ವಾಯು ಮಾಲಿನ್ಯದಿಂದ ಕೊರೊನಾ ವೈರಸ್ ಸಾವಿನ ಸಂಖ್ಯೆಯಲ್ಲಿ ಹೆಚ್ಚಳ

ಹೊಸದಿಲ್ಲಿ: ಕೊರೊನಾ ವೈರಸ್ ಸಾಂಕ್ರಾಮಿಕ ಕಾಯಿಲೆ ಬಹುತೇಕ ವಿಶ್ವದ ಎಲ್ಲ ರಾಷ್ಟ್ರಗಳನ್ನು ಆವರಿಸಿದೆ. ಇದೀಗ ಬಂದಿರುವ ಆಘಾತಕಾರಿ ಅಧ್ಯಯನ ವರದಿಯ ಪ್ರಕಾರ ಮಿತಿ ಮೀರಿದ ವಾಯು ಮಾಲಿನ್ಯವು ಕೋವಿಡ್ 19 ಸೋಂಕಿತರ ಸಾವಿನ ಸಂಖ್ಯೆಯಲ್ಲಿ ವರ್ಧನೆಯಾಗುವಲ್ಲಿ ಕಾರಣವಾಗಿದೆ ಎಂಬುದನ್ನು ಸಂಶೋಧಕರು ಬಯಲು ಮಾಡಿದ್ದಾರೆ.

ಅಮೆರಿಕದ ಹಾರ್ವರ್ಡ್ ಟಿ ಎಚ್ ಚಾನ್ ಸ್ಕೂಲ್ ಆಫ್ ಪಬ್ಲಿಕ್ ಹೆಲ್ತ್ ವಿಭಾಗವು ಬಿಡುಗಡೆ ಮಾಡಿರುವ ಅಧ್ಯಯನ ವರದಿಯಲ್ಲಿ ಈ ಬಗ್ಗೆ ಉಲ್ಲೇಖಿಸಲಾಗಿದೆ. ಅತಿಯಾದ ವಾಯು ಮಾಲಿನ್ಯವಿರುವ ಪ್ರದೇಶಗಳಲ್ಲಿ ವಾಸಿಸುವ ವ್ಯಕ್ತಿಗಳಲ್ಲಿ ಕೊರೊನಾ ವೈರಸ್ ಸೋಂಕು ಕಾಣಸಿಕೊಂಡರೆ ಸಾವು ಸಂಭವಿಸುವ ಅಪಾಯದ ಮಟ್ಟ ಜಾಸ್ತಿಯಾಗಿದೆ ಎಂಬುದನ್ನು ತಿಳಿಸಿದೆ.

ಈ ಅಧ್ಯಯನ ವರದಿ ಇನ್ನಷ್ಟೇ ಪ್ರಕಟಗೊಳ್ಳಬೇಕಿದೆ. ಅಮೆರಿಕದ 3000ದಷ್ಟು ಪ್ರದೇಶಗಳಲ್ಲಿ ವಾಯು ಮಾಲಿನ್ಯ ಮಟ್ಟ ಹಾಗೂ ಕೊರೊನಾ ವೈರಸ್ ಸಾವಿನ ಸಂಖ್ಯೆಯೊಂದಿಗೆ ಹೋಲಿಕೆ ಮಾಡಿಕೊಂಡು ಈ ಅಂಕಿಅಂಶಗಳನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ ಸಂಶೋಧಕರು ಜನಸಂಖ್ಯೆಯ ಗಾತ್ರ, ಆಸ್ಪತ್ರೆಯ ಹಾಸಿಗೆಗಳು, ಕೋವಿಡ್ 19 ದೃಢಪಟ್ಟ ಪ್ರಕರಣಗಳು, ವಾತಾವರಣ, ಸಾಮಾಜಿಕ ಆರ್ಥಿಕ ಮತ್ತು ಧೂಮಪಾನ ಇತ್ಯಾದಿ ನಡವಳಿಕೆಗಳನ್ನು ಪರಿಗಣಿಸಿದೆ.

