ಮಂಗನ ಜೀವ ಉಳಿಸಲು ರಾತ್ರಿಯಿಡೀ ಹೆಣಗಾಡಿದ ಗ್ರಾಮಸ್ಥರು

ಹೂಗ್ಲಿ: ನಾಯಿ ದಾಳಿಗೆ ತುತ್ತಾಗಿದ್ದ ಕೋತಿಯ ಪ್ರಾಣ ಉಳಿಸಲು ಗ್ರಾಮಸ್ಥರು ರಾತ್ರಿಯಿಡೀ ಹೆಣಗಾಡಿದ ಘಟನೆ ಪಶ್ಚಿಮ ಬಂಗಾಳದ ತಾರಕೇಶ್ವರದಲ್ಲಿ ನಡೆದಿದೆ.

ಭಾನುವಾರ ರಾತ್ರಿ ನಾಯಿಗಳ ಬಾಯಿಗೆ ತುತ್ತಾಗಿದ್ದ ಕೋತಿ, ಬಳಿಕ ತಾರಕೇಶ್ವರ ಗ್ರಾಮಕ್ಕೆ ಬಂದಿದೆ. ಸ್ಥಳೀಯರಲ್ಲಿ ಸಹಾಯಕ್ಕಾಗಿ ಕೂಗಿದೆ. ಇದನ್ನು ಗಮನಿಸಿದ ಗ್ರಾಮಸ್ಥರು, ಕೋತಿಯ ಸಹಾಯಕ್ಕಾಗಿ ಧಾವಿಸಿದ್ದಾರೆ.

ಭಾನುವಾರದ ಹಿನ್ನೆಲೆಯಲ್ಲಿ ತಾರಕೇಶ್ವರದ ಸರಕಾರಿ ಪಶುವೈದ್ಯಕೀಯ ಸೇವೆ ಲಭ್ಯವಾಗದೇ ಇದ್ದುದರಿಂದ, ಗ್ರಾಮದಲ್ಲಿದ್ದ ಪಶುವೈದ್ಯರೊಬ್ಬರು, ಪ್ರಥಮ ಚಿಕಿತ್ಸೆ ನೀಡಿದ್ದಾರೆ. ತೀವ್ರ ಗಾಯಗಳಾಗಿದ್ದ ಹಿನ್ನೆಲೆಯಲ್ಲಿ ಕೋತಿಯ ಆರೋಗ್ಯ ಸ್ಥಿತಿ ವಿಷಮಿಸಿದ್ದು, ಸೋಮವಾರ ಬೆಳಗ್ಗೆ ಕೋತಿ ಕೊನೆಯುಸಿರೆಳೆದಿದೆ.

ಭಾನುವಾರದಂದು ಪಶು ವೈದ್ಯಕೀಯ ಆಸ್ಪತ್ರೆ ತೆರೆಯದೇ ಇದ್ದುದರಿಂದ ಮೂಕಪ್ರಾಣಿಯೊಂದು ಜೀವ ಕಳೆದುಕೊಂಡಿದೆ ಎಂದು ಸ್ಥಳೀಯರು ಮರುಗಿದ್ದಾರೆ. ಅಲ್ಲದೆ ಭಾನುವಾರ ರಾತ್ರಿ ಇಡೀ ಆರೈಕೆ ಮಾಡಿದ್ದಾಗಿಯೂ ಕೋತಿ ಜೀವ ಉಳಿಸಲು ಸಾಧ್ಯವಾಗಿಲ್ಲ ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸಿದ್ದಾರೆ.