ಅಹಮದಾಬಾದ್‌: ಜನಪ್ರಿಯ ಮೆಸಂಜರ್‌ ಆ್ಯಪ್‌ ವಾಟ್ಸ್‌ಆ್ಯಪ್‌ನಲ್ಲಿ ಹರಿದಾಡಿದ ಹಳೆ ಸಂದೇಶವೊಂದರ ಪರಿಣಾಮ ಅಹಮದಾಬಾದ್‌ ಮೂಲದ ಇ-ಕಾಮರ್ಸ್‌ ಕಂಪನಿ ಇನ್ಫಿಬೀಮ್‌ ಅವಿನ್ಯೂಸ್‌ ಲಿಮಿಟೆಡ್‌ ಶುಕ್ರವಾರ ಷೇರು ಮಾರುಕಟ್ಟೆಯಲ್ಲಿ ಶೇಕಡ 71ರಷ್ಟು ನಷ್ಟ ಅನುಭವಿಸಿದೆ.
197 ರೂ. ಇದ್ದ ಷೇರು ಮೌಲ್ಯ ಒಂದೇ ದಿನ 138.75 ರೂ. ಕಳೆದುಕೊಂಡು 58 ರೂ. ಆಸುಪಾಸಿನಲ್ಲಿ ಬಂದು ನಿಂತಿದೆ. ಈಕ್ವಿಟಿಸ್‌ ಸೆಕ್ಯೂರಿಟಿಸ್‌ ಪ್ರೈವೇಟ್‌ ಲಿಮಿಟೆಡ್‌ ಕಂಪನಿ ಈ ಹಿಂದೆ ವಿಶ್ಲೇಷಿಸಿ ಸಿದ್ಧಪಡಿಸಿದ್ದ ಸಂದೇಶ ಇಂತಹದ್ದೊಂದು ಆಘಾತ ಇನ್ಫಿಬೀಮ್‌ ಕಂಪನಿಗೆ ತಂದಿಟ್ಟಿದೆ. ಮಾರ್ಚ್‌ ಅಂತ್ಯದ ವೇಳೆಗೆ ಇನ್ಫಿಬೀಮ್‌ ಕಂಪನಿಯು ತನ್ನ ಸಹವರ್ತಿ ಕಂಪನಿಗಳಿಗೆ 135 ಕೋಟಿ ರೂ. ಬಡ್ಡಿ ರಹಿತ ಸುಲಭ ಸಾಲ ನೀಡಿದೆ ಎಂಬ ಸಂದೇಶ ಗುರುವಾರ ವಾಟ್ಸ್‌ಆ್ಯಪ್‌ಗಳಲ್ಲಿ ಹರಿದಾಡಿತ್ತು. ಶುಕ್ರವಾರದ ಹೊತ್ತಿಗೆ ಷೇರು ಮೌಲ್ಯ ಕುಸಿದು ನಷ್ಟ ಅನುಭವಿಸಿತು. ಶನಿವಾರ ಕಂಪನಿಯ ಎಜಿಎಂ ಸಭೆ ನಡೆಸಿ ಸ್ಪಷ್ಟನೆ ನೀಡುವ ಸಾಧ್ಯತೆ ಇದೆ. ಷೇರು ಮಾರುಕಟ್ಟೆ ಪ್ರವೇಶಿಸಿದ ದೇಶದ ಮೊದಲ ಇ-ಕಾಮರ್ಸ್‌ ಕಂಪನಿ ಇದಾಗಿದೆ.
Comments are closed.