ಬ್ಯಾಂಕಾಕ್: ಥಾಯ್ಲೆಂಡ್‌ನ ಗುಹೆಯೊಂದರಲ್ಲಿ ಕಳೆದ 9 ದಿನಗಳಿಂದ ಸಿಲುಕಿರುವ 12 ಬಾಲಕರು ಮತ್ತು ಓರ್ವ ಫುಟ್ಬಾಲ್ ತರಬೇತುದಾರರ ರಕ್ಷಣೆಗೆ ಥಾಯ್ಲೆಂಡ್ ನೌಕಾಪಡೆ ಅಮೆರಿಕ, ರಷ್ಯಾ, ಚೀನಾ ಮತ್ತು ಇಂಗ್ಲೆಂಡ್ ಸಹಕಾರದೊಂದಿಗೆ ಭಾರಿ ಕಾರ್ಯಾಚರಣೆ ಕೈಗೊಂಡಿದ್ದು, ಆರು ಬಾಲಕರನ್ನು ರಕ್ಷಿಸಿ ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ರಕ್ಷಣಾ ಕಾರ್ಯಾಚರಣೆ ಪ್ರಗತಿಯಲ್ಲಿದ್ದು, ಎಲ್ಲ 12 ಬಾಲಕರು ಮತ್ತು ಫುಟ್ಬಾಲ್ ಕೋಚ್‌ನನ್ನು ರಕ್ಷಿಸಲು ಥಾಯ್ ಸೇನೆ ಶ್ರಮಿಸುತ್ತಿದೆ. ವೈಲ್ಡ್‌ಬೋರ್ ಫುಟ್ಬಾಲ್ ತಂಡದ 12 ಬಾಲಕರು ಕೋಚ್‌ ಜತೆ ತಾಮ್ ಯೆವಾನ್ ಗುಹೆಗೆ ತೆರಳಿದ್ದ ಸಂದರ್ಭ ಅಲ್ಲಿ ಪ್ರವಾಹ ಪರಿಸ್ಥಿತಿ ಉದ್ಭವಿಸಿ ಸಿಲುಕಿಕೊಂಡಿದ್ದಾರೆ.
ಗುಹೆಯಲ್ಲಿ ನೀರು ತುಂಬಿದ್ದರಿಂದ ಅವರು ಹೊರಗೆ ಬರಲು ಸಾಧ್ಯವಾಗಿರಲಿಲ್ಲ. ಆದರೂ ರಕ್ಷಣಾ ಪಡೆ ಸತತ 9 ದಿನ ಶ್ರಮಿಸಿ, ವಿವಿಧ ಕಾರ್ಯತಂತ್ರ ರೂಪಿಸಿ, ಗುಹೆಯಲ್ಲಿ ಬಾಲಕರು ಸಿಲುಕಿಕೊಂಡಿದ್ದ ಸ್ಥಳವನ್ನು ಪತ್ತೆಹಚ್ಚಿ ಅವರನ್ನು ರಕ್ಷಿಸಲು ಮುಂದಾಗಿದೆ.
ಗುಹೆಯೊಳಗೆ ತುಂಬಿಕೊಂಡಿದ್ದ ನೀರನ್ನು ಪೈಪ್ ಮೂಲಕ ಹೊರಗೆ ತೆಗೆಯಲಾಗುತ್ತಿತ್ತು. ಅಲ್ಲದೆ ಬಾಲಕರಿಗೆ ಆಮ್ಲಜನಕ ಕೊರತೆಯಾಗಿದ್ದರಿಂದ ಸಿಲಿಂಡರ್ ಮೂಲಕ ಪೂರೈಕೆಗೆ ಕ್ರಮ ಕೈಗೊಳ್ಳಲಾಗಿತ್ತು.
ಮುಂದುವರಿದ ಕಾರ್ಯಾಚರಣೆ
ಗುಹೆಯಲ್ಲಿ ಸಿಲುಕಿದ್ದವರ ಪೈಕಿ 6 ಮಂದಿಯನ್ನು ಸುರಕ್ಷಿತವಾಗಿ ಹೊರತಂದು, ಪ್ರಥಮ ಚಿಕಿತ್ಸೆ ನೀಡಿ ನಂತರ ಚಿಯಾಂಗ್ ರೈ ಆಸ್ಪತ್ರೆಗೆ ದಾಖಲಿಸಲಾಗುತ್ತದೆ. ಅತ್ಯಂತ ಅಪಾಯಕಾರಿ ಮತ್ತು ಸಾಹಸಮಯ ರಕ್ಷಣಾ ಕಾರ್ಯಾಚರಣೆ ಇದಾಗಿದ್ದು, ಥಾಯ್ಲೆಂಡ್ ವಿವಿಧ ರಾಷ್ಟ್ರಗಳ ತಜ್ಞರು ಮತ್ತು ಇಂಜಿನಿಯರ್‌ಗಳ ಸಹಾಯ ಪಡೆದು ಕಾರ್ಯತಂತ್ರ ರೂಪಿಸಿದೆ.
ಶನಿವಾರ ರಾತ್ರಿ ಬಾಲಕರಿದ್ದ ಸ್ಥಳ ತಲುಪಿದ್ದ ರಕ್ಷಣಾ ತಂಡದ ವೈದ್ಯರು ಬಾಲಕರ ಆರೋಗ್ಯ ಪರಿಶೀಲಿಸಿ, ತಕ್ಷಣ ಅವರನ್ನು ಹೊರಗೆ ಕರೆತರಲು ಕಾರ್ಯಾಚರಣೆಗೆ ಅನುಮತಿ ನೀಡಿದ್ದರು. ಗುಹೆಗೆ ತೆರಳಿ ವಾಪಸ್ ಬರಬೇಕಾದರೆ ಅಡೆತಡೆಗಳಿದ್ದು, ಕಾರ್ಯಾಚರಣೆಗೆ ಸಮಸ್ಯೆಯಾಗಿದೆ.
Comments are closed.