ಲಂಡನ್‌: ಕೊರೊನಾ ವೈರಾಣುವಿನಿಂದಾಗಿ ಜಗತ್ತಿನಾದ್ಯಂತ ಲಕ್ಷಗಟ್ಟಲೆ ಯೋಜಿತ ಶಸ್ತ್ರಚಿಕಿತ್ಸೆಗಳು ಬಾಕಿ ಉಳಿದಿವೆ. ಅವರೆಲ್ಲರೂ ಮುಂದಿನ ದಿನಗಳಲ್ಲಿ ಸರದಿಯಂತೆ ಆಪರೇಷನ್‌ ಮಾಡಿಸಿಕೊಂಡು ರೋಗ ಗುಣಪಡಿಸಿಕೊಳ್ಳಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ.
ಬ್ರಿಟನ್‌ನ ಯುನಿವರ್ಸಿಟಿ ಆಫ್‌ ಬರ್ಮಿಂಗ್‌ಹ್ಯಾಮ್‌ನ ಅಧ್ಯಯನಕಾರರ ತಂಡ ನಡೆಸಿದ ಸಮೀಕ್ಷೆಯಲ್ಲಿ ಈ ಕಳವಳಕಾರಿ ಸಂಗತಿ ಬೆಳಕಿಗೆ ಬಂದಿದೆ. ಅದರಲ್ಲೂ ಭಾರತವೊಂದರಲ್ಲೇ 5,84,737 ರೋಗಿಗಳು ಅಗತ್ಯ ಆಪರೇಷನ್‌ಗಳನ್ನು ಮಾಡಿಸಿಕೊಳ್ಳಲು ಸಾಧ್ಯವಾಗದೇ ಪರದಾಡುತ್ತಿದ್ದಾರೆ. ಇವರೆಲ್ಲರ ಅನಾರೋಗ್ಯ ಇನ್ನಷ್ಟು ದಿನಗಳ ಕಾಲ ಮುಂದುವರಿಯುವ ಜತೆಗೆ ವೈರಸ್‌ ನಿರ್ಮೂಲನೆಯಾದರೂ ತಕ್ಷಣದಲ್ಲೇ ಅವರಿಗೆ ವೈದ್ಯಕೀಯ ಸೌಲಭ್ಯ ದೊರೆಯದು ಎಂದು ಅಭಿಪ್ರಾಯಪಡಲಾಗಿದೆ.
5,000 ವೈದ್ಯರಿಂದ ಮಾಹಿತಿ
ಕೋವಿಡ್‌- 19 ವೈರಸ್‌ ಉಚ್ಛ್ರಾಯ ಸ್ಥಿತಿಯಲ್ಲಿದ್ದ 12 ವಾರಗಳ ಅವಧಿಯ ಅಂಕಿ- ಅಂಶಗಳನ್ನು ಆಧರಿಸಿ ಸಂಶೋಧನಾ ವರದಿ ತಯಾರಿಸಲಾಗಿದೆ. ಅದಕ್ಕಾಗಿ ಸುಮಾರು 120 ದೇಶಗಳ 5,000 ಪರಿಣತ ವೈದ್ಯರಿಂದ ಸಂಶೋಧಕರ ತಂಡ ಮಾಹಿತಿ ಸಂಗ್ರಹಿಸಿದೆ. ಸಮೀಕ್ಷೆ ನಡೆಸಿದ ತಂಡದಲ್ಲಿ ಬ್ರಿಟನ್‌, ಭಾರತ, ಬೆನಿನ್‌, ಘಾನಾ ಇಟಲಿ, ಮೆಕ್ಸಿಕೊ, ನೈಜೀರಿಯಾ, ರುವಾಂಡ, ಸ್ಪೇನ್‌, ದ. ಆಫ್ರಿಕಾ ಹಾಗೂ ಅಮೆರಿಕದ ತಜ್ಞರು ಇದ್ದರು. ಈ ಸಮೀಕ್ಷಾ ವರದಿಯನ್ನು ‘ಬ್ರಿಟಿಷ್‌ ಜರ್ನಲ್‌ ಆಫ್‌ ಸರ್ಜರಿ’ ಪ್ರಕಟಿಸಿದೆ.
ಸಂಶೋಧನಾ ವರದಿ ಪ್ರಕಾರ, ಜಗತ್ತಿನಲ್ಲಿ 2.8 ಕೋಟಿ ಪೂರ್ವನಿರ್ಧರಿತ ಶಸ್ತ್ರಚಿಕಿತ್ಸೆಗಳನ್ನು ನಡೆಸಲು ಸಾಧ್ಯವಾಗಿಲ್ಲ. ಅಂದರೆ ಶೇ. 72.3ರಷ್ಟು ಸರ್ಜರಿಗಳು ಬಾಕಿ ಉಳಿದಿದೆ. ಬಾಕಿ ಉಳಿದಿರುವ ಸರ್ಜರಿಗಳಲ್ಲಿ 63 ಲಕ್ಷ ರೋಗಿಗಳಿಗೆ ಮೂಳೆ ಸಂಬಂಧಿತ ಸಮಸ್ಯೆಯಿಂದ ಬಳಲುತ್ತಿರುವವರು ಮತ್ತು 23 ಲಕ್ಷ ಕ್ಯಾನ್ಸರ್‌ ರೋಗಿಗಳು ಇದ್ದಾರೆ. ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ವಾರವೊಂದಕ್ಕೆ 24 ಲಕ್ಷ ಸರ್ಜರಿಗಳು ಬಾಕಿ ಉಳಿಯುವ ಸಾಧ್ಯತೆಗಳಿವೆ ಎಂದು ತಜ್ಞರು ಅಂದಾಜು ಮಾಡಿದ್ದಾರೆ.
Comments are closed.