ನಾವು ಮೂರ್ಖರಲ್ಲ… ಭಾರತ ನಮ್ಮ ಸರಕುಗಳ ಮೇಲಿನ ಸುಂಕ ಇಳಿಸಬೇಕು: ಭಾರತದ ಮೇಲೆ ಕಿಡಿ ಕಾರಿದ ಡೊನಾಲ್ಡ್​ ಟ್ರಂಪ್​

ವಾಶಿಂಗ್ಟನ್​: ಜಪಾನಿನಲ್ಲಿ ನಡೆಯಲಿರುವ ಜಿ-20 ಸಮಾವೇಶದ ಸಮಯದಲ್ಲಿ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಭಾರತದ ಮೇಲೆ ಕಿಡಿ ಕಾರಿದ್ದಾರೆ. ಶೃಂಗಸಭೆಗೆ ಆಗಮಿಸುವ ಮುನ್ನ ಅವರು ಅಮೆರಿಕಾದ ವಾಹಿನಿಯೊಂದಕ್ಕೆ ಸಂದರ್ಶನ ನೀಡಿದ್ದಾರೆ. ಅದರಲ್ಲಿ ಮಾತನಾಡಿರುವ ಟ್ರಂಪ್​ “ಭಾರತ ದೇಶ ಅಮೆರಿಕಾದ ಸರಕುಗಳ ಮೇಲೆ ಹೇರಿರುವ ಸುಂಕದ ಭಾರವನ್ನು ಇಳಿಸಬೇಕು, ಈ ಬಗ್ಗೆ ನರೇಂದ್ರ ಮೋದಿಯವರನ್ನು ಭೇಟಿಯಾದಾಗ ಶುಕ್ರವಾರ ಮಾತನಾಡಲಿದ್ದೇನೆ,” ಎಂದು ಹೇಳಿದ್ದಾರೆ.

ಈ ಬಗ್ಗೆ ತಮ್ಮ ಟ್ವಿಟ್ಟರ್​ ಖಾತೆಯಲ್ಲೂ ಬರೆದುಕೊಂಡಿರುವ ಟ್ರಂಪ್​, “ಶೃಂಗಸಭೆ ವೇಳೆ ಮೋದಿಯವರ ಜತೆ ಮಾತನಾಡುತ್ತೇನೆ. ಈ ಹಿಂದಿನಿಂದಲೂ ಭಾರತ ಅಮೆರಿಕಾದ ಸರಕುಗಳ ಮೇಲೆ ಭಾರೀ ಸುಂಕವನ್ನು ವಿಧಿಸುತ್ತಿದೆ. ಇತ್ತೀಚೆಗಂತೂ ಸುಂಕವನ್ನು ಇಮ್ಮಡಿಯಾಗಿಸಿದೆ. ಸುಂಕವನ್ನು ಶತಾಯಗತಾಯ ಭಾರತ ಕಡಿಮೆ ಗೊಳಿಸಲೇ ಬೇಕು,” ಎಂದಿದ್ಧಾರೆ.

ಈ ಹಿಂದೆಯೂ ಭಾರತವನ್ನು ಖಂಡಿಸಿದ್ದ ಡೊನಾಲ್ಡ್​ ಟ್ರಂಪ್​ “ಸುಂಕಗಳ ರಾಜ,” ಎಂದು ಬಣ್ಣಿಸಿದ್ದರು. ಅಮೆರಿಕಾದ ಮೋಟರ್​ ಬೈಕ್​ಗಳ ಮೇಲಿನ ಆಮದು ಸುಂಕ ಶೇಕಡ 50ರಿಂದ ಶೇ. 100ಕ್ಕೆ ಇತ್ತೀಚೆಗೆ ಏರಿಸಲಾಗಿತ್ತು. ಇದನ್ನು ಉಲ್ಲೇಖಿಸಿ ಪ್ರತಿಕ್ರಿಯಿಸಿರುವ ಟ್ರಂಪ್​, “ಅಮೆರಿಕಾ ಮೂರ್ಖರ ದೇಶವಲ್ಲ. ಎಲ್ಲಿಯವರೆಗೂ ನೀವು ನಮ್ಮನ್ನು ಮೂರ್ಖರಾಗಿಸಲು ಪ್ರಯತ್ನಿಸುತ್ತೀರಿ. ಭಾರತ ನಮ್ಮ ಉತ್ತಮ ಮಿತ್ರ ರಾಷ್ಟ್ರ. ಪ್ರಧಾನಿ ಮೋದಿಯವರು ಈ ಸುಂಕ ಹೆಚ್ಚಳವನ್ನು ಗಮನಿಸಬೇಕು. ನೀವು ವಿಧಿಸುತ್ತಿರುವ ಸುಂಕವನ್ನು ಇಳಿಸಲೇಬೇಕು,” ಎಂದು ವಾಹಿನಿಯ ಸಂದರ್ಶನದಲ್ಲಿ ಪ್ರತಿಕ್ರಿಯಿಸಿದ್ದಾರೆ.

ಅಮೆರಿಕಾ ಅಲ್ಯುಮಿನಿಯಂ ಸೇರಿದಂತೆ ಇತರೆ ಕೆಲ ಸರಕುಗಳ ಸುಂಕವನ್ನು ಇಳಿಸುವಂತೆ ಭಾರತ ಕೂಡ ಮನವಿ ಮಾಡಿತ್ತು. ಆದರೆ ಅಮೆರಿಕಾ ಭಾರತದ ಮನವಿಗೆ ಸ್ಪಂದಿಸಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಭಾರತ ಕೂಡ ಅಮೆರಿಕಾದ ಮೇಲೆ ಸುಂಕ ಏರಿಸುವ ಮೂಲಕ ಛಾಟಿ ಬೀಸಿತ್ತು. ಇದೀಗ ಎರಡೂ ದೇಶದ ನಾಯಕರು ಜಪಾನಿನ ಜಿ-20 ಶೃಂಗಸಭೆಯಲ್ಲಿ ಭೇಟಿಯಾಗಲಿದ್ದು, ಸುಂಕ ಇಳಿಕೆಯ ಬಗ್ಗೆ ಚರ್ಚಿಸಲಿದ್ದಾರೆ.