ಲಾಕ್‌ಡೌನ್‌ ಸಡಿಲಿಕೆ, ಆತುರದ ನಿರ್ಧಾರ – ವಿಶ್ವ ಆರೋಗ್ಯ ಸಂಸ್ಥೆ

ಬ್ಯಾಂಕಾಕ್‌: ಕೊರೊನಾ ನಿಯಂತ್ರಣಕ್ಕೆ ವಿಧಿಸಿರುವ ನಿರ್ಬಂಧಗಳನ್ನು ಆತುರವಾಗಿ ಸಡಿಲಗೊಳಿಸಲು ಮುಂದಾದರೆ ಸೋಂಕಿನ ಪ್ರಮಾಣ ಮತ್ತೆ ಪುಟಿದೇಳುವ ಅಪಾಯ ಇದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ) ಎಚ್ಚರಿಕೆ ನೀಡಿದೆ.

ಬಹುತೇಕ ರಾಷ್ಟ್ರಗಳು ಚಟುವಟಿಕೆ ಸ್ತಬ್ಧಗೊಳಿಸಿರುವುದರಿಂದ ಆರ್ಥಿಕತೆ ಅಧೋಗತಿ ತಲುಪಿದ್ದು, ಪುನರುತ್ಥಾನದ ಹೊಸ ಸಾಧ್ಯತೆಗಳತ್ತ ಪ್ರಯತ್ನ ಮುಂದುವರಿಸಿವೆ. ಇರುವ ನಿರ್ಬಂಧಗಳನ್ನು ಸಡಿಲಗೊಳಿಸಿ ಜನರ ಚಟುವಟಿಕೆಗೆ ಅವಕಾಶ ನೀಡುವುದನ್ನು ಈ ರಾಷ್ಟ್ರಗಳು ಪ್ರಥಮ ಆದ್ಯತೆಯನ್ನಾಗಿ ಪರಿಗಣಿಸಿವೆ.

ಆದರೆ, ಕೊರೊನಾ ಸೋಂಕು ಪ್ರಮಾಣ ಯಥಾಸ್ಥಿತಿಯಲ್ಲಿ ಇರುವಾಗಲೇ ಜನ ಸಂಚಾರಕ್ಕೆ ಆಸ್ಪದ ನೀಡುವುದು ತೀರಾ ಅಪಾಯಕಾರಿ ಕ್ರಮವಾಗುತ್ತದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಾದೇಶಿಕ ನಿರ್ದೇಶಕ ಡಾ. ತಕೇಶಿ ಕಾಸೈ ಎಚ್ಚರಿಸಿದ್ದಾರೆ.

ಕೋವಿಡ್‌-19: ವಾಣಿಜ್ಯ ನಿರ್ಬಂಧ ತೆರವಿಗೆ ಜಿ-20 ರಾಷ್ಟ್ರಗಳಿಗೆ ಡಬ್ಲ್ಯುಎಚ್‌ಒ ಕರೆ

ಸೋಂಕು ಹರಡುವಿಕೆಯ ಸಾಧ್ಯತೆ ಮೇಲೆ ಸರಕಾರಗಳು ತೀವ್ರ ನಿಗಾ ಇರಿಸಬೇಕು. ಅದರ ಪ್ರಮಾಣ ಆಧರಿಸಿ ಲಾಕ್‌ಡೌನ್‌ನಂತಹ ನಿರ್ಬಂಧಗಳನ್ನು ಸಡಿಲಗೊಳಿಸುವ ಕುರಿತು ಯೋಚಿಸಬೇಕು. ಆತುರಾತುರವಾಗಿ ನಿರ್ಧಾರ ಕೈಗೊಳ್ಳುವುದು ಸರಿಯಲ್ಲ. ಜನರ ಆರೋಗ್ಯ ಮತ್ತು ಆರ್ಥಿಕತೆ ಎರಡನ್ನೂ ಸರಿದೂಗಿಸುವಂತಹ ಸಮತೋಲಿತ ನಿರ್ಧಾರಗಳನ್ನು ಕೈಗೊಳ್ಳಬೇಕು ಎಂದು ಜಾಗತಿಕ ಸರಕಾರಗಳಿಗೆ ಕಾಸೈ ಸಲಹೆ ನೀಡಿದ್ದಾರೆ.