ಕೊರೋನಾ ಸಮುದಾಯ ಪ್ರಸರಣ ಕುರಿತು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ಸುಳ್ಳು ಹೇಳುತ್ತಿದೆ – ತಜ್ಞರ ಆರೋಪ

ಹೊಸದಿಲ್ಲಿ: ಕೊರೊನಾ ಸೋಂಕು ಪ್ರಸರಣದ ಮಾಹಿತಿ ವಿಚಾರದಲ್ಲಿ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್‌) ಮತ್ತು ತಜ್ಞರ ನಡುವೆ ಜಟಾಪಟಿ ಆರಂಭವಾಗಿದೆ. ದೇಶದಲ್ಲಿ ಸೋಂಕು ಸಮುದಾಯ ಪ್ರಸರಣದ ಹಂತ ತಲುಪಿಲ್ಲವೆಂದು ಐಸಿಎಂಆರ್‌ ಸುಳ್ಳು ಹೇಳುತ್ತಿದೆ ಎಂದು ತಜ್ಞರು ಆರೋಪಿಸಿದ್ದಾರೆ.

ಸೆರೊ-ಸರ್ವೇ ವರದಿ ಆಧರಿಸಿ, ದೇಶದಲ್ಲಿ ಕೊರೊನಾ ಸಾಂಕ್ರಾಮಿಕದ ಸಾಮುದಾಯಿಕ ಪ್ರಸರಣ ಆರಂಭವಾಗಿಲ್ಲ. ಪರಿಸ್ಥಿತಿ ನಿಯಂತ್ರಣದಲ್ಲಿದೆ ಎಂದು ಐಸಿಎಂಆರ್‌ ಶುಕ್ರವಾರ ಹೇಳಿತ್ತು.

‘‘ಈಗಾಗಲೇ ಭಾರತದ ಹಲವು ಸ್ಥಳಗಳಲ್ಲಿ ಕೋವಿಡ್‌-19 ಸಮುದಾಯ ಪ್ರಸರಣ ಶುರುವಾಗಿದೆ. ಆದರೆ ಐಸಿಎಂಆರ್‌ ಮಾತ್ರ ವಾಸ್ತವದಿಂದ ದೂರವಾದ ವರದಿಗಳನ್ನು ತೋರಿಸುತ್ತಿದೆ. ಅನ್‌ಲಾಕ್‌ ಶುರುವಾಗಿ ವಲಸೆ ಕಾರ್ಮಿಕರು, ಇತರ ಜನರು ಸಂಚಾರ ಆರಂಭಿಸಿದ ಕೂಡಲೇ ಕೊರೊನಾ ಪ್ರಸರಣ ತೀವ್ರತೆ ಪಡೆದುಕೊಂಡಿದೆ,’’ ಎಂದು ಏಮ್ಸ್‌ ಮಾಜಿ ನಿರ್ದೇಶಕ ಡಾ. ಎಂ.ಸಿ.ಮಿಶ್ರಾ ಹೇಳಿದ್ದಾರೆ.

“ಮೊದಲು ಸರಕಾರ ಸತ್ಯ ಒಪ್ಪಿಕೊಳ್ಳುವ ಮನೋಭಾವ ಬೆಳೆಸಿಕೊಳ್ಳಲಿ. ಸಮುದಾಯ ಪ್ರಸರಣ ಆರಂಭವಾಗಿದೆ ಎಂದು ಸರಕಾರ ಹೇಳಿದರೆ ಜನರು ಕೂಡ ಹೆಚ್ಚು ಎಚ್ಚರ ವಹಿಸುತ್ತಾರೆ. ಇನ್ನು ಐಸಿಎಂಆರ್‌ ಮಾಡಿರುವ ಸೆರೊ-ಸರ್ವೇಯಲ್ಲಿ ಸಂಗ್ರಹಿಸಲಾಗಿರುವ 24,400 ಜನರ ಮಾದರಿಗಳು ದೇಶದ ಜನಸಂಖ್ಯೆಗೆ ಹೋಲಿಸಿದರೆ ನಗಣ್ಯ,” ಎಂದು ಅವರು ಹೇಳಿದ್ದಾರೆ.

