10 ದಿನ ರಜೆ ಪಡೆಯದಿದ್ದರೆ ಪತ್ನಿ ನನ್ನನ್ನು ತೊರೆದು ಹೋಗುತ್ತಾಳೆ: ಪೊಲೀಸಪ್ಪನ ರಜೆ ಅರ್ಜಿ

ಮೀಸಲು ಪೊಲೀಸ್ ಪೇದೆಯೊಬ್ಬರು ಸಲ್ಲಿಸಿರುವ ರಜಾ ಅರ್ಜಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಹರಿದಾಡುತ್ತಿದೆ. ಅಷ್ಟಕ್ಕೂ ಅಂತಹ ವಿಶೇಷವೇನಿದೆ ಆ ಅರ್ಜಿಯಲ್ಲಿ?

ನಾನು 10 ದಿನ ರಜೆ ಪಡೆಯದಿದ್ದರೆ ಪತ್ನಿ ನನ್ನನ್ನು ತೊರೆದು ಹೋಗುತ್ತಾಳೆ ಎಂದು ಪೇದೆ ಧರ್ಮೇಂದ್ರ ಯಾದವ್ ರಜಾ ಅರ್ಜಿಯಲ್ಲಿ ಬರೆದಿದ್ದ. ಆತನ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಿದ ಮೇಲಾಧಿಕಾರಿ ರಾಣಾ ಮಹೇಂದ್ರ ಪ್ರತಾಪ್ ಆತ ಕೇಳಿದಷ್ಟು ದಿನ ರಜೆ ಮಂಜೂರು ಮಾಡಿದ್ದಾರೆ.

ಕಳೆದ ಹಲವು ತಿಂಗಳಿಂದ ಆತ ರಜೆಗಾಗಿ ಮನವಿ ಮಾಡುತ್ತಲೇ ಇದ್ದ. ಆದರೆ ರಜೆ ಮಂಜೂರಾಗುತ್ತಿರಲಿಲ್ಲ. ಇದರಿಂದ ಸಿಟ್ಟಿಗೆದ್ದ ಆತನ ಪತ್ನಿ ಕಳೆದ ನಾಲ್ಕು ತಿಂಗಳಿಂದ ನನ್ನನ್ನು ಭೇಟಿಯಾಗಲು ಬಂದೇ ಇಲ್ಲ. ಇಷ್ಟು ದಿನ ದೂರವಿರುತ್ತಿರೆಂದರೆ ನನ್ನನ್ನು ಮದುವೆಯಾಗಿದ್ದಾದರೂ ಏಕೆ ಎಂದು ಫೋನ್‌ನಲ್ಲಿ ಕಿಡಿಕಾರಿದ್ದಳು. ಪತ್ನಿಯ ಫೋನ್ ಕರೆ ಬಳಿಕ ವಿಚಲಿತನಾದ ಪೇದೆ ಶುಕ್ರವಾರ ತನ್ನ ಮೇಲಾಧಿಕಾರಿಗೆ ತುರ್ತು ರಜೆ ನೀಡುವಂತೆ ಅರ್ಜಿ ಸಲ್ಲಿಸಿದ್ದಾನೆ.

ಕಳೆದ ನಾಲ್ಕು ತಿಂಗಳಿಂದ ಪತ್ನಿಗೆ ಮುಖವನ್ನೇ ತೋರಿಸಿಲ್ಲ. ಇದರಿಂದ ಸಿಟ್ಟಿಗೆದ್ದಿರುವ ಆಕೆ ನನ್ನನ್ನು ತ್ಯಜಿಸಿ ಹೋಗುವ ಬೆದರಿಕೆ ಒಡ್ಡುತ್ತಿದ್ದಾಳೆ. ದಯವಿಟ್ಟು 10 ದಿನಗಳ ರಜೆ ನೀಡಿ ಎಂದು ಪ್ರಧಾನ್ ಮನವಿ ಮಾಡಿದ್ದ. ಆತ ನೀಡಿದ ಕಾರಣ ಅತ್ಯಂತ ಗಂಭೀರವೆಂದು ಪರಿಗಣಿಸಿ ತಕ್ಷಣಕ್ಕೆ 10 ದಿನಗಳ ರಜೆಯನ್ನು ಮಂಜೂರು ಮಾಡಿ ಮನೆಗೆ ಕಳುಹಿಸಲಾಗಿದೆ, ಎಂದು ಮಹೇಂದ್ರ ಪ್ರತಾಪ್ ಹೇಳಿದ್ದಾರೆ.

ಪೊಲೀಸ್ ಇಲಾಖೆಯಲ್ಲಿದ್ದವರಿಗೆ ರಜೆ ಸಿಗುವುದು ಎಷ್ಟು ದುಸ್ತರ ಎಂಬುದು ಪ್ರಧಾನ್ ಪತ್ರದಿಂದಲೇ ಸ್ಪಷ್ಟವಾಗುತ್ತದೆ.