ಮುಸ್ಲಿಂ ಶಾಸಕನಿಗೆ ಇನ್ನು 15 ದಿನದಲ್ಲಿ ಬಿಜೆಪಿ ತ್ಯಜಿಸಲು ಬೆದರಿಕೆ ಪತ್ರದ ಜೊತೆ 2 ಸಜೀವ ಗುಂಡು!

ಗುವಾಹತಿ: ಆಸ್ಸಾಂನ ಸೋನಾಯಿ ಕ್ಷೇತ್ರದ ಬಿಜೆಪಿಯ ಮುಸ್ಲಿಂ ಶಾಸಕನಿಗೆ ಇನ್ನು 15 ದಿನಗಳಲ್ಲಿ ಪಕ್ಷವನ್ನು ಬಿಡುವಂತೆ ಬೆದರಿಕೆ ಪತ್ರ ಬಂದಿದ್ದು ಜತೆಗೆ ಎರಡು ಸಜೀವ ಗುಂಡುಗಳನ್ನೂ ಕಳಿಸಲಾಗಿದೆ.

ಈ ಬಗ್ಗೆ ಪೊಲೀಸರಿಗೆ ತಿಳಿಸಿರುವ ಶಾಸಕ ಅಮಿನುಲ್​ ಹಕ್ ಲಸ್ಕರ್, ಪತ್ರದಲ್ಲಿ ಬಿಜೆಪಿ, ಆರ್​ಎಸ್​ಎಸ್​ಗಳನ್ನು ಕೋಮು ಸಂಘಟನೆಗಳೆಂದು ಹೇಳಲಾಗಿದೆ. ಈ ಸಂಘಟನೆಗಳು ಮುಸ್ಲಿಂ ಧರ್ಮದ ವಿರೋಧಿಯಾಗಿವೆ. ನೀವೊಬ್ಬ ಮುಸ್ಲಿಂ ಆಗಿ ಆಗಿ ಬಿಜೆಪಿಯಲ್ಲಿರುವುದು ಬೇಡ. ಹಾಗಾಗಿ ಕೂಡಲೇ ಆ ಪಕ್ಷವನ್ನು ಬಿಡಬೇಕು ಎಂದು ಬೆದರಿಕೆ ಹಾಕಿದ್ದಾರೆ ಎಂದಿದ್ದಾರೆ.

ಪೋಸ್ಟ್​ ಮೂಲಕ ಪತ್ರ ಕಳಿಸಿರುವ ಅಪರಿಚಿತರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಈ ಪತ್ರವು ಬರಾಕ್​ ವ್ಯಾಲಿ ಝೋನ್​ನ ಮುಸ್ಲಿಂ ಸಂರಕ್ಷಣಾ ಮತ್ತು ಅಭಿವೃದ್ಧಿ ಪಡೆ ಹೆಸರಿನಲ್ಲಿ ಅಪರಿಚಿತ ಗುಂಪಿನಿಂದ ಬಂದಿದೆ. ನಾವು ಎಫ್​ಐಆರ್​ ದಾಖಲಿಸಿಕೊಂಡಿದ್ದು ಗುಂಡುಗಳನ್ನು ವಶಪಡಿಸಿಕೊಂಡಿದ್ದೇವೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.