ಇಂದಿನಿಂದ ಗ್ರಾಮೀಣ ಭಾಗದ ಬಸ್​ ಸಂಚಾರ ಸೇವೆ ಆರಂಭ – ಸಾರಿಗೆ ಸಚಿವ ಲಕ್ಷ್ಮಣ ಸವದಿ

ಕಲಬುರ್ಗಿ(ಜೂ.08): ನಾಳೆಯಿಂದ ಗ್ರಾಮೀಣ ಭಾಗದ ಸಂಚಾರ ಸೇವೆ ಆರಂಭವಾಗಲಿದೆ ಎಂದು ಡಿಸಿಎಂ ಲಕ್ಷ್ಮಣ ಸವದಿ ಹೇಳಿದರು. ಈ ಸಂಬಂಧ ಸುದ್ದಿಗೋಷ್ಠಿಯಲ್ಲಿ ಮಾತಾಡಿದ ಸಾರಿಗೆ ಸಚಿವ ಲಕ್ಷ್ಮಣ ಸವದಿ, ಈಗಾಗಲೇ ಅಂತರ್​ ಜಿಲ್ಲೆ ಬಸ್​ ಸಂಚಾರ ಶುರುವಾಗಿದೆ. ಹೀಗಾಗಿ ಬೆಂಗಳೂರಿನಿಂದ ಎಲ್ಲಾ ಜಿಲ್ಲೆಗಳಿಗೂ ಬಸ್​​ ಲಭ್ಯವಿದೆ. ಈಗ ಗ್ರಾಮೀಣ ಭಾಗದ ಬಸ್​ ಸಂಚಾರ ಪ್ರಾರಂಭ ಮಾಡಲಿದ್ದೇವೆ ಎಂದರು.

ಕೊರೋನಾ ಲಾಕ್​ಡೌನ್​​ನಿಂದ ಸುಮಾರು 2,200 ಕೋಟಿ ರೂ. ಸಾರಿಗೆ ಇಲಾಖೆಗೆ ನಷ್ಟವಾಗಿದೆ. ಸದ್ಯದಲ್ಲೇ ಇದು 3 ಸಾವಿರ ಕೋಟಿ ರೂ. ಆಗುವ ಸಾಧ್ಯತೆ ಇದೆ. ಹೀಗಾಗಿ ಸಾರಿಗೆ ಇಲಾಖೆ ಸುಧಾರಣೆಗಾಗಿ ಮತ್ತು ರಾಜ್ಯದ ಆರ್ಥಿಕ ಸಂಕಷ್ಟ ಸರಿದೂಗಿಸಲು ಗ್ರಾಮೀಣ ಭಾಗದ ಬಸ್​ ಸಂಚಾರ ಶುರು ಮಾಡಲಿದ್ದೇವೆ ಎಂದರು ಲಕ್ಷ್ಮಣ ಸವದಿ.

ಇನ್ನು, ಬಸ್​​ನಲ್ಲಿ ಕೇವಲ 30 ಜನ ಮಾತ್ರ ಪ್ರಯಾಣ ಮಾಡಬೇಕು. ಹಾಗೆಯೇ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು, ಮಾಸ್ಕ್​​ ಧರಿಸುವುದು ಕಡ್ಡಾಯ. ಸಂಸ್ಥೆಯಿಂದ ಆರೋಗ್ಯ ತಪಾಸಣೆ ನಡೆಸಲಾಗುವುದು. ಸ್ಯಾನಿಟೈಜರ್ ಉಪಯೋಗಿಸಲಾಗುವುದು ಎಂದು ಹೇಳಿದರು.

ಅಂತರ್​ ರಾಜ್ಯಗಳಿಗೆ ಬಸ್​​ ಸಂಚಾರ ಆರಂಭಿಸಬೇಕು ಎಂದು ನಿರ್ಧಾರ ಮಾಡಲಾಗಿದೆ. ಹೀಗಾಗಿ ಎಲ್ಲಾ ರಾಜ್ಯಗಳಿಗೆ ಸರ್ಕಾರ ಪತ್ರ ಬರೆದಿದೆ. ಎಲ್ಲಾ ರಾಜ್ಯಗಳ ಸರ್ಕಾರದಿಂದ ಪತ್ರಕ್ಕೆ ಪತಿಕ್ರಿಯೆ ಬಂದ ಬಳಿಕ ಅಂತರ್​ ರಾಜ್ಯ ಬಸ್​ ಸಂಚಾರ ಮಾಡಲಾಗುವುದು ಎಂದು ತಿಳಿಸಿದರು.

ಸಾರಿಗೆ ಇಲಾಖೆ ನೌಕರರಿಗೆ 2 ತಿಂಗಳ ಸಂಬಳ ನೀಡಲಾಗಿದೆ. ಅದಕ್ಕಾಗಿ 650 ಕೋಟಿ ರೂ. ಮೀಸಲಿಟ್ಟಿದ್ದೇವೆ. ಯಾರನ್ನೂ ಕೆಲಸದಲ್ಲಿ ತೆಗೆಯಲಾಗುವುದಿಲ್ಲ, ಕಡ್ಡಾಯ ರಜೆ ಸಾಧ್ಯವೇ ಇಲ್ಲ. ಯಾರಿಗಾದರೂ ರಜೆ ನೀಡಿದರೇ ಅಂತಹ ಅಧಿಕಾರಿಗಳ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಭರವಸೆ ನೀಡಿದರು.