ಉಡುಪಿಯ ಉದ್ಯಮಿ ನಾಪತ್ತೆ: ಅಪಹರಣದ ಬಗ್ಗೆ ತಾಯಿಯಿಂದ ಪೊಲೀಸರಿಗೆ ದೂರು

ಉಡುಪಿ: ಇಲ್ಲಿನ ಹೊಟೇಲ್ ದುರ್ಗಾ ಇಂಟರ್‌ನ್ಯಾಶನಲ್ ಬೋರ್ಡಿಂಗ್ ಆಂಡ್ ಲಾಡ್ಜಿಂಗ್ ಕಟ್ಟಡದ ಮಾಲಕ, ವಿದೇಶಿ ಉದ್ಯಮಿ ಕೆ. ಭಾಸ್ಕರ ಶೆಟ್ಟಿ (52) ನಾಪತ್ತೆಯಾಗಿದ್ದಾರೆ ಎಂದು ತಾಯಿ ಗುಲಾಬಿ ಶೆಡ್ತಿ ಅವರು ಮಣಿಪಾಲ ಠಾಣೆಗೆ ದೂರು ನೀಡಿದ್ದು, ಅಪಹರಣ ಶಂಕೆಯೂ ವ್ಯಕ್ತವಾಗಿದೆ.

ಜು. 28ರ ಮಧ್ಯಾಹ್ನ ಮನೆಗೆ ಹೋಗುವುದಾಗಿ ತಿಳಿಸಿ ಹೊಟೇಲಿನಿಂದ ತೆರಳಿದ್ದ ಅವರು ಬಳಿಕ ನಾಪತ್ತೆಯಾಗಿದ್ದಾರೆ. ಅವರ ಮೊಬೈಲ್ ಕೂಡ ಸ್ವಿಚ್ಡ್ ಆಫ್ ಆಗಿದೆ. ಕೌಟುಂಬಿಕ ಆಸ್ತಿ ಕಲಹವಿದ್ದು ಇದೇ ಕಾರಣದಿಂದ ಅವರು ನಾಪತ್ತೆಯಾಗಿದ್ದಾರೆಂಬುದು ಒಂದು ಮೂಲಗಳ ಅಭಿಪ್ರಾಯವಾದರೇ ಜಾಗ, ಕಟ್ಟಡಗಳ ಖರೀದಿ ಹಾಗೂ ದೇಶ, ವಿದೇಶಗಳಲ್ಲಿ ವಿವಿಧ ಉದ್ಯಮಗಳಲ್ಲಿ ಮಾಲಕರು ಹಾಗೂ ಪಾಲುದಾರಿಕೆಯನ್ನು ಹೊಂದಿದ್ದ ಅವರನ್ನು ಹಣಕ್ಕಾಗಿ ಭೂಗತ ಲೋಕದವರು ಏನಾದರೂ ಅಪಹರಣ ಮಾಡಿರಬಹುದೇ ಎನ್ನುವ ಶಂಕೆಯೂ ವ್ಯಕ್ತವಾಗಿದೆ.

ಪೊಲೀಸರು ನಾಪತ್ತೆ ಪ್ರಕರಣವನ್ನು ದಾಖಲಿಸಿಕೊಂಡಿದ್ದು ತನಿಖೆ ನಡೆಯುತ್ತಿದೆ.