ಕಾರುಗಳ ಸಂಸ್ಕರಣೆ, ವಿದ್ಯುತ್ ಸ್ಥಾವರದಿಂದ ಇಂಧನ ದಹನದಿಂದ ಉತ್ಪತ್ಪಿಯಾಗುವ ಸೂಕ್ಷ್ಮ ಕಣಗಳು ದೀರ್ಘವಾಧಿಯಲ್ಲಿ ಮಾಲಿನ್ಯದಲ್ಲಿನ ಕಣ (PM2.5) ವರ್ಧಿಸಲು ಕಾರಣವಾಗಿದೆ. ಹೀಗೆ ಉಂಟಾಗಿರುವ ವಾಯು ಮಾಲಿನ್ಯದ ಹೆಚ್ಚಳವು ಕೋವಿಡ್ 19 ಸಾವಿನ ಪ್ರಮಾಣದಲ್ಲಿ ಗಮನಾರ್ಹ ಹೆಚ್ಚಳಕ್ಕೆ ಕಾರಣವಾಗುತ್ತದೆ ಎಂಬುದನ್ನು ಸಂಶೋಧಕರು ತಿಳಿಸುತ್ತಾರೆ.

ಉದಾಹರಣೆಗೆ ದಶಕದಿಂದಲೂ ವಾಯು ಮಾಲಿನ್ಯ ಜಾಸ್ತಿ ಇರುವ ಪ್ರದೇಶದಲ್ಲಿ ವಾಸಿಸುವವರಿಗೆ ಕಡಿಮೆ ವಾಯು ಮಾಲಿನ್ಯ ಮಟ್ಟದಲ್ಲಿ ವಾಸಿಸುವವರಿಗಿಂತಲೂ ಕೊರೊನಾ ವೈರಸ್ ಸೋಂಕಿನಿಂದ ಸಾವು ಸಂಭವಿಸುವ ಸಾಧ್ಯತೆ ಶೇಕಡಾ 15ರಷ್ಟು ಹೆಚ್ಚಾಗಿರುತ್ತದೆ.

ಇಲ್ಲಿ ಕೋವಿಡ್ 19 ಸೋಂಕು ತೀವ್ರವಾಗಿ ಕಾಣಿಸಿಕೊಂಡಾಗ ಉಸಿರಾಟದ ತೊಂದರೆ ಕಾಣಿಸಿಕೊಳ್ಳುತ್ತದೆ ಎಂಬುದು ಗಮನಾರ್ಹವೆನಿಸುತ್ತದೆ. ಇದರಿಂದಾಗಿ ವಾಯು ಮಾಲಿನ್ಯದಿಂದಾಗಿ ತೊಂದರೆ ಅನುಭವಿಸುತ್ತಿರುವ ವ್ಯಕ್ತಿಗೆ ಅಪಾಯ ಹೆಚ್ಚುವ ಸಾಧ್ಯತೆಯನ್ನು ವಿವರಿಸಲಾಗಿದೆ.

ಕೋವಿಡ್ 19 ಬಿಕ್ಕಟ್ಟಿನ ಈ ಸಮಯದಲ್ಲಿ ಮಾನವನ ಆರೋಗ್ಯ ರಕ್ಷಿಸಲು ವಾಯು ಮಾಲಿನ್ಯ ನಿಯಮಗಳನ್ನು ಜಾರಿಗೊಳಿಸುವ ಪ್ರಾಮುಖ್ಯತೆಯನ್ನು ಅಧ್ಯಯನ ವರದಿಯು ಉಲ್ಲೇಖಿಸಿದೆ.

ಜಗತ್ತಿನಲ್ಲೇ ಅತಿ ಹೆಚ್ಚು ಅಮೆರಿಕದಲ್ಲಿ ಇದುವರೆಗೆ 4,34,791 ಮಂದಿಯಲ್ಲಿ ಕೋವಿಡ್ 19 ಸೋಂಕು ಕಾಣಿಸಿಕೊಂಡಿದೆ. ಈ ಪೈಕಿ 24,058 ಮಂದಿ ಸಾವಿಗೆ ಶರಣಾಗಿದ್ದಾರೆ.