ರಾಯ್‌ಪುರ: ಶಾಲೆಯಲ್ಲಿ ಹಾಜರಾತಿಯನ್ನು ಸುಗಮಗೊಳಿಸಲು ಟಚ್‌ಸ್ಕ್ರೀನ್‌ ತಂತ್ರಜ್ಞಾನದ ಟ್ಯಾಬ್‌ಗಳನ್ನು ಛತ್ತೀಸ್‌ಗಢ ಸರಕಾರ ನೀಡಿತ್ತು. ಆದರೆ, ಟ್ಯಾಬ್‌ಗಳಲ್ಲಿ ತೊಂದರೆ ಉಂಟಾಗಿ ಸ್ಕ್ರೀನ್‌ನ ಮುಂದೆ ಅಶ್ಲೀಲ ಚಿತ್ರಗಳು ಬರುತ್ತಿದ್ದು, ಇದರಿಂದ ಶಿಕ್ಷಕರು ಮುಜುಗರಕ್ಕೊಳಗಾಗಿದ್ದಾರೆ. 2017ರ ಸೆಪ್ಟೆಂಬರ್‌ನಲ್ಲಿ ಸರಕಾರ ಶಾಲೆಗಳಿಗೆ ಟ್ಯಾಬ್ಲೆಟ್‌ಗಳನ್ನು ನೀಡಿದ್ದು, ಅವುಗಳಿಗೆ ವೈರಸ್‌ ಅಟ್ಯಾಕ್ ಆಗಿದೆ.
ಶಾಲೆಯ ಪ್ರಿನ್ಸಿಪಾಲ್‌ ಸ್ಪ್ಯಾಮ್ ಅಥವಾ ಅಶ್ಲೀಲ ವೆಬ್‌ಸೈಟ್ ಕ್ಲಿಕ್ ಮಾಡಿದ ಕಾರಣದಿಂದಾಗಿ ಈ ರೀತಿಯಾಗಿರಬಹುದು ಎನ್ನಲಾಗಿದೆ. ಇದರಿಂದ, ಈಗ ಟ್ಯಾಬ್‌ಗಳನ್ನು ಆನ್‌ ಮಾಡಿದ ತಕ್ಷಣವೇ ಅಶ್ಲೀಲ ಚಿತ್ರಗಳು ಓಪನ್ ಆಗುತ್ತಿವೆ. ಅಲ್ಲದೆ, ಟ್ಯಾಬ್‌ನ ಸ್ಕ್ರೀನ್‌ ಮೇಲೆ ಶಿಕ್ಷಕರು ಬೆರಳಿಟ್ಟರೆ, ಅದರೊಳಗಿನ ಸ್ಕ್ಯಾನರ್‌ನಿಂದ ಅವರಿಗೆ ಶಾಲೆಯಲ್ಲಿ ಹಾಜರಿ ಸಿಗುತ್ತದೆ. ಆದರೆ, ಈ ಘಟನೆ ಬಳಿಕ ಮಹಿಳಾ ಸಿಬ್ಬಂದಿ ಟ್ಯಾಬ್‌ ಮೇಲೆ ಬೆರಳು ಇಡುವುದು ಇರಲಿ, ಅದರತ್ತ ತಲೆಯನ್ನು ಹಾಕುತ್ತಿಲ್ಲ ಎಂದು ತಿಳಿದುಬಂದಿದೆ.
ಛತ್ತೀಸ್‌ಗಢ ರಾಜ್ಯದಾದ್ಯಂತ ಹಲವು ಶಿಕ್ಷಕರು ಈ ಬಗ್ಗೆ ದೂರು ನೀಡುತ್ತಿದ್ದಾರೆ. ಇದರಿಂದ ನಮಗೆ ತೀವ್ರ ಮುಜುಗರವುಂಟಾಗಿದೆ. ಮಕ್ಕಳು ಸಹ ಈ ವಸ್ತುಗಳನ್ನು ಮುಟ್ಟಬಹುದು. ಹೀಗಾಗಿ, ಬಯೋಮೆಟ್ರಿಕ್‌ ಹಾಜರಾತಿ ಪದ್ಧತಿಗೆ ಟ್ಯಾಬ್‌ಗಳನ್ನು ಬಳಸುವುದನ್ನು ಸರಕಾರ ಮರುಪರಿಶೀಲನೆ ಮಾಡಬೇಕು ಎಂದು ರಾಜ್ಯ ಶಿಕ್ಷಕರ ಸಂಘದ ಸದಸ್ಯರೊಬ್ಬರು ಹೇಳಿದ್ದಾರೆ. ಇನ್ನು, ಈ ಸಮಸ್ಯೆ ಸರಿ ಹೋಗುವವರೆಗೆ ಟ್ಯಾಬ್ಲೆಟ್‌ಗಳನ್ನು ಬಳಸುವುದು ಬೇಡವೆಂದು ಹಲವು ಜಿಲ್ಲಾ ಶಿಕ್ಷಣಾಧಿಕಾರಿಗಳು ಸೂಚನೆ ನೀಡಿದ್ದಾರೆಂದು ವೈರಸ್‌ಗಳನ್ನು ತೆಗೆಯುತ್ತಿರುವ ಛತ್ತೀಸ್‌ಗಢ ಇನ್ಫೋಟೆಕ್ ಪ್ರಚಾರ ಸೊಸೈಟಿ ( ಛಿಪ್ಸ್ ) ಹೇಳಿದೆ.
