ಹೊಸದಿಲ್ಲಿ: ಆ್ಯಪಲ್‌ ಕಂಪನಿಯ ನೂತನ ಐಫೋನ್‌ ಎಕ್ಸ್‌ಎಸ್‌ ಮತ್ತು ಎಕ್ಸ್‌ಎಸ್‌ ಮ್ಯಾಕ್ಸ್‌ಗಳಿಗೆ ಭಾರತೀಯ ಮಾರುಕಟ್ಟೆಯಲ್ಲಿ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
ಅಮೆರಿಕ ಮೂಲದ ಆ್ಯಪಲ್‌ ಕಂಪನಿಯ ಐಫೋನ್‌ ಮಾರಾಟಕ್ಕೆ ಭಾರತವು ಒಂದು ಮುಖ್ಯ ಮಾರುಕಟ್ಟೆಯಾಗಿದೆ. ಆದರೆ, ಇದೇ ಮೊದಲ ಬಾರಿಗೆ ನಿರುತ್ಸಾಹ ವ್ಯಕ್ತವಾಗಿದೆ. ಕಳೆದ ವರ್ಷ ಪೂರೈಕೆಗಿಂತಲೂ ಹೆಚ್ಚಿನ ಬೇಡಿಕೆ ಕಂಡು ಬಂದಿತ್ತು. ಭಾರತೀಯ ಶಾಪ್‌ಗಳ ಮುಂದೆ ಅಂದಿನ ಹೊಸ ಐಫೋನ್‌ಗಳ ಖರೀದಿಗೆ ಜನರು ಸರದಿ ಸಾಲಲ್ಲಿ ನಿಂತಿದ್ದರು. ಆದರೆ, ಇತ್ತೀಚೆಗೆ ಬಿಡುಗಡೆಯಾದ ನೂತನ ಐಫೋನ್‌ಗಳ ಮಾರಾಟಕ್ಕೆ ಮೊದಲ ವಾರಾಂತ್ಯದ ಮಾರಾಟ ಮಂದಗತಿಯಲ್ಲಿದೆ. ಪೂರೈಕೆಯಾದ ಐಫೋನ್‌ಗಳಲ್ಲಿ ಅರ್ಧದಷ್ಟು ಹಾಗೆಯೇ ಉಳಿದಿವೆ ಎಂದು ದೇಶದ ಪ್ರಮುಖ ರಿಟೇಲರ್‌ಗಳು ಅಭಿಪ್ರಾಯಪಟ್ಟಿದ್ದಾರೆ.
ಭಾನುವಾರದ ರಾತ್ರಿವರೆಗಿನ ಅಂದಾಜುಗಳ ಪ್ರಕಾರ, ದಾಸ್ತಾನಿದ್ದ ನೂತನ ಐಫೋನ್‌ಗಳ ಪೈಕಿ ಶೇ.40-45ರಷ್ಟು ಮಾರಾಟವಾಗಿಲ್ಲ ಎಂದು ಮಾರಾಟ ವಿಭಾಗದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಐಫೋನ್‌ ಎಕ್ಸ್‌ಎಸ್‌ ಮ್ಯಾಕ್ಸ್‌(256 ಜಿಬಿಯ ಗೋಲ್ಡ್‌ ಕಲರ್‌ ಫೋನ್‌) ದರ ರೂ. 1,24,900.
Comments are closed.