ಅತ್ಯಾಚಾರ ಸಂತ್ರಸ್ತೆಯ ದೊಡ್ಡಪ್ಪನನ್ನು ಗುಂಡಿಕ್ಕಿ ಕೊಂದ ಅತ್ಯಾಚಾರಿ

ಹೊಸದಿಲ್ಲಿ: ತನ್ನ ವಿರುದ್ಧ ದಾಖಲಿಸಲಾಗಿದ್ದ ಅತ್ಯಾಚಾರ ಪ್ರಕರಣವನ್ನು ಹಿಂಪಡೆಯದಿದ್ದಕ್ಕೆ ಕೆರಳಿದ ಅತ್ಯಾಚಾರಿ ಆರೋಪಿ ಸಂತ್ರಸ್ತೆಯ ದೊಡ್ಡಪ್ಪನನ್ನು ಗುಂಡಿಕ್ಕಿ ಕೊಂದ ಬೆಚ್ಚಿ ಬೀಳಿಸುವ ಘಟನೆ ನವದೆಹಲಿಯಲ್ಲಿ ನಡೆದಿದೆ.

ಘಟನೆ ವಿವರ: 23 ವರ್ಷದ ಪರವಿಂದರ್ ಎಂಬಾತ ಹದಿಹರೆಯದ ಯುವತಿಯೊಬ್ಬಳ ಮೇಲೆ ಅತ್ಯಾಚಾರ ಎಸಗಿ ಜೈಲು ಪಾಲಾಗಿದ್ದ. ತನ್ನ ವಿರುದ್ಧದ ಪ್ರಕರಣವನ್ನು ಹಿಂಪಡೆಯುವಂತೆ ಆತ ಮತ್ತು ಆತನ ಕಡೆಯವರು ಸಂತ್ರಸ್ತೆಯ ಪರಿವಾರದವರ ಮೇಲೆ ಒತ್ತಡ ಹೇರುತ್ತಿದ್ದರು. ಆದರೆ ಅದಕ್ಕವರು ಸುತಾರಾಂ ಒಪ್ಪಿರಲಿಲ್ಲ.

ಇತ್ತೀಚಿಗೆ ಜಾಮೀನು ಪಡೆದು ಜೈಲಿನಿಂದ ಹೊರ ಬಂದ ಪರವಿಂದರ್ ಪ್ರಕರಣ ಒಪ್ಪಿಕೊಳ್ಳದಿದ್ದಕ್ಕೆ ಪ್ರತೀಕಾರ ತೆಗೆದುಕೊಳ್ಳುವ ಉದ್ದೇಶದಿಂದ ಸಂತ್ರಸ್ತೆಯ ಕುಟುಂಬದ ಯಜಮಾನನ್ನು ಕೊಲ್ಲುವ ಸಂಚು ರೂಪಿಸಿದ. ಮೇ 29ರಂದು ತನ್ನ ಟೈಯರ್ ಶೋರೂಮ್ ಕಡೆ ಕಾರಿನಲ್ಲಿ ಸಾಗುತ್ತಿದ್ದ ಸಂತ್ರಸ್ತೆಯ ದೊಡ್ಡಪ್ಪನನ್ನು ಅಪಹರಿಸಿದ ಪರವಿಂದರ್ ಮತ್ತು ಸ್ನೇಹಿತರು ಗುಂಡಿಕ್ಕಿ ಕೊಂದು ಕೃಷ್ಣನ್‌ಪುರ್- ಪೀಪ್ಲಿ ರಸ್ತೆ ಪಕ್ಕ ಎಸೆದಿದ್ದಾರೆ.

ಬಲಿಪಶುವಿನ ನೆರೆಮನೆಯ ನಿವಾಸಿಯೊಬ್ಬ ಅಪಹರಣದ ದೃಶ್ಯವನ್ನು ನೋಡಿ ಮನೆಯವರಿಗೆ ವಿಷಯ ತಿಳಿಸಿದ್ದ. ವಿಷಯ ಪೊಲೀಸರಿಗೆ ಗೊತ್ತಾಗುವಷ್ಟರಲ್ಲಿ ಹತ್ಯೆಯಾಗಿ ಹೋಗಿತ್ತು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಮುಖ್ಯ ಆರೋಪಿ ಪರವಿನ್ ಆತನ ಸ್ನೇಹಿತ ವಿಕ್ಕಿ (20) ಮತ್ತು ಮತ್ತೊಬ್ಬ ಬಾಲಾಪರಾಧಿಯನ್ನು ಪೊಲೀಸರು ಬಂಧಿಸಿದ್ದಾರೆ.