ಕ್ಯೂಬಾದ ಹವಾನಾ ವಿಮಾನ ನಿಲ್ದಾನದಿಂದ ಟೇಕಾಫ್ ಆದ ಬೋಯಿಂಗ್ 737 ವಿಮಾನ ಪತನ: 100ಕ್ಕೂ ಅಧಿಕ ಪ್ರಯಾಣಿಕರು ಸಾವು

ಹವಾನಾ: ಕ್ಯೂಬಾದ ಹವಾನಾ ವಿಮಾನ ನಿಲ್ದಾನದಿಂದ ಟೇಕಾಫ್ ಆದ ಬೋಯಿಂಗ್ 737 ವಿಮಾನವೊಂದು ಕೆಲವೇ ನಿಮಿಷಗಳಲ್ಲಿ ಪತನಗೊಂಡಿದ್ದು, 100ಕ್ಕೂ ಅಧಿಕ ಪ್ರಯಾಣಿಕರು ಮೃತಪಟ್ಟಿದ್ದಾರೆ.

ಪತನಗೊಂಡ ವಿಮಾನದಲ್ಲಿ 110 ಪ್ರಯಾಣಿಕರು ಪ್ರಯಾಣ ಬೆಳೆಸಿದ್ದರು ಎಂದು ತಿಳಿದುಬಂದಿದೆ. ಈ ಘೋರ ದುರಂತದಲ್ಲಿ ಅದೃಷ್ಟವಶಾತ್ ಮೂವರು ಮಹಿಳೆಯರು ಪ್ರಾಣಾಪಾಯದಿಂದ ಪಾರಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ಇಲ್ಲಿನ ಜೋಸ್‌ಮಾರ್ಟಿ ಏರ್‌ಪೋರ್ಟ್‌ನಿಂದ ಕೆಲವೇ ಕಿಲೋ ಮೀಟರ್ ದೂರದಲ್ಲಿ ನೆಲಕ್ಕೆ ಅಪ್ಪಳಿಸಿದ ವಿಮಾನದಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡಿದ್ದು, ವಿಮಾನ ಸುಟ್ಟು ಭಸ್ಮವಾಗಿದೆ. ವಿಮಾನ ನಿಲ್ದಾಣದ ಸುತ್ತಲೂ ದಟ್ಟ ಹೊಗೆ ಆವರಿಸಿರುವ ದೃಶ್ಯಗಳನ್ನು ಕ್ಯೂಬಾದ ಟಿವಿ ವಾಹಿನಿಗಳು ಬಿತ್ತರಿಸಿವೆ.

ವಿಮಾನವು ಕ್ಯೂಬಾದ ‘ಕ್ಯೂಬಾನಾ ಡಿ ಏವಿಯೇಷನ್’ ಸಂಸ್ಥೆಗೆ ಸೇರಿದ್ದು, ಹೊಲ್‌ಗ್ಯುಯಿನ್ ನಗರಕ್ಕೆ ಪ್ರಯಾಣ ಬೆಳೆಸಿತ್ತು ಎಂದು ತಿಳಿದುಬಂದಿದೆ.