ಆರು ಅತಿ ಎತ್ತರದ ಪರ್ವತಗಳನ್ನೇರಿದ ವಿಶ್ವದ ಅತಿ ಕಿರಿಯ ಪರ್ವತಾರೋಹಿ ಅರ್ಜುನ್ ವಾಜಪೇಯಿ!

ಕಠ್ಮಂಡು: ವಿಶ್ವದ ಮೂರನೇ ಅತಿ ಎತ್ತರದ ಪರ್ವತವಾಗಿರುವ ಕಾಂಚನಗಂಗಾ ಶಿಖರವನ್ನೇರುವ ಮೂಲಕ ನೊಯ್ಡಾ ನಿವಾಸಿ 24 ವರ್ಷದ ಅರ್ಜುನ್ ವಾಜಪೇಯಿ 6 ಅತಿ ಎತ್ತರದ ಪರ್ವತಗಳನ್ನೇರಿದ ಅತಿ ಕಿರಿಯ ಪರ್ವತಾರೋಹಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಕಾಂಚನ್‌ಗಂಗಾ ಪರ್ವತವನ್ನೇರುವ ಎರಡನೇ ಪ್ರಯತ್ನದಲ್ಲಿ ಅರ್ಜುನ್ ಯಶಸ್ವಿಯಾಗಿದ್ದಾರೆ. ಕಳೆದ ವರ್ಷ ಕೂಡ ಕಾಂಚನಗಂಗಾ ಏರುವ ಸಾಹಸಕ್ಕೆ ಕೈ ಹಾಕಿದ್ದ ಅವರು 6, 400 ಮೀಟರ್ ಹತ್ತಿದ್ದರು. ಆದರೆ ಮುಂದುವರೆಯಲಾಗದೇ ನಿರಾಶರಾಗಿ ಹಿಂತಿರುಗಿದ್ದರು.

ಆದರೆ ಈ ಬಾರಿ ಅವರ ಪ್ರಯತ್ನ ಸಫಲವಾಗಿದೆ. ಏಪ್ರೀಲ್ 26ರಂದು 5,400 ಮೀ ಎತ್ತರದಲ್ಲಿ ನಿರ್ಮಿಸಲಾಗಿರುವ ಶಿಬಿರದಿಂದ ಪರ್ವತವನ್ನೇರಲು ಪ್ರಾರಂಭಿಸಿದ ಅವರು ಮೇ 20ಕ್ಕೆ ಭಾರತೀಯ ಕಾಲಮಾನ 8.05ಕ್ಕೆ ಪರ್ವತದ ತುತ್ತ ತುದಿಯಲ್ಲಿದ್ದ. ಆದರೆ ಪ್ರತಿಕೂಲ ಹವಾಮಾನ ಅವರು ಹಿಂತಿರುಗಲು ಅಡ್ಡಿ ಮಾಡಿತು. ಅಲ್ಲಿಂದವರು ಮರಳಿದ್ದು ಮೂರು ದಿನಗಳ ಬಳಿಕ.

ತಮ್ಮ 10ನೇ ವಯಸ್ಸಿನಲ್ಲಿ ಪರ್ವತಾರೋಹಣದ ಗೀಳು ಬೆಳೆಸಿಕೊಂಡ ಅರ್ಜುನ್ 16ರ ಪ್ರಾಯದಲ್ಲಿ ಮೌಂಟ್ ಎವರೆಸ್ಟ್ ಏರಲು ಆರಂಭಿಸಿದ್ದರು. ಇಲ್ಲಿಯವರೆಗೆ ಮೌಂಟ್ ಎವರೆಸ್ಟ್ ( 8,848 ಮೀ), ಮೌಂಟ್ ಮನಾಸ್ಲೂ ( 8,163ಮೀ), ಮೌಂಟ್ ಲೋಟ್ಸೆ (8516ಮೀ), ಮೌಂಟ್ ಮಕಾಲು (8486ಮೀ) , ಮೊಂಟ್ ಚೊ ಒಯು (8201ಮೀ) ಪರ್ವತಗಳನ್ನೇರಿರುವ ಅರ್ಜುನ್ ವಿಶ್ವದಲ್ಲಿ ಅತಿ ಎತ್ತರದ 14 ಶಿಖರಗಳನ್ನೇರುವ ಗುರಿ ಇಟ್ಟುಕೊಂಡಿದ್ದಾರೆ.