ನಮ್ಮ ದೇಶಕ್ಕೆ ಬರಲಿದೆ ಜಗತ್ತಿನ 7 ಅದ್ಭುತಗಳು

ಹೊಸದಿಲ್ಲಿ: ಜಗತ್ತಿನ 7 ಅದ್ಭುತಗಳನ್ನು ನೀವು ನಿಮ್ಮ ಸಮೀಪದಲ್ಲೇ ನೋಡಬಹುದಾಗಿದೆ. ದಕ್ಷಿಣ ದಿಲ್ಲಿಯ ಪಾಲಿಕೆ ಈ ಅದ್ಭುತಗಳನ್ನು ನಿಮ್ಮ ಮನೆಯ ಬಳಿಗೆ ತರುತ್ತಿದ್ದು, ಪ್ರತಿಕೃತಿಗಳ ಮುಂದೆ ನೀವು ನಿಂತುಕೊಂಡು ಫೋಟೋಗೆ ಪೋಸ್‌ ಕೊಡಬಹುದಾಗಿದೆ. ದಿಲ್ಲಿಯ ಸರೈ ಖೇಲ್‌ ಖಾನ್‌ ಬಳಿಯ ರಾಜೀವ್ ಗಾಂಧಿ ಸ್ಮೃತಿವನದಲ್ಲಿ ತ್ಯಾಜ್ಯದಿಂದ ಮಾಡಿರುವ ಕಲೆಯ ಉಪಕ್ರಮದ ಭಾಗವಾಗಿ ಇದು ತಯಾರಾಗುತ್ತಿದೆ. ದಕ್ಷಿಣ ದಿಲ್ಲಿ ಮಹಾನಗರ ಪಾಲಿಕೆ ( ಎಸ್‌ಡಿಎಂಸಿ ) ಜನವರಿ 2019ರಲ್ಲಿ ಇದಕ್ಕೆ ಚಾಲನೆ ನೀಡಲಿದೆ.

ಈಗಿರುವ ಪಾರ್ಕ್‌ ಅನ್ನು ಜಗತ್ತಿನ 7 ಅದ್ಭುತಗಳ ಪಾರ್ಕ್‌ ಅನ್ನಾಗಿ ಪುನರ್‌ನಿರ್ಮಾಣ ಮಾಡಲಾಗುತ್ತಿದೆ. ಸದ್ಯ, ಈ ಪಾರ್ಕ್‌ ಅನ್ನು ಎರಡು ಭಾಗಗಳಾಗಿ ವಿಂಗಡಿಸಲಾಗಿದ್ದು, ಹಸಿರು ಹುಲ್ಲಿನ ಹಾಸು ಹಾಗೂ 6 ಎಕರೆ ಜಾಗವನ್ನು ದಿಲ್ಲಿಯ ಮೆಟ್ರೋ ಬಳಸಿಕೊಳ್ಳುತ್ತಿದೆ. ಹಸಿರು ಪ್ರದೇಶದ 7 ವಿಭಾಗಗಳಲ್ಲಿ 7 ವಿಶ್ವದ ಅದ್ಭುತ ಸ್ಮಾರಕಗಳಿಗಾಗಿ ಸ್ಥಳಗಳನ್ನು ಮೀಸಲಿಡಲಾಗುತ್ತದೆ. ಸ್ಮಾರಕಗಳ ಪ್ರತಿಕೃತಿಗಳನ್ನು ತ್ಯಾಜ್ಯದ ವಸ್ತುಗಳಿಂದಲೇ ಮಾಡಲಾಗುತ್ತಿದೆ ಎಂದು ದಕ್ಷಿಣ ದಿಲ್ಲಿಯ ಮಹಾನಗರ ಪಾಲಿಕೆ ಕಮಿಷನರ್ ಪುನೀತ್ ಗೋಯೆಲ್ ತಿಳಿಸಿದ್ದಾರೆ.

ಇನ್ನು, ಈ ಪ್ರತಿಕೃತಿಗಳು 15 ಅಡಿಯಿಂದ 60 ಅಡಿಗಳಷ್ಟು ಎತ್ತರವಿರುತ್ತದೆ ಎನ್ನಲಾಗಿದೆ. ಗಿಜಾದ ಗ್ರೇಟ್ ಪಿರಮಿಡ್, ಐಫೆಲ್‌ ಟವರ್, ಲೀನಿಂಗ್ ಟವರ್ ಆಫ್‌ ಪೀಸಾ, ಸ್ಟ್ಯಾಟೂ ಆಫ್ ಲಿಬರ್ಟಿ, ಕ್ರೈಸ್ಟ್ ದಿ ರಿಡೀಮರ್, ಕೊಲೋಸಿಯಂ ಹಾಗೂ ತಾಜ್‌ ಮಹಲ್‌ನ ಪ್ರತಿಕೃತಿಗಳನ್ನು ನಿರ್ಮಾಣ ಮಾಡಲಾಗುತ್ತಿದೆ. ಸುಮಾರು 60 ಅಡಿ ಎತ್ತರದಲ್ಲಿ ಐಫೆಲ್‌ ಟವರ್‌ನ ಪ್ರತಿಕೃತಿಯನ್ನು ಅಂದಾಜು 94 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಿಸಲಾಗುತ್ತಿದೆ. ಇನ್ನು, ಈ 7 ಪ್ರತಿಮೆಗಳಲ್ಲಿ ತಾಜ್‌ ಮಹಲ್‌ಗೆ ಅತಿ ಹೆಚ್ಚು ವೆಚ್ಚ ಮಾಡಲಾಗುತ್ತಿದ್ದು, 1 ಕೋಟಿ ರೂ. 16 ಲಕ್ಷ ವೆಚ್ಚ ಖರ್ಚು ಮಾಡಲಾಗುತ್ತದೆ. ಒಟ್ಟಾರೆ, ಈ ಯೋಜನೆಗೆ 5 ಕೋಟಿ ರೂ. ವೆಚ್ಚ ಮಾಡಲಾಗುತ್ತದೆ ಎಂದು ತಿಳಿದುಬಂದಿದೆ.

