ನವದೆಹಲಿ: ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಮದುವೆ ವದಂತಿ ಸಂಬಂಧ ಟ್ವಿಟರ್ನಲ್ಲಿ ಪ್ರತಿಕ್ರಿಯೆ ನೀಡಿರುವ ಪ್ರಿಯಾಂಕ ಗಾಂಧಿ ಪತಿ ರಾಬರ್ಟ್ ವಾದ್ರ ಅವರು ರಾಹುಲ್ ಅವರು ಸದ್ಯ ಮದುವೆಯಾಗುತ್ತಿಲ್ಲ ಎಂದು ಖಚಿತಪಡಿಸಿದ್ದಾರೆ.
ನ್ಯೂಸ್ ವೆಬ್ಸೈಟ್ ಒಂದರಲ್ಲಿ ರಾಹಲ್ ಗಾಂಧಿ ಅವರು ಈ ವರ್ಷದ ಕೊನೆಯಲ್ಲಿ ಮದುವೆಯಾಗಲಿದ್ದಾರೆ ಎಂಬ ಲೇಖನ ಪ್ರಕಟವಾದ ಬೆನ್ನಲ್ಲೆ ಬುಧವಾರ ತಮ್ಮ ಟ್ವಿಟರ್ ಖಾತೆ ಮೂಲಕ ಪ್ರತಿಕ್ರಿಯೇ ನೀಡಿರುವ ವಾದ್ರ ಅದೊಂದು ಸುಳ್ಳು ಸುದ್ದಿ ಎಂದು ತಿಳಿಸಿದ್ದಾರೆ. ಅಲ್ಲದೆ, ರಾಹುಲ್ ಅವರಿಗೆ ಮದುವೆ ಶುಭಾಶಯಗಳು ಬರುತ್ತಿರುವ ಹಿನ್ನೆಲೆ ಇಂತಹ ಸಂದೇಶಗಳನ್ನು ನಿಲ್ಲಿಸಿ ಎಂದು ಜನರಲ್ಲಿ ಮನವಿ ಮಾಡಿದ್ದಾರೆ.
ಮದುವೆ ವಿಚಾರದಲ್ಲಿ ನಾವು ಯಾವುದೇ ಗೌಪ್ಯತೆಯ ದಾರಿ ಹಿಡಿದಿಲ್ಲ. ಒಂದು ವೇಳೆ ರಾಹುಲ್ ಅವರು ಮದುವೆಯಾಗುವುದಾಗಿ ತಮ್ಮ ವೈಯಕ್ತಿಕ ನಿರ್ಧಾರವನ್ನು ತಿಳಿಸಿದರೆ ನಾವು ಹೆಮ್ಮೆಯಿಂದಲೇ ಅದನ್ನು ಬಹಿರಂಗಪಡಿಸುತ್ತೇವೆ ಎಂದು ಹೇಳಿದ್ದಾರೆ.
ರಾಹುಲ್ ಗಾಂಧಿಯೊಂದಿಗೆ ಕಾಂಗ್ರೆಸ್ ಶಾಸಕಿ ಆದಿತಿ ಸಿಂಗ್ ತೆಗೆಸಿಕೊಂಡಿದ್ದ ಫೋಟೋ ವೈರಲ್ ಆದ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ರಾಹುಲ್ ಮತ್ತು ಆದಿತಿ ಸಿಂಗ್ ಅವರು ಮದುವೆಯಾಗಲಿದ್ದಾರೆ ಎಂಬ ವದಂತಿ ಹಬ್ಬ ತೊಡಗಿತ್ತು.
ಈ ಸುದ್ದಿ ಎಲ್ಲಡೆ ಹರಿದಾಡುತ್ತಿದ್ದಂತೆ ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ರಾಯ್ಬರೇಲಿ ಶಾಸಕಿ ಆದಿತಿ ಸಿಂಗ್ ಈ ರೀತಿಯ ತಳಬುಡವಿಲ್ಲದ ವದಂತಿಯಿಂದ ನನಗೆ ದುಃಖವಾಗಿದೆ. ರಾಹುಲ್ ಜಿ ಅವರು ನನಗೆ ಹಿರಿಯ ಅಣ್ಣನಿದ್ದಂತೆ. ನಾನು ಧಾರ್ಮಿಕವಾಗಿ ಅವರ ಕೈಗೆ ರಕ್ಷಾ ಬಂಧನವನ್ನು ಕಟ್ಟಿದ್ದೇನೆ. ಈ ವದಂತಿ ಹಿಂದೆ ಯಾರಿದ್ದಾರೋ ಅವರು ನನಗೂ ಹಾಗೂ ರಾಹುಲ್ ಜಿ ಅವರ ವ್ಯಕ್ತಿತ್ವಕ್ಕೂ ಕೆಡುಕು ತರುವ ತಪ್ಪು ದಾರಿಯಲ್ಲಿ ಹೋಗುತ್ತಿದ್ದಾರೆ ಎಂದು ಅಸಮಾಧಾನ ಹೊರಹಾಕಿದ್ದರು.
Comments are closed.