ಅಫ್ಘಾನಿಸ್ತಾನದಲ್ಲಿ ಆರು ಮಂದಿ ಭಾರತೀಯರ ಅಪಹರಣ

ಹೊಸದಿಲ್ಲಿ/ಕಾಬೂಲ್: ಅಫ್ಘಾನಿಸ್ತಾನದ ವಿದ್ಯುತ್ ಉತ್ಪಾದನಾ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದ ಭಾರತೀಯ ಮೂಲದ ಆರು ಮಂದಿಯನ್ನು ಶಸ್ತ್ರಧಾರಿಗಳು ಭಾನುವಾರ ಅಪಹರಿಸಿದ್ದಾರೆ.

ಉತ್ತರ ಬಾಘ್ಲನ್‌ ಪ್ರಾಂತ್ಯದ ಬಾಘ್‌ ಇ ಶಮಾಲ್‌ನಲ್ಲಿ ವಿದ್ಯುತ್‌ ಉತ್ಪಾದನೆಯ ಗುತ್ತಿಗೆ ಪಡೆದುಕೊಂಡಿರುವ ಭಾರತೀಯ ಕಂಪನಿ ಕೆಇಸಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ 6 ಭಾರತೀಯ ಮತ್ತು ಓರ್ವ ಆಫ್ಘನ್ ಪ್ರಜೆ ಕೆಲಸದಿಂದ ಮರಳುತ್ತಿರುವ ವೇಳೆ ಈ ಕೃತ್ಯ ನಡೆದಿದೆ.

ಭಾರತೀಯರ ಅಪಹರಣವಾಗಿರುವ ಬಗ್ಗೆ ವಿದೇಶಾಂಗ ಸಚಿವಾಲಯ ಮಾಹಿತಿ ಪಡೆದುಕೊಂಡಿದ್ದು, ಕೂಡಲೇ ಅವರ ಪತ್ತೆಗೆ ಕ್ರಮ ಕೈಗೊಳ್ಳುವಂತೆ ಆಫ್ಘನ್‌ ಅಧಿಕಾರಿಗಳಿಗೆ ಸರಕಾರ ಸೂಚನೆ ನೀಡಿದೆ.

ಬಾಘ್ಲನ್‌ ಪ್ರಾಂತೀಯ ಕೌನ್ಸಿಲ್‌ ಈ ಕೃತ್ಯದ ಹಿಂದೆ ತಾಲಿಬಾನಿಗಳ ಕೈವಾಡವಿರುವ ಶಂಕೆ ವ್ಯಕ್ತಪಡಿಸಿದೆ. ಆದರೆ ಅಪಹರಣಕ್ಕೆ ಸಂಬಂಧಿಸಿ ಯಾವುದೇ ಸಂಘಟನೆ ಹೊಣೆ ಹೊತ್ತುಕೊಂಡಿಲ್ಲ. ಅಫ್ಘಾನಿಸ್ತಾನದಲ್ಲಿ ಬಹುತೇಕ ಪ್ರದೇಶಗಳಿಗೆ ಭಾರತೀಯ ಕಂಪನಿ ಕೆಇಸಿ ವಿದ್ಯುತ್‌ ಪೂರೈಕೆ ಮಾಡುತ್ತಿದೆ.