ಉದಯ್‌ಪುರ: ತನ್ನ ತಂದೆ ತನ್ನ ಖಾಸಗಿ ಅಂಗಾಂಗಗಳನ್ನು ಮುಟ್ಟುತ್ತಿದ್ದಾರೆಂದು 14 ವರ್ಷದ ಬಾಲಕಿಯೊಬ್ಬಳು ಮಕ್ಕಳ ಸಹಾಯವಾಣಿಯ ಮೊರೆ ಹೋಗಿದ್ದಾಳೆ. ರಾಜಸ್ಥಾನದ ಛಿತ್ತೋರ್‌ಗಢದಲ್ಲಿ ಈ ಘಟನೆ ನಡೆದಿದ್ದು, ನಗರದ ಮಹಿಳಾ ಠಾಣೆಯ ಪೊಲೀಸರು 8ನೇ ತರಗತಿಯ ಬಾಲಕಿಯ ಲಿಖಿತ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದಾರೆ.
ಛಿತ್ತೋರ್‌ಗಢದ ಶಾಸ್ತ್ರಿನಗರದಲ್ಲಿ ಜಂಟಿ ಕುಟುಂಬದಲ್ಲಿ ವಾಸ ಮಾಡುತ್ತಿರುವ ಬಾಲಕಿ ಮಂಗಳವಾರ ಸಹಾಯವಾಣಿಗೆ ಕರೆ ಮಾಡಿ ತನ್ನ ಕಷ್ಟವನ್ನು ಹೇಳಿಕೊಂಡಿದ್ದಳು. ನಂತರ, ಮಕ್ಕಳ ಸಹಾಯವಾಣಿಯು ಬಾಲಕಿಯ ವಿಚಾರವನ್ನು ಮಕ್ಕಳ ಕಲ್ಯಾಣ ಸಮಿತಿಗೆ ತಿಳಿಸಿದ್ದು, ಅವರ ಸೂಚನೆಗಳ ಮೇರೆಗೆ ಮಹಿಳಾ ಠಾಣೆಯ ಪೊಲೀಸರು ಆಕೆಯ ಮನೆಗೆ ಭೇಟಿ ನೀಡಿ, ಸಂತ್ರಸ್ಥ ಬಾಲಕಿಯ ಲಿಖಿತ ಹೇಳಿಕೆ ದಾಖಲಿಸಿಕೊಂಡಿದ್ದಾರೆ.
ಇನ್ನು, ”ತಾನು ಮೊದಲು ಅಜ್ಜ – ಅಜ್ಜಿಯ ಮನೆಯಲ್ಲಿ ವಾಸ ಮಾಡುತ್ತಿದ್ದೆ. ಆದರೆ, ಈ ವರ್ಷದಿಂದ ಛತ್ತೋರ್‌ಗಢದಲ್ಲಿರುವ ಶಾಸ್ತ್ರಿ ನಗರದಲ್ಲಿ ತನ್ನ ಪೋಷಕರ ಜತೆ ಇದ್ದೇನೆ. ಅಲ್ಲದೆ, ಎಂಟನೇ ತರಗತಿಗೆ ಖಾಸಗಿ ಶಾಲೆಯಲ್ಲಿ ಸೇರಿಕೊಂಡಿದ್ದೇನೆ. ಜುಲೈ 10ರಂದು ತನ್ನ ತಾಯಿ ಮದುವೆ ಸಮಾರಂಭಕ್ಕೆ ಹೋಗಿದ್ದರು. ಆ ದಿನ, ತಾನು ತನ್ನ ಕಿರಿಯ ಸಹೋದರಿಯೊಂದಿಗೆ ರೂಮಿನಲ್ಲಿ ಮಲಗಿದ್ದ ವೇಳೆ ತನ್ನ ತಂದೆ ಬಂದು ತನ್ನ ಪಕ್ಕ ಮಲಗಿದರು. ಬಳಿಕ, ತನ್ನ ಖಾಸಗಿ ಅಂಗಾಂಗಗಳನ್ನು ಮುಟ್ಟಲು ಆರಂಭಿಸಿದ್ದು, ತಾನು ನಿರಾಕರಿಸಿದರೂ ಸಹ ಲೈಂಗಿಕ ಕಿರುಕುಳ ನೀಡುವುದನ್ನು ಮುಂದುವರಿಸಿದರು” ಎಂದು ಪತ್ರದಲ್ಲಿ ಬರೆದಿದ್ದಾಳೆ. ಅಲ್ಲದೆ, ”ತಾಯಿಗೆ ಈ ಬಗ್ಗೆ ಹೇಳಿದರೂ ಸಹ ಅವರು ತನ್ನ ಹೇಳಿಕೆಯನ್ನು ಗಂಭೀರವಾಗಿ ಪರಿಗಣಿಸಲಿಲ್ಲ. ಬದಲಾಗಿ ತನಗೇ ಬೈಯ್ದರು” ಎಂದು ಹೇಳಿಕೊಂಡಿದ್ದಾಳೆ.
ಜತೆಗೆ, ”ಅಂದಿನಿಂದ ಲೈಂಗಿಕ ಕಿರುಕುಳ ನೀಡುವುದನ್ನು ತಂದೆ ಮುಂದುವರಿಸಿದ್ದು, ತಾಯಿಗೆ ದೂರು ನೀಡಿದರೂ ಸಹ ಅವರು ಅದನ್ನು ಗಂಭೀರವಾಗಿ ಪರಿಗಣಿಸಲಿಲ್ಲ. ಮೊಹರಂ ದಿನವೂ, ತಾಯಿ ಊರಿನಿಂದ ಹೊರಗೆ ಹೋಗಿದ್ದಾಗ ತಂದೆ ಕಿರುಕುಳ ನೀಡುವುದನ್ನು ಮುಂದುವರಿಸಿದ್ದರು ”ಎಂದು ಬಾಲಕಿ ಲಿಖಿತ ಹೇಳಿಕೆ ದಾಖಲಿಸಿದ್ದಾರೆ. ಇನ್ನು, ಮಹಿಳಾ ಪೊಲೀಸರು ಸಂತ್ರಸ್ಥೆಯ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದರೂ ಸಹ ಆಕೆಯ ತಂದೆಯ ವಿರುದ್ಧ ಯಾವುದೇ ದೂರು ದಾಖಲಿಸಿಕೊಂಡಿಲ್ಲ. ಇನ್ನೊಂದೆಡೆ,” ತಾನು ತನ್ನ ಪೋಷಕರ ಜತೆಗೆ ವಾಸ ಮಾಡಲು ಇಚ್ಛಿಸುತ್ತೇನೆ. ಆದರೆ, ಸುರಕ್ಷಿತ ಪರಿಸರದಲ್ಲಿ ಜೀವಿಸಬೇಕು” ಎಂದು ದೂರಿನಲ್ಲಿ ಹೇಳಿಕೊಂಡಿದ್ದಾಳೆ.
Comments are closed.