ಲಂಡನ್: ಕ್ರಿಕೆಟ್ ಕಾಶಿ ಲಾರ್ಡ್ಸ್ ಮೈದಾನದಲ್ಲಿ ಮೈದಾನ ಸಿದ್ಧಪಡಿಸಲು ಗ್ರೌಂಡ್ಸ್‌ಮ್ಯಾನ್‌ಗಳಿಗೆ ನೆರವಾಗಿರುವ ಕ್ರಿಕೆಟ್ ಐಕಾನ್ ಸಚಿನ್ ತೆಂಡೂಲ್ಕರ್ ಪುತ್ರ ಅರ್ಜುನ್ ತೆಂಡೂಲ್ಕರ್ ಬಳಿಕ ರೇಡಿಯೋ ಮಾರಾಟ ಮಾಡುವ ಮೂಲಕ ಸುದ್ದಿಯಾಗಿದ್ದರು.
ಇದೀಗ ಮಾಜಿ ಕಪ್ತಾನ ಮಹೇಂದ್ರ ಸಿಂಗ್ ಧೋನಿ ಅವರನ್ನು ಹಿಂಬಾಲಿಸಿರುವ ಅರ್ಜುನ್, ಲಾರ್ಡ್ಸ್ ಕ್ರಿಕೆಟ್ ಮೈದಾನದಲ್ಲಿ ಮಲಗುವ ಮೂಲಕ ಗಮನ ಸೆಳೆದಿದ್ದಾರೆ.
ಕ್ರಿಕೆಟ್ ತವರೂರು ಲಾರ್ಡ್ಸ್ ಮೈದಾನದಲ್ಲಿ ಪ್ರವಾಸಿ ಭಾರತ ಹಾಗೂ ಆತಿಥೇಯ ಇಂಗ್ಲೆಂಡ್ ನಡುವೆ ನಡೆಯುತ್ತಿರುವ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಅರ್ಜುನ್ ಮಾಧ್ಯಮಗಳ ಕೇಂದ್ರ ಬಿಂದುವಾಗಿದ್ದಾರೆ.
ಕಳೆದ ವರ್ಷ ಶ್ರೀಲಂಕಾ ವಿರುದ್ಧದ ಏಕದಿನ ಪಂದ್ಯದ ವೇಳೆ ಮೈದಾನಕ್ಕೆ ಬಾಟಲಿಗಳನ್ನು ಎಸೆಯುವ ಮೂಲಕ ಅಭಿಮಾನಿಗಳು ಪಂದ್ಯಕ್ಕೆ ಅಡ್ಡಿಪಡಿಸಿದಾಗ ಅಲ್ಪ ಹೊತ್ತು ಆಟಕ್ಕೆ ತೊಂದರೆಯಾಗಿತ್ತು. ಈ ವೇಳೆಯಲ್ಲಿ ಧೋನಿ ಮೈದಾನದಲ್ಲೇ ಮಲಗುವ ಮೂಲಕ ವಿಶ್ರಾಂತಿ ಪಡೆದಿದ್ದರು. ಇದೀಗ ಸಾಕಷ್ಟು ಬಳಲಿದ ಬಳಿಕ ಲಾರ್ಡ್ಸ್ ಮೈದಾನದ ಬೌಂಡರಿ ಗೆರೆ ಹೊರಗಡೆ ಮಲಗುವ ಮೂಲಕ ಅರ್ಜುನ್ ಅಲ್ಪ ಹೊತ್ತು ನಿದ್ರೆಗೆ ಜಾರಿದ್ದರು.
ಈ ಮೊದಲು ಭಾರತ ಹಾಗೂ ಇಂಗ್ಲೆಂಡ್ ನಡುವಣ ಟೆಸ್ಟ್ ಪಂದ್ಯಕ್ಕೆ ಮಳೆ ಅಡಚಣೆಯಾಗಿತ್ತು. ಈ ವೇಳೆಯಲ್ಲಿ ಮೈದಾನ ಸಿದ್ಧಪಡಿಸಲು ಗ್ರೌಂಡ್ಸ್‌ಮ್ಯಾನ್‌ಗಳಿಗೆ ನೆರವಾಗುವ ಮೂಲಕ ಅರ್ಜುನ್ ಗಮನ ಸಳೆದಿದ್ದರು.
ಬಳಿಕ ಇಂಗ್ಲೆಂಡ್‌ನಲ್ಲಿ ಎಂಸಿಸಿ ಉದಯೋನ್ಮುಖ ಕ್ರಿಕೆಟಿಗರ ಜತೆ ತರಬೇತಿ ನಡೆಸುತ್ತಿರುವ ಅರ್ಜುನ್, ಸ್ಟೇಡಿಯಂ ಹೊರಗಡೆ ಡಿಜಿಟಲ್ ರೇಡಿಯೋ ಮಾರಾಟ ಮಾಡುವ ಚಿತ್ರವನ್ನು ಆಫ್ ಸ್ಪಿನ್ನರ್ ಹರ್ಭಜನ್ ಸಿಂಗ್ ಹಂಚಿಕೊಂಡಿದ್ದರು.
ಇತ್ತೀಚೆಗೆ ಶ್ರೀಲಂಕಾದಲ್ಲಿ ಆತಿಥೇಯ ಶ್ರೀಲಂಕಾ ವಿರುದ್ಧದ 19 ವಯೋಮಿತಿ ಯೂತ್‌ ಟೆಸ್ಟ್ ಸರಣಿಯಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದ ಅರ್ಜುನ್ ತೆಂಡೂಲ್ಕರ್ ಚೊಚ್ಚಲ ವಿಕೆಟ್ ಪಡೆಯುವ ಮೂಲಕ ಗಮನ ಸೆಳೆದಿದ್ದರು.
Comments are closed.