ಅಹಮದಾಬಾದ್: ಎಂಬಿಬಿಎಸ್‌ ಪ್ರವೇಶ ಪರೀಕ್ಷೆಯೊಂದರಲ್ಲಿ ಇಬ್ಬರು ವಿದ್ಯಾರ್ಥಿಗಳ ಪರವಾಗಿ ಪರೀಕ್ಷೆ ಬರೆಯುತ್ತಿದ್ದ ನೆವಿಲ್ ಪಟೇಲ್ ಎಂಬ ಪಟಾನ್‌ನ ವೈದ್ಯನೊಬ್ಬ ತನ್ನ ಎಂಬಿಬಿಎಸ್‌ ಪದವಿಯನ್ನೇ ಕಳೆದುಕೊಂಡಿದ್ದಾನೆ. ಮೆಡಿಕಲ್ ಕೌನ್ಸಿಲ್ ಆಫ್‌ ಇಂಡಿಯಾ 2009ರಲ್ಲಿ ಎಂಬಿಬಿಎಸ್‌ ಪಾಸಾಗಿದ್ದ ವೈದ್ಯನಿಗೆ ಈ ಶಿಕ್ಷೆ ನೀಡಿದ್ದು ಇದರ ವಿರುದ್ಧ ಆತ ಕೋರ್ಟ್ ಮೊರೆ ಹೋಗಿದ್ದಾನೆ.
2012 ರಲ್ಲಿ ಇಬ್ಬರು ಮುನ್ನಾಭಾಯಿಗಳ ಪರವಾಗಿ ಪರೀಕ್ಷೆ ಬರೆದು ನೆವಿಲ್ ಪಟೇಲ್ ಸಿಕ್ಕಿಬಿದ್ದಿದ್ದ. ಈ ಹಿನ್ನೆಲೆ ನ್ಯಾಷನಲ್ ಬೋರ್ಡ್‌ ಆಫ್‌ ಎಕ್ಸಾಮಿನೇಷನ್ಸ್ ಮಂಡಳಿ(ಎನ್‌ಬಿಇ) ಯಾವುದೇ ಪರೀಕ್ಷೆ ಬರೆಯದಂತೆ ಆತನನ್ನು 7 ವರ್ಷಗಳ ಕಾಲ ಬ್ಯಾನ್ ಮಾಡಲಾಗಿದೆ. ಆದರೂ ಸಹ ಕಳೆದ ವರ್ಷ ನಡೆದ ಸೂಪರ್ ಸ್ಪೆಷಾಲಿಟಿ ಕೋರ್ಸ್ ಪರೀಕ್ಷೆ ಕಟ್ಟಿದ್ದ ಆತನನ್ನು ಪರೀಕ್ಷೆ ಬರೆಯದಂತೆ ನಿಷೇಧಿಸಿದ್ದಲ್ಲದೆ ಎಂಬಿಬಿಎಸ್‌ ಪದವಿಯನ್ನೇ ಕಿತ್ತುಕೊಂಡಿದೆ. ಈ ಮೊದಲಿನ ಎನ್‌ಬಿಇ ಬದಲು ಈಗ ನೀಟ್ ಸ್ಥಾಪನೆಯಾಗಿದ್ದರೂ ಸಹ ಆ ಶಿಕ್ಷೆ ಜಾರಿಯಲ್ಲಿರುತ್ತದೆ. ಆದರೆ, ನಿಷೇಧ ಉಲ್ಲಂಘಿಸಿ ಮತ್ತೆ ಪರೀಕ್ಷೆ ಬರೆಯಲು ಹೋಗಿದ್ದಕ್ಕೆ ವೈದ್ಯ ಪದವಿಯನ್ನು ರದ್ದುಗೊಳಿಸಿದ್ದೇವೆ ಎಂದು ಸಮರ್ಥನೆ ಮಾಡಿಕೊಂಡಿದ್ದಾರೆ.