ವೈರಾಣು ಸಂಶೋಧನಾ ತಜ್ಞ ಶಾಹೀದ್‌ ಜಮೀಲ್‌ ಸಹ, “ಬಹಳ ಹಿಂದೆಯೇ ಭಾರತದಲ್ಲಿ ಸಾಮುದಾಯಿಕ ಕೊರೊನಾ ಪ್ರಸರಣ ಆರಂಭವಾಗಿದೆ. ಆರೋಗ್ಯ ಅಧಿಕಾರಿಗಳು ಮಾತ್ರ ಒಪ್ಪಿಕೊಳ್ಳಲು ತಯಾರಿಲ್ಲ. ಐಸಿಎಂಆರ್‌ ನಡೆಸಿರುವ ಎಸ್‌ಎಆರ್‌ಐ ಅಧ್ಯಯನದಲ್ಲಿ ವಿದೇಶಕ್ಕೆ ತೆರಳದ ಹಾಗೂ ಸೋಂಕಿತರ ಸಂಪರ್ಕಕ್ಕೆ ಬಾರದ 40% ಜನರಿಗೆ ಸೋಂಕಿರುವುದು ದೃಢಪಟ್ಟಿರುವುದು ಪುರಾವೆ ಅಲ್ಲವೇ?’’ ಎಂದು ಪ್ರಶ್ನಿಸಿದ್ದಾರೆ.

10 ದಿನಗಳಲ್ಲಿ ಲಕ್ಷ ಜನರಿಗೆ ಸೋಂಕು

ಕೊರೊನಾ ಸಾಂಕ್ರಾಮಿಕ ಹಾವಳಿಯಿಂದ ತತ್ತರಿಸಿರುವ ವಿಶ್ವದ ಅಗ್ರ ಐದು ರಾಷ್ಟ್ರಗಳ ಪೈಕಿ 4ನೇ ಸ್ಥಾನ ತಲುಪಿರುವ ಭಾರತದಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ 2 ಲಕ್ಷ ದಿಂದ 3 ಲಕ್ಷದ ಗಡಿ ಮುಟ್ಟಲು ಕೇವಲ 10 ದಿನಗಳನ್ನು ತೆಗೆದುಕೊಂಡಿದೆ. ದೇಶದಲ್ಲಿ ಸೋಂಕು ಪತ್ತೆಯಾದ ಆರಂಭದ ದಿನಗಳಲ್ಲಿ ಸೋಂಕಿತರ ಸಂಖ್ಯೆ ಒಂದು ಲಕ್ಷ ತಲುಪಲು 64 ದಿನ ಬೇಕಾಯಿತು. ಮುಂದಿನ 15 ದಿನಗಳಲ್ಲಿ ಆ ಸಂಖ್ಯೆ 2 ಲಕ್ಷ ದಾಟಿತು. ಈಗ ಹತ್ತು ದಿನಗಳಲ್ಲಿ ಒಂದು ಲಕ್ಷ ಸೋಂಕಿತರು ಪತ್ತೆಯಾಗಿದ್ದಾರೆ. ದೇಶದಲ್ಲಿ ಕೊರೊನಾ ಪ್ರಸರಣ ವೇಗ ಪಡೆದುಕೊಂಡಿದೆ ಎನ್ನುವುದು ಇದರಿಂದಲೇ ಸಾಬೀತಾಗುತ್ತದೆ ಎಂದು ಆರೋಗ್ಯ ಕ್ಷೇತ್ರದ ವಿಜ್ಞಾನಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ.

ಆದರೆ ಕೇಂದ್ರ ಆರೋಗ್ಯ ಸಚಿವಾಲಯವು, ‘‘ಸೋಂಕಿತರ ಸಂಖ್ಯೆ ದ್ವಿಗುಣಗೊಳ್ಳುವ ದಿನಗಳು 15.4 ರಿಂದ 17.4ಕ್ಕೆ ಏರಿಕೆಯಾಗಿದೆ. ಗುಣಮುಖರಾಗುವವರ ಪ್ರಯಾಣವೂ ಶೇ.49.9ಕ್ಕೆ ಏರಿಕೆಯಾಗಿದೆ,” ಎಂದು ತಿಳಿಸಿದೆ. ದೇಶದಲ್ಲಿ ಪುರುಷರಿಗಿಂತ ಮಹಿಳೆಯರೇ ಹೆಚ್ಚಿನ ಸಂಖ್ಯೆಯಲ್ಲಿ ಕೊರೊನಾ ಸೋಂಕಿಗೆ ಬಲಿಯಾಗುತ್ತಿದ್ದಾರೆ ಎಂದು ಇನ್‌ಸ್ಟಿಟ್ಯೂಟ್‌ ಆಫ್‌ ಎಕನಾಮಿಕ್‌ ಗ್ರೋಥ್‌ ನಡೆಸಿದ ಅಧ್ಯಯನ ತಿಳಿಸಿದೆ.

