ಯಾತ್ರೆ ಕೈಗೊಳ್ಳುವ ಯಾತ್ರಿಕರು ಮಾರ್ಗಮಧ್ಯೆ ಭಾರಿ ಸಂಕಷ್ಟಕ್ಕೆ ಸಿಲುಕುವ ಅಪಾಯ ಹೆಚ್ಚಿರುತ್ತದೆ ಎಂದು ಕೇಂದ್ರ ಸರಕಾರ ಯಾತ್ರಿಕರಿಗೆ ಸೂಚಿಸಿದೆ.
ನೇಪಾಳದ ಮೂಲಕ ಹೋಗುವ ನೇಪಾಳಗಂಜ್‌-ಸಿಮಿಕೋಟ್‌-ಹಿಲ್ಸಾ ಮಾರ್ಗದ ಮಾನಸ ಸರೋವರ ಯಾತ್ರೆಯ ಮಾರ್ಗವು ದುರ್ಗಮ ಹಾದಿಯಿಂದ ಕೂಡಿದೆ. ಸಿಮಿಕೋಟ್‌ ಮತ್ತು ಹಿಲ್ಸಾ ಪರ್ವತ ಪ್ರದೇಶಗಳನ್ನು ಲಘು ಯುದ್ಧ ವಿಮಾನ ಇಲ್ಲವೇ ಹೆಲಿಕಾಪ್ಟರ್‌ ಮೂಲಕ ಮಾತ್ರ ಸಂಪರ್ಕ ಸಾಧ್ಯ. ಭಾರಿ ಮಳೆ ಹಾಗೂ ಮಂಜು ಕವಿದ ವಾತಾವರಣವಿದ್ದರೆ ಕಾಪ್ಟರ್‌ಗಳ ಸೇವೆಯೂ ಸ್ಥಗಿತಗೊಳ್ಳುತ್ತದೆ. ಒಂದೊಮ್ಮೆ ಪ್ರತಿಕೂಲ ಹವಾಮಾನ ಇದೇ ರೀತಿ ಮುಂದುವರಿದಲ್ಲಿ ಈ ಮಾರ್ಗದ ಮೂಲಕ ಯಾತ್ರೆ ಕೈಗೊಳ್ಳುವ ಭಕ್ತರು ಸಂಕಷ್ಟಕ್ಕೆ ಒಳಗಾಗುವ ಸಾಧ್ಯತೆ ಹೆಚ್ಚಿರುತ್ತವೆ. ಈ ಬಗ್ಗೆ ಎಚ್ಚರಿಕೆ ವಹಿಸಬೇಕು ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಯಾತ್ರಿಕರಿಗೆ ಸೂಚನೆ ನೀಡಿದೆ.
ಭಾರಿ ಮಳೆ ಹಾಗೂ ಭೂ ಕುಸಿತದಿಂದ ನೇಪಾಳಗಂಜ್‌-ಸಿಮಿಕೋಟ್‌-ಹಿಲ್ಸಾ ಮಾರ್ಗದಲ್ಲಿ ನೂರಾರು ಕನ್ನಡಿಗರೂ ಸೇರಿ ಸಾವಿರಾರು ಯಾತ್ರಿಕರು ಸಿಲುಕಿರುವ ಹಿನ್ನೆಲೆಯಲ್ಲಿ ಈ ಸೂಚನೆ ಮಹತ್ವ ಪಡೆದಿದೆ. ಪ್ರತಿಕೂಲ ಹವಾಮಾನದ ವೇಳೆ ಯಾತ್ರಿಕರಿಗೆ ಔಷಧೋಪಚಾರ ಹಾಗೂ ತುರ್ತು ಆರೋಗ್ಯ ಸೇವೆಯೂ ಕಷ್ಟಸಾಧ್ಯವಾಗಿರುವ ಹಿನ್ನೆಲೆಯಲ್ಲಿ ಯಾತ್ರೆ ಆರಂಭಕ್ಕೂ ಮುನ್ನ ತಮ್ಮೊಟ್ಟಿಗೆ ಅಗತ್ಯ ಔಷಧಗಳನ್ನು ಒಯ್ಯುವುದು ಕ್ಷೇಮಕರ ಎಂದೂ ಹೇಳಿದೆ. ಕಳೆದ ಏಪ್ರಿಲ್‌ನಲ್ಲಿಯೇ ಸಚಿವಾಲಯ ಈ ಬಗ್ಗೆ ರಾಜ್ಯಗಳಿಗೆ ಹಾಗೂ ಟ್ರಾವೆಲ್‌ ಏಜೆನ್ಸಿಗಳಿಗೆ ಸೂಚನೆ ಹೊರಡಿಸಿತ್ತಾದರೂ ಈ ಮತ್ತೊಮ್ಮೆ ಅದನ್ನು ನೆನಪಿಸಿದೆ.