ಹೊಸದಿಲ್ಲಿಯ ಸೆಂಟ್ ಸ್ಟೀಫನ್ಸ್ ಕಾಲೇಜಿನಲ್ಲಿ ನ್ಯಾಷನಲ್ ಬೋರ್ಡ್‌ ಡಿಪ್ಲೊಮಾ ಓದುತ್ತಿದ್ದ ವೇಳೆ ಇಬ್ಬರ ಪರವಾಗಿ ಎಂಬಿಬಿಎಸ್‌ ಪರೀಕ್ಷೆ ಬರೆದು ಪಟೇಲ್ ಸಿಕ್ಕಿಹಾಕಿಕೊಂಡಿದ್ದ. ನಂತರ, ಪ್ರಕರಣದ ವಿಚಾರಣೆಯನ್ನು ವಹಿಸಿಕೊಂಡ ದಿಲ್ಲಿ ಮೆಡಿಕಲ್ ಕೌನ್ಸಿಲ್, 3 ವರ್ಷಗಳ ಕಾಲ ಆತ ವೈದ್ಯನಾಗಿ ಸೇವೆ ಮಾಡುವಂತಿಲ್ಲ ಎಂದು ತೀರ್ಪು ನೀಡಿತ್ತು. ಈ ಆದೇಶದ ವಿರುದ್ಧ ನೆವಿಲ್ ಪಟೇಲ್ ದಿಲ್ಲಿ ಹೈಕೋರ್ಟ್ ಮೊರೆ ಹೋಗಿದ್ದು, ಮೂರು ವಾರಗಳೊಳಗೆ ಪ್ರಕರಣದ ಮರು ವಿಚಾರಣೆ ನಡೆಸಿ ಎಂದು ಹೈಕೋರ್ಟ್ ಎಂಸಿಐಗೆ ಸೂಚನೆ ನೀಡಿದೆ.
ಇನ್ನು, ಎಂಸಿಐನ ನೈತಿಕ ಸಮಿತಿ ಈ ಕುರಿತು ಮಾಹಿತಿ ನೀಡಿದ್ದು, ಪಟೇಲ್ ಈಗಾಗಲೇ 7 ವರ್ಷ ನಿಷೇಧ ಶಿಕ್ಷೆ ಅನುಭವಿಸುತ್ತಿದ್ದಾನೆ. ಹೀಗಾಗಿ ಮತ್ತೊಂದು ಶಿಕ್ಷೆ ಪಡೆಯುವ ಅಗತ್ಯವಿಲ್ಲ ಎಂದು ತಿಳಿಸಿದೆ. ಆದರೆ, ಎಂಸಿಐ ನೈತಿಕ ಸಮಿತಿ ತನ್ನ ಶಿಫಾರಸು ಕಳಿಸಿದ ಬಳಿಕ ಕಾರ್ಯಕಾರಿ ಸಮಿತಿ ಪಟೇಲ್ ಎಂಬಿಬಿಎಸ್‌ ಅನ್ನು ರದ್ದುಗೊಳಿಸಿತ್ತು ಎಂದು ಪಟೇಲ್ ಪರ ವಕೀಲ ರಾಹಿಲ್ ಜೈನ್ ಆರೋಪ ಮಾಡಿದ್ದಾರೆ. ಅಲ್ಲದೆ, ಯಾವುದೇ ವಿಚಾರಣೆ ನಡೆಸದೆ ಈ ಶಿಕಚ್ಎ ವಿಧಿಸಲಾಗಿದೆ. ಈ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸಲಾಗಿದೆ ಎಂದು ಜೈನ್ ತಿಳಿಸಿದ್ದಾರೆ. ಅಲ್ಲದೆ, 2017ರಲ್ಲಿ ಮಾಡಿರುವ ತಪ್ಪಿಗೆ 2009ರ ಎಂಬಿಬಿಎಸ್‌ ಪದವಿ ರದ್ದುಗೊಳಿಸುವುದು ಸರಿಯಲ್ಲ. ಆ ಇಬ್ಬರು ವಿದ್ಯಾರ್ಥಿಗಳು ಈಗ ವೈದ್ಯಕೀಯ ಸೇವೆ ಮಾಡುತ್ತಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
ಹೀಗಾಗಿ, ಈ ಪ್ರಕರಣದ ಪ್ರಾಥಮಿಕ ವಿಚಾರಣೆ ನಡೆಸಿದ ಹೈಕೋರ್ಟ್, ಎಂಸಿಐ, ದಿಲ್ಲಿ ಮೆಡಿಕಲ್ ಕೌನ್ಸಿಲ್, ಎನ್‌ಬಿಇ ಹಾಗೂ ಗುಜರಾತ್ ಮೆಡಿಕಲ್ ಕೌನ್ಸಿಲ್‌ಗೆ ಕಳೆದ ವಾರ ನೋಟಿಸ್ ನೀಡಿದೆ.
Comments are closed.