ಚೀನಾದಲ್ಲಿ ಒಂದೇ ದಿನ ದಾಖಲೆಯಾದ ಕೊರೋನಾ ವೈರಸ್ ಪ್ರಕರಣಗಳು ಪತ್ತೆ

ಬೀಜಿಂಗ್ (ಜೂ. 14) ​: ನೆರೆಯ ಚೀನಾದ ವುಹಾನ್​ ನಗರದಲ್ಲಿ ಕೊರೋನಾ ವೈರಸ್​ ಮೊಟ್ಟ ಮೊದಲ ಬಾರಿಗೆ ಕಾಣಿಸಿಕೊಂಡಿತ್ತು. ಆದರೆ, ಎಲ್ಲ ರಾಷ್ಟ್ರಗಳಿಗಿಂತ ಮೊದಲು ಈ ಭಾಗದಲ್ಲಿ ಸೋಂಕು ನಿತಂತ್ರಣಕ್ಕೆ ಬಂದಿತ್ತು. ಈಗ ಕೊರೋನಾ ಪ್ರಕರಣ ಕಡಿಮೆ ಆಯಿತು ಎನ್ನುವಾಗಲೇ ಬೀಜಿಂಗ್​ನಲ್ಲಿ ಮತ್ತೆ ಕೊರೋನಾ ವೈರಸ್​ ಕಾಣಿಸಿಕೊಂಡಿದ್ದು, ಆತಂಕ ಸೃಷ್ಟಿಸಿದೆ.

ಸುಮಾರು ಮೂರು ತಿಂಗಳ ಕಠಿಣ ಲಾಕ್​ಡೌನ್​ನಿಂದಾಗಿ ಚೀನಾದಲ್ಲಿ ಈ ವೈರಸ್​ ನಿಯಂತ್ರಣಕ್ಕೆ ಬಂದಿತ್ತು. ಏಪ್ರಿಲ್​ನಿಂದ ಇಲ್ಲಿಯವರೆಗೆ ಅಲ್ಲೊಂದು ಇಲ್ಲೊಂದು ಪ್ರಕರಣ ಮಾತ್ರ ದಾಖಲಾಗುತ್ತಿದ್ದವು. ಆದರೆ, ದಕ್ಷಿಣ ಬೀಜಿಂಗ್​ನಲ್ಲಿ ಶನಿವಾರ ಒಂದೇ ದಿನ 57 ಕೇಸ್​ಗಳು ಪತ್ತೆ ಆಗಿವೆ. ಚೀನಾದಲ್ಲಿ ಏಪ್ರಿಲ್​ನಿಂದ ಇಲ್ಲಿವರೆಗೆ ಒಂದೇ ದಿನ ದಾಖಲಾದ ಅತಿ ಹೆಚ್ಚು ಪ್ರಕರಣ ಇದಾಗಿದೆ.

ಬೀಜಿಂಗ್​ನಲ್ಲಿರುವ ತರಕಾರಿ ಹಾಗೂ ಮಾಂಸದ ಮಾರುಕಟ್ಟೆಯಲ್ಲಿ ಕೆಲಸ ಮಾಡುವ ವ್ಯಕ್ತಿಗೆ ಕೊರೋನಾ ಕಾಣಿಸಿಕೊಂಡಿದೆ. ಇವನಿಂದಾಗಿ 37 ಜನರಿಗೆ ವೈರಸ್ ಹರಡಿದೆ ಎನ್ನಲಾಗಿದೆ. ಉಳಿದ ಪ್ರಕರಣಗಳು ವಿದೇಶದಿಂದ ಬಂದವರಲ್ಲಿ ಕಾಣಿಸಿಕೊಂಡಿದೆ ಎನ್ನಲಾಗಿದೆ.

ಸದ್ಯ, ಮುಂಜಾಗೃತ ಕ್ರಮವಾಗಿ ಈ ಭಾಗದಲ್ಲಿರುವ ತರಕಾರಿ ಹಾಗೂ ಮಾಂಸದ ಮಾರುಕಟ್ಟೆಯನ್ನು ಬಂದ್​ ಮಾಡಲಾಗಿದೆ. ಈಗ ಒಂದೇ ದಿನ ಇಷ್ಟೊಂದು ಪ್ರಕರಣ ಕಾಣಿಸಿಕೊಂಡಿರುವುದು ಸದ್ಯದ ಆತಂಕವನ್ನು ಹೆಚ್ಚಿಸಿದೆ.

ಈ ಮೊದಲು ಕೊರೋನಾ ವೈರಸ್​ ಚೀನಾದ ವುಹಾನ್​ ನಗರಕ್ಕೆ ಮಾತ್ರ ಸೀಮೀತವಾಗಿತ್ತು. ಈಗ ಚೀನಾ ರಾಜಧಾನಿ ಬೀಜಿಂಗ್​ನಲ್ಲೂ ಈ ಸೋಂಕು ಪತ್ತೆ ಆಗಿರುವುದು ಅಲ್ಲಿನ ನಾಯಕರಲ್ಲಿ ಭಯ ಸೃಷ್ಟಿಯಾಗಿದೆ.