1000 ಯಾತ್ರಿಕರು ಸಂಕಷ್ಟದಲ್ಲಿ: ಹಿಲ್ಸಾದಿಂದ ಬುಧವಾರ 250 ಯಾತ್ರಿಕರನ್ನು ರಕ್ಷಿಸಲಾಗಿದೆಯಾದರೂ ಇನ್ನೂ ಸಾವಿರಕ್ಕೂ ಹೆಚ್ಚು ಭಾರತೀಯ ಯಾತ್ರಿಕರು ಮಾರ್ಗದ ಅನೇಕ ಕಡೆಗಳಲ್ಲಿ ಸಿಲುಕಿದ್ದು ಅವರ ರಕ್ಷಣಾ ಕಾರ್ಯ ಸಾಗಿದೆ ಎಂದು ನೇಪಾಳದಲ್ಲಿರುವ ಭಾರತೀಯ ದೂತಾವಾಸ ಕಚೇರಿ ಹೇಳಿದೆ.
ಸಿಮಿಕೋಟ್‌ನಲ್ಲಿ 643, ಹಿಲ್ಸಾದಲ್ಲಿ 350 ಹಾಗೂ ನೇಪಾಳಗಂಜ್‌ನಲ್ಲಿ 143 ಯಾತ್ರಿಕರು ಸಿಲುಕಿದ್ದು ಅವರ ರಕ್ಷಣೆಗೆ 10 ಲಘು ವಿಮಾನ/ಕಾಪ್ಟರ್‌ಗಳನ್ನು ಬಳಸಿಕೊಳ್ಳಲಾಗುತ್ತಿದೆ ಎಂದು ದೂತಾವಾಸ ಕಚೇರಿ ಟ್ವೀಟ್‌ ಮಾಡಿದೆ. ಕನ್ನಡ, ತಮಿಳು, ತೆಲುಗು, ಮಳಯಾಳಂ ಮಾತನಾಡುವ ಸಿಬ್ಬಂದಿ ನೆರವಿನೊಂದಿಗೆ ಸಹಾಯವಾಣಿಯನ್ನೂ ಆರಂಭಿಸಲಾಗಿದೆ.
ಸತತ 2ನೇ ದಿನವೂ ಸ್ಥಗಿತ
ಮಳೆ, ಭೂಕುಸಿತದ ಪರಿಣಾಮ ಪಹಲ್ಗಾಮ್‌ ಮತ್ತು ಬಲ್ಟಾಲ್‌ ಮಾರ್ಗಗಳ ಅಮರನಾಥ ಯಾತ್ರೆಯನ್ನು ಸತತ ಎರಡನೇ ದಿನವೂ ಸ್ಥಗಿತಗೊಳಿಸಲಾಗಿದೆ ಎಂದು ಅಮರನಾಥ ದೇವಸ್ಥಾನ ಆಡಳಿತ ಮಂಡಳಿ ತಿಳಿಸಿದೆ. ಆದರೆ ಹೆಲಿಕಾಪ್ಟರ್‌ ಸೇವೆ ಮುಂದುವರಿದಿದೆ. ಜೂನ್‌ 28ರಿಂದ ಆರಂಭವಾಗಿರುವ ಯಾತ್ರೆಯಲ್ಲಿ ನಾನಾ ವೈದ್ಯಕೀಯ ಕಾರಣಗಳಿಂದ ಇದುವರೆಗೂ 6 ಯಾತ್ರಿಕರು ಮೃತಪಟ್ಟಿದ್ದಾರೆ.
Comments are closed.