ಹೊಸದಿಲ್ಲಿ: ‘ನೀನು ಈ ರೀತಿ ಯಾಕೆ ಹೇಳುತ್ತಿದ್ದೀಯಾ?..ನೀನು ಇರಾನ್‌ನ ಯಾವ ಭಾಗದಲ್ಲಿ ವ್ಯಾಪಾರ ಮಾಡುತ್ತಿದ್ದೇ?….ನಿನ್ನ ಬಂಧನವಾಗಿದ್ದು ಎಲ್ಲಿ?….ಎಲ್ಲವನ್ನು ಸತ್ಯ ಹೇಳು’ ಎಂದು ಅವಂತಿ ಜಾಧವ್ ಅವರು ತಮ್ಮ ಪುತ್ರ ಕುಲಭೂಷನ್ ಜಾಧವ್ ಅವರನ್ನು ಸಿಟ್ಟಿನಿಂದ ಪ್ರಶ್ನಿಸಿದ್ದರು.
ಪಾಕ್ ವಿರುದ್ಧ ಗೂಢಚಾರಿಕೆ ನಡೆಸಿದ್ದು, ಭಯೋತ್ಪಾದಕ ಕೆಲಸದಲ್ಲಿ ತೊಡಗಿಸಿಕೊಂಡಿರುವುದು ನಿಜ ಎಂದು ಒಪ್ಪಿರುವಂತೆ ಪಾಕಿಸ್ತಾನವು ಬರೆದುಕೊಟ್ಟಿದ್ದನ್ನು ಜಾಧವ್ ಅವರು ತಾಯಿ ಮತ್ತು ಪತ್ನಿಯ ಮುಂದೆ ಹೇಳಿದ್ದರು. ಆಗ ತಾಯಿ ಅದನ್ನು ಪ್ರಶ್ನಿಸಿ ನಿಜ ಹೇಳು, ಯಾರೋ ಬರೆದುಕೊಟ್ಟ ಗಿಣಿ ಪಾಠ ಒಪ್ಪಿಸಬೇಡ ಎಂದು ಹೇಳಿದ್ದರು. ಜಾಧವ್ ತಾಯಿ ಮತ್ತು ಪತ್ನಿಯ ಮುಂದೆ ತಪ್ಪು ಒಪ್ಪಿಕೊಂಡಿರುವುದನ್ನು ದಾಖಲೆಯಾಗಿ ಮಾಡಿಕೊಳ್ಳುವುದು ಪಾಕ್ ಅಧಿಕಾರಿಗಳ ತಂತ್ರವಾಗಿತ್ತು. ಆದರೆ ಜಾಧವ್ ತಾಯಿ ಪ್ರಶ್ನಿಸುವ ಮೂಲಕ ಅದಕ್ಕೆ ಅವಕಾಶ ಕೊಡಲಿಲ್ಲ.
ಭಾರತದ ನೌಕಾಪಡೆಯ ಮಾಜಿ ಅಧಿಕಾರಿ, ಪಾಕಿಸ್ತಾನದ ಸೇನಾ ನ್ಯಾಯಾಲಯವು ಗಲ್ಲು ಶಿಕ್ಷೆ ವಿಧಿಸಿರುವ ಕುಲಭೂಷಣ್ ಜಾಧವ್ ಅವರನ್ನು ತಾಯಿ ಅವಂತಿ ಮತ್ತು ಪತ್ನಿ ಚೇತನಾ ಅವರು ಸೋಮವಾರ ಭೇಟಿಯಾಗಿದ್ದರು. ಜಾಧವ್ ಅವರು ತಾಯಿ ಹಾಗೂ ಪತ್ನಿಯನ್ನು ವಿಸ್ಮಯದಿಂದಲೇ ಸ್ವಾಗತಿಸಿದರು. ಪಾಕ್ ಸರಕಾರ ಸಲ್ಲಿಸಿರುವ ಚಾರ್ಜ್ ಶೀಟ್‌ನ ವಿವರಗಳನ್ನು ತಾಯಿ ಹಾಗೂ ಪತ್ನಿಯ ಮುಂದೆ ಪುನರುಚ್ಛರಿಸಿದರು.
ಜಾಧವ್ ಬಂಧನದ 22 ತಿಂಗಳ ಬಳಿಕ ಕುಟುಂಬ ಸದಸ್ಯರ ಭೇಟಿಗೆ ಪಾಕ್ ಸರಕಾರ ಅವಕಾಶ ಕಲ್ಪಿಸಿತ್ತು. ಇಸ್ಲಾಮಾಬಾದ್‌ನಲ್ಲಿರುವ ಪಾಕಿಸ್ತಾನ ವಿದೇಶಾಂಗ ಸಚಿವಾಲಯದ ಕಚೇರಿಯಲ್ಲಿ ಬೀಗಿ ಭದ್ರತೆಯ ನಡುವೆ ಪತ್ನಿ ಚೇತನ್ ಹಾಗೂ ತಾಯಿ ಅವಂತಿ ಅವರು ಕುಲಭೂಷನ್ ಜಾಧವ್ ಅವರನ್ನು ಭೇಟಿಯಾದರು. ಈ ವೇಳೆ ಜಾಧವ್ ಭಾವುಕರಾಗಿದ್ದರು.
ಬಿಗಿ ಭದ್ರತೆಯ ನಡುವೆಯೂ ತಾಯಿ ಅವಂತಿಯವರು ಪುತ್ರನ ಜತೆ ಧೈರ್ಯದಿಂದಲೇ ಮಾತನಾಡಿದರು. ಆದರೆ ಮಗನ ಜತೆ ಮಾತುಕತೆ ಹೊರತಾಗಿ ಮಾಧ್ಯಮದವರು ಮಾತನಾಡಿಸಲು ಮುಂದಾದಾಗ ಸೊಪ್ಪು ಹಾಕದೆ ಜಾಧವ್ ಅವರ ತಾಯಿ ಪಾಕಿಸ್ತಾನದ ಕುತಂತ್ರವನ್ನು ವಿಫಲಗೊಳಿಸಿದರು.
ಭಾರತದ ಪರ ಗೂಢಚರ್ಯೆ ನಡೆಸುತ್ತಿದ್ದ ಆರೋಪದಲ್ಲಿ ಬಂಧನಕ್ಕೊಳಗಾಗಿದ್ದ, ಕುಲಭೂಷಣ್ ಜಾಧವ್ ಅವರಿಗೆ ಪಾಕಿಸ್ತಾನ ಕೋರ್ಟ್ ಮರಣದಂಡನೆ ಶಿಕ್ಷೆ ಪ್ರಕಟಿಸಿದೆ. ಭಾರತವು ಅಂತಾರಾಷ್ಟ್ರೀಯ ನ್ಯಾಯಾಲಯದಕ್ಕೆ ಮೊರೆ ಹೋದ ಬಳಿಕ ಅಂತಾರಾಷ್ಟ್ರೀಯ ನ್ಯಾಯಾಲಯವು ಗಲ್ಲು ಶಿಕ್ಷೆ ಜಾರಿಗೊಳಿಸದಂತೆ ತಡೆ ನೀಡಿದೆ.
Comments are closed.