ಕೋಲ್ಕತ್ತಾ: ಶಾಲಾ ಬಸ್ಸಿನಲ್ಲಿ ಹುಡುಗಿ ಪಕ್ಕ ಕುಳಿತುಕೊಳ್ಳುವ ವಿಷಯಕ್ಕೆ ಸಂಬಂಧಿಸಿ ಆರಂಭವಾದ ಜಗಳ ಮಾರಣಾಂತಿಕ ದಾಳಿಯಲ್ಲಿ ಕೊನೆಗೊಂಡ ಬೆಚ್ಚಿಬೀಳಿಸುವ ಘಟನೆ ಕೋಲ್ಕತ್ತಾದಲ್ಲಿ ಸೋಮವಾರ ನಡೆದಿದೆ.
ದಾಳಿಗೊಳಗಾದ ಬಾಲಕ ಪ್ರತಿಷ್ಠಿತ ಡುಮ್ ಡುಮ್ ಶಾಲೆಯ 11ನೇ ತರಗತಿ ವಿದ್ಯಾರ್ಥಿಯಾಗಿದ್ದು, ಅದೇ ಶಾಲೆಯಲ್ಲಿಯೇ ಓದುತ್ತಿದ್ದ ಹಿರಿಯ ವಿದ್ಯಾರ್ಥಿಯಿಂದ ಪೀಲರ್ (ಆಲೂಗಡ್ಡೆ ಸುಲಿಯುವ ಸಾಧನ) ಇರಿತಕ್ಕೊಳಗಾಗಿದ್ದಾನೆ.
ಸೋಮವಾರ ಮಧ್ಯಾಹ್ನ ಸುಮಾರು 4.45ರಷ್ಟೊತ್ತಿಗೆ ಡುಂ ಡುಂ ಶಾಲಾ ಮಕ್ಕಳು ಶಾಲಾ ವಾಹನದಲ್ಲಿ ಮನೆಗೆ ಮರಳುತ್ತಿದ್ದರು. 11ನೇ ತರಗತಿ ಬಾಲಕ( ಹಲ್ಲೆಗೊಳಗಾದವ) ಹುಡುಗಿ ಪಕ್ಕ ಕುಳಿತಿದ್ದ. ಅಷ್ಟರಲ್ಲಿ ಬಸ್ಸನ್ನೇರಿದ 12ನೇ ತರಗತಿ ಬಾಲಕ ನನ್ನ ಗೆಳತಿಯ ಪಕ್ಕದಿಂದ ಎದ್ದೇಳು ಎಂದು ಗಲಾಟೆ ಮಾಡಿದ್ದಾನೆ. ಇಬ್ಬರ ನಡುವೆ ಜಗಳ ತಾರಕ್ಕೇರಿದ್ದು, ಮತ್ತಿಬ್ಬರು ವಿದ್ಯಾರ್ಥಿಗಳು ಅವರಿಬ್ಬರನ್ನು ಸಮಾಧಾನ ಪಡಿಸಲು ಯತ್ನಿಸಿದರಾದರೂ ಪ್ರಯೋಜನವಾಗಿಲ್ಲ.
ಬಸ್ ಶಾಲಾ ಗೇಟ್‌ನಿಂದ ಹೊರಬೀಳುತ್ತಿದ್ದಾಗ, ಕೆಳಕ್ಕಿಳಿದ 12ನ ತರಗತಿ ವಿದ್ಯಾರ್ಥಿ (ಆರೋಪಿ) ರಸ್ತೆಬದಿಯಿದ್ದ ಅಂಗಡಿಗೆ ಓಡಿ ಹೋಗಿ ಆಲೂಗಡ್ಡೆ ಸುಲಿಯುವ ಪೀಲರ್ ತೆಗೆದುಕೊಂಡು ಓಡಿ ಬಂದು ಬಸ್ ಹತ್ತಿದ್ದಾನೆ. ಬಳಿಕ ಆ ಪೀಲರ್‌ನಿಂದ ಕಿರಿಯ ವಿದ್ಯಾರ್ಥಿ ಮೇಲೆ ದಾಳಿ ಮಾಡಿ ಮಾಡಿದ್ದಾನೆ. ಆತನ ಕ್ರೌರ್ಯಕ್ಕೆ ಬೆಚ್ಚಿದ ಬಸ್ ಚಾಲಕ, ಸಹಾಯಕ ಮತ್ತು ಇತರ ವಿದ್ಯಾರ್ಥಿಗಳು ಆರೋಪಿ ಬಾಲಕನನ್ನು ತಡೆದು ಬಸ್‌ನಿಂದ ಕೆಳಕ್ಕೆಳೆದು ಹಾಕಿದ್ದಾರೆ, ಎಂದು ಬಸ್‌ನಲ್ಲಿದ್ದ ಮತ್ತೊಬ್ಬ ವಿದ್ಯಾರ್ಥಿ ಹೇಳಿದ್ದಾನೆ.
ಬಾಲಕನ ಕತ್ತು, ಭುಜಕ್ಕೆ ಗಾಯಗಳಾಗಿದ್ದು , ಆತನನ್ನು ಡುಂ ಡುಂ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಆರೋಪಿ ಬಾಲಕನ್ನು ಸೋಮವಾರ ಸಂಜೆ ಬಂಧಿಸಿರುವ ಪೊಲೀಸರು ವಿಚಾರಣೆ ಕೈಗೊಂಡಿದ್ದಾರೆ.
Comments are closed.