ಹೊಸದಿಲ್ಲಿ: ಕೇರಳದಲ್ಲಿ ಆರ್ಎಸ್ಎಸ್ ಕಾರ್ಯಕರ್ತ ನೆನ್ಮಿನಿ ಆನಂದ್ ಕಗ್ಗೊಲೆಯಾಗಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಚರ್ಚೆಯಾಗುತ್ತಿದೆ.
ಈ ನಡುವೆ ಆನಂದ್ ಕೊಲೆಯ ಬಗ್ಗೆ ಫೇಸ್‌ಬುಕ್‌ನಲ್ಲಿ ಕಾಮೆಂಟ್ ಮಾಡಿರುವ ವಿದ್ಯಾರ್ಥಿಯೊರ್ವನಿಗೆ ಜೀವ ಬೆದರಿಕೆ ಕರೆಗಳು ಬಂದಿವೆ.
ವಿಡಿಯೋ ಕರೆ ಮಾಡಿದ ಧಮಕಿ ಹಾಕಿರುವ ಮೂವರು ವ್ಯಕ್ತಿಗಳು ‘ಎಕೆ-47’ ರೈಫಲ್ ಹಿಡಿದಿರುವುದು ಮತ್ತಷ್ಟು ಆತಂಕಕ್ಕೆ ಕಾರಣವಾಗಿದೆ. ಅಷ್ಟೇ ಅಲ್ಲದೆ ತಾವು ರಾಜಕೀಯ ಪಕ್ಷಕ್ಕೆ ಸಂಬಂಧ ಹೊಂದಿರುವುದಾಗಿ ತಿಳಿಸಿದ್ದಾರೆ.
ವಿದ್ಯಾರ್ಥಿಯೀಗ ಟ್ವೀಟರ್ ಮೂಲಕ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮತ್ತು ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರಿಗೆ ದೂರು ಸಲ್ಲಿಸಿದ್ದಾರೆ. ಇದರಂತೆ ಮೀರತ್ ವಲಯದ ಐಜಿ ತನಿಖೆಯನ್ನು ಆರಂಭಿಸಿದ್ದಾರೆ.
ಗ್ರೇಟರ್ ನೋಯ್ಡಾ ಮೂಲದ ವಿದ್ಯಾರ್ಥಿಯಾಗಿರುವ ಅಮಿತ್ ಸಿಂಗ್, ಆರ್ಎಸ್ಎಸ್ ಕಾರ್ಯಕರ್ತನ ಕೊಲೆ ಸಂಬಂಧ ಫೇಸ್‌ಬುಕ್‌ನಲ್ಲಿ ಬರೆದ ಖಂಡನೆಯ ಕಾಮೆಂಟ್‌ನಲ್ಲಿ ‘ಕಮ್ಯೂನಿಸಂ’ ಮತ್ತು ‘ಜಿಹಾದ್’ ಎಂದು ಉಲ್ಲೇಖಿಸಿದ್ದರು.
ಇದಾದ ಬೆನ್ನಲ್ಲೇ ವಿಡಿಯೋ ಕರೆಯಲ್ಲಿ ಬೆದರಿಕೆ ಎದುರಾಗಿತ್ತು. ಎಂಡಿ ಐಮಾನ್ ಎಂಬ ವ್ಯಕ್ತಿ ತಮಗೆ ಕರೆ ಮಾಡಿ ಕೊಲೆ ಮಾಡುವುದಾಗಿ ಧಮಕಿ ಒಡ್ಡಿರುವುದಾಗಿ ತಿಳಿಸಿದ್ದಾರೆ. ಕರೆ ಮಾಡಿದ ವ್ಯಕ್ತಿಗಳು ತಮ್ಮನ್ನು ತಾವು ಆಲ್ ಇಂಡಿಯಾ ಮಜ್ಲಿಸ್ ಇಥೆಹಾದುಲ್ ಮುಸ್ಲಿಂ ಸಂಘಟನೆಯ ಕಾರ್ಯಕರ್ತರೆಂದು ಹೇಳಿಕೊಂಡಿದ್ದಾರೆ.
ಕರೆ ಮಾಡಿದವರ ಸ್ಥಳ ಬೆಂಗಳೂರು ಎಂದು ಗುರುತಿಸಲಾಗಿದೆ. ಆರೋಪಿಗಳ ಸಾಮಾಜಿಕ ಐಡಿ ಅಸಲಿಯೇ ಅಥವಾ ನಕಲಿಯೇ ಎಂಬುದು ಅಸ್ಪಷ್ಟವಾಗಿದೆ.
Comments are closed.