ವೈರಾಣು ರೂಪಾಂತರ

ಕೋವಿಡ್‌-19 ವೈರಾಣು ಹಲವು ರಾಷ್ಟ್ರಗಳಲ್ಲಿ ತನ್ನ ರಚನೆಯನ್ನು ಬದಲಾಯಿಸಿಕೊಂಡು ಈಗ ಸ್ಥಿರತೆ ಕಾಯ್ದುಕೊಂಡಿರುವುದರಿಂದಲೇ ಮತ್ತಷ್ಟು ಅಪಾಯಕಾರಿಯಾಗಿದೆ ಎಂದು ಅಮೆರಿಕದ ಸ್ಕ್ರಿಪ್ಪ್ಸ್‌ ಸಂಶೋಧನಾ ಸಂಸ್ಥೆ ಎಚ್ಚರಿಸಿದೆ.

ಹಿರಿಯ ಸಚಿವರ ಜತೆ ಪ್ರಧಾನಿ ಸಭೆ

ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಗೃಹ ಸಚಿವ ಅಮಿತ್‌ ಶಾ, ಆರೋಗ್ಯ ಸಚಿವ ಡಾ.ಹರ್ಷವರ್ಧನ್‌ ಜತೆ ಸಭೆ ನಡೆಸಿ ದೇಶದಲ್ಲಿ ಕೊರೊನಾ ಸ್ಥಿತಿಗತಿ ಕುರಿತು ಮಾಹಿತಿ ಪಡೆದರು. ಮುಂಗಾರು ಸಹ ಚುರುಕುಗೊಳ್ಳುತ್ತಿರುವುದರಿಂದ ಸಾಂಕ್ರಾಮಿಕ ರೋಗಗಳು ಉಲ್ಬಣಗೊಳ್ಳದಂತೆ ಮುನ್ನೆಚ್ಚರಿಕೆ ವಹಿಸಬೇಕು. ಕೊರೊನಾ ತಪಾಸಣೆ ಪ್ರಮಾಣ ಹೆಚ್ಚಿಸಬೇಕು. ಯಾವುದೇ ಪರಿಸ್ಥಿತಿ ಎದುರಾದರೂ ಸಮರ್ಥವಾಗಿ ನಿಭಾಯಿಸಲು ಆಸ್ಪತ್ರೆಗಳನ್ನು ಸಜ್ಜುಗೊಳಿಸಬೇಕು ಎಂದು ಪ್ರಧಾನಿ ನಿರ್ದೇಶನ ನೀಡಿದರು.

ಸಭೆಗೆ ಅಂಕಿ-ಅಂಶಗಳ ಸಮೇತ ಮಾಹಿತಿ ನೀಡಿದ ನೀತಿ ಆಯೋಗದ ಸದಸ್ಯ ವಿನೋದ್‌ ಪಾಲ್‌ ಅವರು, “ದೇಶದಲ್ಲಿ ಕೊರೊನಾ ಸೋಂಕಿನ ಹೆಚ್ಚಳ ಈಗ ಮಧ್ಯಮ ಸ್ಥಿತಿಯಲ್ಲಿದೆ. ಅಂದರೆ ಇನ್ನೂ ಗರಿಷ್ಠ ಮಟ್ಟಕ್ಕೆ ತಲುಪಿಲ್ಲ. ದೇಶದ ಸೋಂಕಿತರ ಪೈಕಿ ಮೂರನೇ ಎರಡರಷ್ಟು ಮಂದಿ ಐದು ರಾಜ್ಯಗಳಲ್ಲಿಯೇ ಇದ್ದಾರೆ, ಅದರಲ್ಲಿಯೂ ಆ ರಾಜ್ಯಗಳ ನಗರ ಪ್ರದೇಶಗಳಲ್ಲಿ ಸೋಂಕಿನ ತೀವ್ರತೆ ಜಾಸ್ತಿ ಇದೆ,’’ ಎಂದು ವಿವರಿಸಿದರು.

ಪ್ರಧಾನಿಯವರು ಜೂನ್‌ 16, 17ರಂದು ಎಲ್ಲ ರಾಜ್ಯಗಳ ಮುಖ್ಯಮಂತ್ರಿಗಳ ಜತೆ ವಿಡಿಯೋ ಕಾನ್ಫರೆನ್ಸ್‌ ನಡೆಸಿ ಮಾಹಿತಿ ಪಡೆಯಲಿದ್ದಾರೆ. ಜೂನ್‌ 16 ರಂದು 21 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶ, 17ರಂದು ಕರ್ನಾಟಕ ಸೇರಿದಂತೆ ಉಳಿದ 15 ರಾಜ್ಯಗಳ ಮುಖ್ಯಮಂತ್ರಿಗಳ ಜತೆ ಸಭೆ ನಡೆಸಲಿದ್ದಾರೆ.