ರಾಜ್‌ಕೋಟ್‌: ಆಟವಾಡುತ್ತಿದ್ದ ಸಂದರ್ಭ ಪ್ರೆಶರ್‌ ಕುಕ್ಕರ್‌ ಒಳಗೆ ಒಂದು ವರ್ಷದ ಹೆಣ್ಣು ಮಗುವಿನ ತಲೆ ಸಿಕ್ಕಿಹಾಕಿಕೊಂಡ ಘಟನೆ ಗುಜರಾತ್‌ ರಾಜ್‌ಕೋಟ್‌ನಲ್ಲಿ ಸಂಭವಿಸಿದೆ.
ಶುಕ್ರವಾರ ಬೆಳಗ್ಗೆ ಈ ಘಟನೆ ಸಂಭವಿಸಿದ್ದು, ಮಗುವಿನ ತಲೆಗೆ ಅವುಚಿಕೊಂಡಿದ್ದ ಪ್ರೆಶರ್‌ ಕುಕ್ಕರ್‌ಅನ್ನು ತೆಗೆಯಲು ಸಾಧ್ಯವಾಗದೆ ಇದ್ದುದರಿಂದ ಆತಂಕಗೊಂಡ ಪೋಷಕರು ಭಾವನಗರ್‌ನ ಸರ್‌ ಟಿ ಆಸ್ಪತ್ರೆಗೆ ದೌಡಾಯಿಸಿದ್ದಾರೆ. ಆಸ್ಪತ್ರೆಗೆ ಆಗಮಿಸುವ ಸಂದರ್ಭ ನೋಡಿದವರೆಲ್ಲ ಮಗುವಿನ ತಲೆಗೆ ಹೆಲ್ಮೆಟ್‌ ಬದಲು ಕುಕ್ಕರ್‌ ಹಾಕಿಸಿಕೊಂಡು ಬಂದಿದ್ದಾರೆ ಎಂದೇ ಭಾವಿಸಿದ್ದರು. ಅಸಲಿ ಕಾರಣ ಗೊತ್ತಾಗುತ್ತಿದ್ದಂತೆ ಆಸ್ಪತ್ರೆಯತ್ತ ಧಾವಿಸಿ ಬಂದಿದ್ದರು.
ಹೆಲ್ಮೆಟ್‌ನಂತೆ ಧರಿಸಿದ್ದ ಪ್ರೆಶರ್‌ ಕುಕ್ಕರ್‌ ಸಮೇತ ಮಗುವನ್ನು ಆಸ್ಪತ್ರೆಗೆ ಕರೆತಂದರು. ಪೋಷಕರು ಹೇಳಿದ ಪ್ರಕಾರ ಮಗು ಆಟವಾಡುವ ಸಂದರ್ಭ ಕುಕ್ಕರ್‌ಅನ್ನು ತಲೆ ಮೇಲೆ ಧರಿಸಿದ ಪರಿಣಾಮ ಹೊರಗೆ ತೆಗೆಯಲಾಗದೆ ಸಿಕ್ಕಿ ಹಾಕಿಕೊಂಡಿದೆ ಎಂದು ಆಸ್ಪತ್ರೆಯ ಆಡಳಿತ ಮಂಡಳಿಯ ಅಧಿಕಾರಿ ಪ್ರಿಯಾಂಶಿ ವಾಲಾ ಮಾಹಿತಿ ನೀಡಿದರು.
ಕಟ್ಟರ್‌ ಸಹಾಯದಿಂದ ಕುಕ್ಕರ್‌ ಪಾತ್ರೆಯನ್ನು ತುಂಡು ಮಾಡಿ ಸಿಕ್ಕಿಕೊಂಡ ಮಗುವಿನ ತಲೆಗೆ ಬಿಡುಗಡೆ ನೀಡಲಾಯಿತು.
ತಲೆಯಿಂದ ಕುಕ್ಕರ್‌ಅನ್ನು ಬಿಡಿಸಲು ಸಾಕಷ್ಟು ಎಳೆದಾಡಿ ಪ್ರಯತ್ನ ಪಟ್ಟಿರುವುದರಿಂದ ಮಗುವಿನ ತಲೆಯಲ್ಲಿ ಸಣ್ಣಪುಟ್ಟ ಗಾಯಗಳಾಗಿವೆ. ಸ್ವಲ್ಪ ಮಟ್ಟಿಗೆ ಊದಿಕೊಂಡಿದೆ. ಪರಿಸ್ಥಿತಿಯ ಸೂಕ್ಷ್ಮತೆಯನ್ನು ಅರಿತ ವೈದ್ಯರು ಪಾತ್ರೆ ರಿಪೇರಿ ಮಾಡುವವರನ್ನು ಸಂಪರ್ಕಿಸಿದರು. ಅತ್ಯಂತ ಜಾಗರೂಕತೆಯಿಂದ ಕುಕ್ಕರ್‌ಅನ್ನು ಕಟ್ಟರ್‌ನಿಂದ ತುಂಡುಮಾಡುವ ಮೂಲಕ ಮಗುವಿಗೆ ಪ್ರೆಶರ್‌ ಕುಕ್ಕರ್‌ನಿಂದ ಬಿಡುಗಡೆ ನೀಡಿದ್ದಾರೆ.
ಮನೆಯಲ್ಲಿ ಪೋಷಕರು ತಲೆಗೆ ಸಿಕ್ಕಿಕೊಂಡ ಕುಕ್ಕರ್‌ ತೆಗೆಯಲು ಹಲವು ಪ್ರಯತ್ನ ನಡೆಸಿದ್ದರಿಂದ ರಕ್ತ ಪರಿಚಲನೆಗೆ ಸಮಸ್ಯೆಯಾಗಿದೆಯೇ? ಬೆನ್ನು ಮೂಳೆಗೆ ತೊಂದರೆಯಾಗಿದೆಯೇ ಎಂಬುದನ್ನು ವೈದ್ಯರು ಪರಿಶೀಲನೆ ನಡೆಸುತ್ತಿದ್ದಾರೆ. ಪ್ರಾಥಮಿಕವಾಗಿ ಮಗು ಆರೋಗ್ಯಕರವಾಗಿದ್ದು, ಯಾವುದೇ ಸಮಸ್ಯೆ ಕಂಡುಬರದಿದ್ದರೆ ಶನಿವಾರ ಆಸ್ಪತ್ರೆಯಿಂದ ಬಿಡುಗಡೆ ಮಾಡುತ್ತೇವೆ ಎಂದು ಸರ್‌ ಟಿ ಆಸ್ಪತ್ರೆಯ ಅಧಿಕಾರಿ ಹಾರ್ಧಿಕ್‌ ಗಥಾನಿ ತಿಳಿಸಿದ್ದಾರೆ.
Comments are closed.