“ನಲ್ ಸ್ಟರ್ನ್” ಗೋಡೆಯೇ ಇಲ್ಲದ ಈ ಹೋಟೆಲ್’ಗೆ ಡಿಮ್ಯಾಂಡಪ್ಪೋ ಡಿಮ್ಯಾಂಡೋ

ಈ ಜಗತ್ತಿನಲ್ಲಿ ಎಲ್ಲಾದರೊಂದು ಕಡೆ ವಿಚಿತ್ರ ಐಡಿಯಾಗಳು ಜಾರಿಗೆ ಬರುತ್ತಲೇ ಇರುತ್ತವೆ. ಗುಹೆಯೊಳಗೆ ಹೋಟೆಲ್ ನಿರ್ಮಿಸುವುದು; ನೀರಿನೊಳಗೆ ಮನೆ ಮಾಡುವುದು ಇತ್ಯಾದಿಗಳನ್ನು ಕೇಳುತ್ತಲೇ ಇರುತ್ತೇವೆ. ಭೂಮಿಯಲ್ಲಿನ ಸ್ವರ್ಗವೆಂದೇ ಕರೆಯಲ್ಪಡುವ ಸ್ವಿಜರ್’ಲ್ಯಾಂಡ್’ನಲ್ಲಿ ರಮ್ಯಮನೋಹರವಾದ ಬೆಟ್ಟದ ಮೇಲೆ ಹೋಟೆಲ್’ವೊಂದು ತಲೆ ಎತ್ತಿದೆ. ಬಾಗಿಲಿರಲಿ, ಗೋಡೆಯೇ ಇಲ್ಲದ ಈ ಹೋಟೆಲ್’ಗೆ ಡಿಮ್ಯಾಂಡಪ್ಪೋ ಡಿಮ್ಯಾಂಡೋ…

ಏನೇನಿರುತ್ತೆ?
ಗ್ರಾಬುಂಡೆನ್ ಪರ್ವತ ಶ್ರೇಣಿಯಲ್ಲಿರುವ “ನಲ್ ಸ್ಟರ್ನ್” ಎಂಬ ಈ ಹೋಟೆಲ್’ನಲ್ಲಿ ಒಂದು ಬೆಡ್ ಇರುತ್ತದೆ. ಜೊತೆಗೆ ಎರಡು ಹಣತೆಗಳು ಇರುತ್ತವೆ. ಶೌಚಾಲಯ ಬಳಸಬೇಕೆಂದರೆ 10 ನಿಮಿಷ ನಡಿಗೆಯಷ್ಟು ದೂರದಲ್ಲಿ ಸಾರ್ವಜನಿಕ ಶೌಚಾಲಯ ಬಳಸಬೇಕು. ಸರಿಯಾದ ಸಮಯಕ್ಕೆ ನಿಮಗೆ ಊಟ ತಿಂಡಿಗಳನ್ನು ಸರ್ವ ಮಾಡಲಾಗುತ್ತದೆ. ಇದು ಬಿಟ್ಟರೆ ನೀವು ಈ ಹೋಟೆಲ್’ನಲ್ಲಿ ಬಹಳ ಮುಕ್ತವಾಗಿರಬಹುದು. ರೂಮಿನಲ್ಲಿದ್ದುಕೊಂಡು(ಬೆಡ್) ಸುಂದರ ಪರಿಸರವನ್ನು ಮುಕ್ತವಾಗಿ ಆಸ್ವಾದಿಸಬಹುದು.

ಅಂದಹಾಗೆ, ಈ ಹೋಟೆಲ್’ನಲ್ಲಿ ಒಂದು ರಾತ್ರಿಗೆ 250 ಡಾಲರ್, ಅಂದರೆ ಸುಮಾರು 16 ಸಾವಿರ ರೂಪಾಯಿ ಬೆಲೆ ನಿಗದಿಯಾಗಿದೆ. ನೀವು ಮುಂಗಡವಾಗಿ ರೂಮು ಕಾದಿರಿಸಬಹುದು. ಆದರೆ, ನಿಮ್ಮ ಹಣೆಬರಹಕ್ಕೆ ನೀವು ಬುಕ್ ಮಾಡಿದ ದಿನ ಹವಾಮಾನ ವೈಪರೀತ್ಯವಾದಲ್ಲಿ ಹೋಟೆಲ್’ನವರು ನಿಮ್ಮ ಬುಕಿಂಗ್ ಕ್ಯಾನ್ಸಲ್ ಮಾಡಿಬಿಡುತ್ತಾರೆ.