ಶಿಕ್ಷಣ ಹಾಗೂ ಆಡಳಿತದ ಅಭಿವೃದ್ಧಿಗೆಂದು ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಛತ್ತೀಸ್‌ಗಢದ ಶಾಲೆಗಳಿಗೆ 51 ಸಾವಿರ ಟ್ಯಾಬ್ಲೆಟ್‌ಗಳನ್ನು ವಿತರಣೆ ಮಾಡಿತ್ತು. ಹಾಗೆ, ಸೆಪ್ಟೆಂಬರ್ 2017ರಲ್ಲಿ ಶಾಲಾಕೋಶ್‌ ಎಂಬ ಹೆಸರಿನ ಪ್ರಾಜೆಕ್ಟ್ ಅನ್ನು ಆರಂಭಿಸಿತ್ತು ಎಂದು ಛಿಪ್ಸ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಇನ್ನು, ಕಳೆದ ಎರಡು ದಿನಗಳಿಂದ ಛಿಪ್ಸ್ ಸಹಾಯವಾಣಿಗೆ ಸಾಕಷ್ಟು ದೂರುಗಳು ಬರುತ್ತಿದೆ. ಈ ಪೈಕಿ, ಈಗಾಗ್ಲೇ 270ಕ್ಕೂ ಅಧಿಕ ಕೇಸ್‌ಗಳನ್ನು ಪರಿಹರಿಸಲಾಗಿದೆ. ಐಟಿ ತಜ್ಞರು ಶಾಲೆಗಳಿಗೆ ಭೇಟಿ ನೀಡಿ ದೂರುಗಳನ್ನು ಬಗೆಹರಿಸಲು ಪ್ರಯತ್ನಿಸುತ್ತಿದ್ದಾರೆ. ಇನ್ನು ಒಂದು ಅಥವಾ ಎರಡು ದಿನಗಳಲ್ಲಿ ಎಲ್ಲ ಟ್ಯಾಬ್‌ಗಳನ್ನು ಬಳಕೆ ಮಾಡಬಹುದು ಎಂದು ಶಾಲಾಕೋಶ್‌ ಪ್ರಾಜೆಕ್ಟ್‌ನ ಮುಖ್ಯಸ್ಥ ನೀಲೇಶ್‌ ಸೋನಿ ವಿಜಯ ಕರ್ನಾಟಕ ಸೋದರ ಪತ್ರಿಕೆ ಟೈಮ್ಸ್ ಆಫ್ ಇಂಡಿಯಾಗೆ ಮಾಹಿತಿ ನೀಡಿದ್ದಾರೆ.
ಅಲ್ಲದೆ, ಈ ರೀತಿ ಸಮಸ್ಯೆಗಳು ಮತ್ತೆ ಎದುರಾಗದಂತೆ ತಡೆಯಲು ಶಾಲಾ ಚಟುವಟಿಕೆಗಳಿಗೆ ಬೇಕಾದ ಆ್ಯಪ್‌ಗಳನ್ನು ಮಾತ್ರ ಡೌನ್‌ಲೋಡ್ ಮಾಡಿಕೊಳ್ಳಲು ಹಾಗೂ ಇತರೆ ವೆಬ್‌ಸೈಟ್‌ಗಳನ್ನು ಬ್ಲಾಕ್‌ ಮಾಡಲು ಛತ್ತೀಸ್‌ಗಢ ಇನ್ಫೋಟೆಕ್ ಪ್ರಚಾರ ಸೊಸೈಟಿ ಮುಂದಾಗಿದೆ. ಇನ್ನೊಂದೆಡೆ, ಬಯೋಮೆಟ್ರಿಕ್‌ ಹಾಜರಾತಿಗೆ ಹಲವು ಶಿಕ್ಷಕರ ವಿರೋಧವಿದೆ. ಹೀಗಾಗಿ, ಈ ಪದ್ಧತಿ ತೆಗೆಯುವಂತೆ ಮಾಡಲು ಶಿಕ್ಷಕರೇ ಈ ರೀತಿ ದುಷ್ಕೃತ್ಯ ನಡೆಸಿರುವ ಸಾಧ್ಯತೆಯ ಬಗ್ಗೆಯೂ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ.
Comments are closed.