ಈ ಪ್ರತಿಕೃತಿಗಳ ನಿರ್ಮಾಣಕ್ಕೆ 110 ಟನ್‌ನಷ್ಟು ತ್ಯಾಜ್ಯ ಬೇಕಿದೆ ಎಂದು ಎಸ್‌ಡಿಎಂಸಿಯ ತೋಟಗಾರಿಕಾ ನಿರ್ದೇಶಕ ಅಲೋಕ್‌ ಕುಮಾರ್ ತಿಳಿಸಿದ್ದಾರೆ. ಈ ಮೊದಲು ಇಟ್ಟಿಗೆಗಳಿಂದ ಸ್ಮಾರಕಗಳ ನಿರ್ಮಾಣಕ್ಕೆ ಯೋಜಿಸಲಾಗಿತ್ತು. ಆದರೆ, ಈಗ ತ್ಯಾಜ್ಯ ಪದಾರ್ಥಗಳಿಂದಲೇ ತಯಾರಾಗಲಿದ್ದು, ಇನ್ನು 6 ತಿಂಗಳಲ್ಲಿ ಈ ಯೋಜನೆ ಅಂತಿಮಗೊಳ್ಳಲಿದೆ. ಇದಕ್ಕಾಗಿ ಟೆಂಟರ್ ಅಂತಿಮಗೊಂಡಿದ್ದು, ಖಾಸಗಿಯವರಿಗೆ ನೀಡಲಿದ್ದೇವೆ ಎಂದು ಕುಮಾರ್ ತಿಳಿಸಿದ್ದಾರೆ. ಅಲ್ಲದೆ, ಈ ಪಾರ್ಕ್‌ನಲ್ಲಿ ಕೆಫೆಟೆರಿಯಾ ಸಹ ಇರಲಿದ್ದು, ಜತೆಗೆ ತೋಟಗಾರಿಕಾ ಇಲಾಖೆಯ ಯೋಜನೆಗಳನ್ನು ಪ್ರದರ್ಶನಕ್ಕೆ ಇಡಲಾಗುತ್ತದೆ. ಅಲ್ಲದೆ, ಜಗತ್ತಿನ 7 ಅದ್ಭುತಗಳ ಪ್ರತಿಕೃತಿಗಳ ಬಳಿ ಕಲ್ಲಿನ ಕಂಬಗಳನ್ನು ಇಡಲಿದ್ದು, ಆ ಸ್ಮಾರಕಗಳ ಬಗ್ಗೆ ಮಾಹಿತಿ ನೀಡಲಾಗುತ್ತದೆ. ತಾಜ್‌ಮಹಲ್‌ ಪ್ರತಿಕೃತಿಗೆ ಹೆಚ್ಚು ಸವಿಸ್ತಾರವಾಗಿ ಇರಲಿದೆ. ಹೀಗಾಗಿ, ಇದಕ್ಕೆ ಹೆಚ್ಚು ವೆಚ್ಚವಾಗಲಿದೆ ಎಂದು ಸಹ ಕುಮಾರ್ ತಿಳಿಸಿದ್ದಾರೆ.

ಆದರೆ, ಸದ್ಯ ಈ ಪಾರ್ಕ್‌ಗೆ ಪ್ರವೇಶ ಶುಲ್ಕ ಉಚಿತವಿದ್ದು, ಇನ್ನು ಮುಂದೆ ತಲಾ 20 ರೂ. ವಿಧಿಸಲು ದಕ್ಷಿಣ ದಿಲ್ಲಿ ಮಹಾನಗರ ಪಾಲಿಕೆ ಯೋಜಿಸಿದೆ. ರಾಜಸ್ಥಾನದ ಕೋಟಾದಲ್ಲೂ ಇದೇ ರೀತಿಯ ಪಾರ್ಕ್ ಇದ್ದು, ಇದಕ್ಕೆ 20 ಕೋಟಿ ರೂ. ವೆಚ್ಚ ಮಾಡಲಾಗಿತ್ತು. ಇದು ಸದ್ಯ, ಪ್ರವಾಸಿಗರ ನೆಚ್ಚಿನ ತಾಣವಾಗಿದೆ. ಹೀಗಾಗಿ, ಇದೇ ಕಲ್ಪನೆಯನ್ನು ಬಳಸಿಕೊಂಡು ದಿಲ್ಲಿಯಲ್ಲಿ ನಿರ್ಮಾಣ ಮಾಡಲಾಗುತ್ತಿದೆ. ಆದರೆ, ರಾಜಸ್ಥಾನದ ಪಾರ್ಕ್‌ನ ಸ್ಮಾರಕಗಳ ಪ್ರತಿಮೆಗಳನ್ನು ತ್ಯಾಜ್ಯ ಪದಾರ್ಥಗಳಿಂದ ನಿರ್ಮಿಸಿಲ್ಲ.