ಬರ್ಲಿನ್‌ (ಜರ್ಮನಿ): ಕೊರೊನಾ ವೈರಸ್‌ನಿಂದ ಇಡೀ ಜಗತ್ತು ತತ್ತರಿಸಿ ಹೋಗಿದೆ. ದಿನದಿಂದ ದಿನಕ್ಕೆ ಸಾವಿನ ಸಂಖ್ಯೆ ಹೆಚ್ಚುತ್ತಿದ್ದು, ಜನ ಕೊರೊನಾ ಪದ ಕೇಳಿದರೆ ಭಯದಿಂದ ನಡುಗುತ್ತಿದ್ದಾರೆ. ಆದರೆ, ಇಲ್ಲೊಬ್ಬ ಜವಾಬ್ದಾರಿಯುತ ವ್ಯಕ್ತಿಯೊಬ್ಬರು ಬೇಕು ಬೇಕು ಅಂತಲೇ ಕೊರೊನಾ ಸೋಂಕಿಗೆ ತುತ್ತಾಗಿದ್ದು, ಈಗ ಪರಿತಪಿಸುತ್ತಿದ್ದಾರೆ.
ಹೌದು, ಜರ್ಮನಿಯ ಜಿಲ್ಲಾ ಮೇಯರ್‌ ಸ್ಟೀಫನ್ ವಾನ್ ಡಸೆಲ್ ಕೊರೊನಾ ವಿರುದ್ಧ ಹೋರಾಡುವ ರೋಗ ನಿರೋಧಕ ಶಕ್ತಿಯನ್ನು ಬೆಳೆಸಿಕೊಳ್ಳುವ ಸಲುವಾಗಿ ತನ್ನ ಸಂಗಾತಿಯಿಂದ ಉದ್ದೇಶಪೂರ್ವಕವಾಗಿ ಸೋಂಕಿತರಾಗಿದ್ದಾರೆ. ಆದರೆ, ಅಂದುಕೊಂಡದ್ದಕ್ಕಿಂತ ಹೆಚ್ಚಿನ ಸಮಸ್ಯೆಯನ್ನು ಕೊರೊನಾ ಮೇಯರ್‌ಗೆ ಮಾಡಿದೆ.
ಜರ್ಮನಿಯ ಸಾರ್ವಜನಿಕ ಪ್ರಸಾರ ಸೇವೆ ಆರ್‌ಬಿಬಿಯಲ್ಲಿ ಮಾತನಾಡಿರುವ ಮೇಯರ್‌, ಉದ್ದೇಶಪೂರ್ವಕವಾಗಿ ಸೋಂಕಿತನಾದ ನಂತರ ನಾನು ಭಾವಿಸಿದ್ದಕ್ಕಿಂತ ದೀರ್ಘಕಾಲ ಅನಾರೋಗ್ಯಕ್ಕೆ ತುತ್ತಾಗಬೇಕಾಯಿತು. 3 ದಿನ ಮಾತ್ರ ಅನಾರೋಗ್ಯ ಇರುತ್ತದೆ. ನಂತರ ಇಮ್ಯೂನ್‌ ಆಗುತ್ತೇನೆ ಎಂದು ಭಾವಿಸಿದ್ದೆ. ಮತ್ತು ಇದರಿಂದ ಯಾರಿಗೂ ತೊಂದರೆಯಾಗಿಲ್ಲ ಎಂದು ಹೇಳಿದ್ದಾರೆ.
53 ವರ್ಷದ ಮೇಯರ್‌ ತನ್ನ ನಡೆಯನ್ನು ಸಮರ್ಥಿಸಿಕೊಂಡಿದ್ದು, ವೈದ್ಯಕೀಯ ಲೋಕದ ವಿರುದ್ಧ ಹೋಗಿದ್ದಕ್ಕೆ ಕಾರಣ ನೀಡಿದ್ದಾರೆ. ಸೋಂಕು ತಗುಲಿದ ಮೇಲೆ ಆರೋಗ್ಯದಲ್ಲಿ ಹೇಗೆ ಏರುಪೇರಾಗುತ್ತದೆ ಎಂಬುದು ಗೊತ್ತಾಗಿದೆ. ಇದು ಜಗತ್ತಿಗೆ ನನ್ನ ಕೊಡುಗೆ ಎಂದು ಅವರು ಹೇಳಿರುವುದು ವೈದ್ಯಕೀಯ ಲೋಕದ ಕಣ್ಣನ್ನು ಕೆಂಪಾಗಿಸಿದೆ.
ತನ್ನ ಸಂಗಾತಿಗೆ ಸೋಂಕು ತಗುಲಿದ ನಂತರ ನಾನೂ ಕ್ವಾರಂಟೈನ್‌ನಲ್ಲಿ ಇದ್ದೆ ಎಂದಿರುವ ಸ್ಟೀಫನ್, ಹೆಚ್ಚಿನ ಜಾಗೃತೆ ವಹಿಸಿ ಇಲ್ಲದಿದ್ದರೆ ಕೊರೊನಾ ಒಬ್ಬರಿಂದ ಒಬ್ಬರಿಗೆ ಹರಡುತ್ತದೆ. ಸೋಂಕು ಹಬ್ಬದಂತೆ ತಡೆಗಟ್ಟಲು ತೀವ್ರ ಪ್ರಯತ್ನ ನಡೆಸುತ್ತಿದ್ದೇನೆ. ಜವಾಬ್ದಾರಿಯುತ ವ್ಯಕ್ತಿಯಾಗಿ ಕೊರೊನಾದಿಂದ ಚೇತರಿಸಿಕೊಳ್ಳುವವರೆಗೆ ಕ್ವಾರಂಟೈನ್‌ನಲ್ಲಿ ಇರುವುದಾಗಿ ಸ್ಪಷ್ಟಪಡಿಸಿದ್ದಾರೆ.
Comments are closed.