ಬೆಂಗಳೂರಿನಲ್ಲಿ ಹೆಚ್ಚಿದ ಶಬ್ಧಮಾಲಿನ್ಯ: ಒತ್ತಡ ಜೀವನಕ್ಕೆ ಕಾರಣ

ಬೆಂಗಳೂರು: ಪದೇ ಪದೇ ಪರಿಸರ ಸಂಬಂಧಿತ ವಿಚಾರಗಳಲ್ಲಿ ಋಣಾತ್ಮಕವಾಗಿ ಗುರುತಿಸಿಕೊಳ್ಳುತ್ತಿರುವ ಬೆಂಗಳೂರು ಮಹಾನಗರ, ಇದೀಗ ಶಬ್ಧ ಮಾಲಿನ್ಯದಲ್ಲಿ ಸುದ್ದಿ ಮಾಡಿದೆ.

ಬೆಂಗಳೂರಿನ ಅನೇಕ ಭಾಗಗಳಲ್ಲಿ ಶಬ್ಧ ಮಾಲಿನ್ಯ ಪರಿಮಾಣ ಪತ್ತೆ ಹಚ್ಚಿರುವ ಕರ್ನಾಟಕ ಪರಿಸರ ಮಾಲಿನ್ಯ ನಿಯಂತ್ರಣ ಮಂಡಳಿ ಅಧಿಕಾರಿಗಳು, ವಾಣಿಜ್ಯ ಭಾಗಗಳ ಪೈಕಿ ದೊಮ್ಮಲೂರಿನಲ್ಲಿ ಅತಿ ಹೆಚ್ಚು ಶಬ್ಧ ಮಾಲಿನ್ಯವಾಗುತ್ತಿದೆ ಎಂದಿದೆ. 2ನೇ ಸ್ಥಾನದಲ್ಲಿ ಎಂ.ಜಿರಸ್ತೆಗೆ ನೀಡಲಾಗಿದ್ದು, 65 ಡೆಸಿಬಲ್‌ (ಡಿಬಿ)ಗಿಂತ ಹೆಚ್ಚು ಶಬ್ಧ ಈ ಭಾಗದಲ್ಲಿ ಉತ್ಪತ್ತಿಯಾಗುತ್ತಿದೆ ಎಂದು ತಿಳಿಸಿದ್ದಾರೆ. ದೊಮ್ಮಲೂರಿನಲ್ಲಿ 95 ಡಿಬಿ, ಎಂಜಿ ರಸ್ತೆಯಲ್ಲಿ 86 ಹಾಗೂ ಜೆಪಿ ನಗರ 81ಡಿಬಿಯಷ್ಟು ಶಬ್ಧ ಮಾಲಿನ್ಯವಾಗುತ್ತಿದೆ ಎಂದು ತಿಳಿದು ಬಂದಿದೆ.

ಒತ್ತಡಕ್ಕೆ ಕಾರಣ:
ಮಾಲಿನ್ಯ ನಿಯಂತ್ರಣ ಮಂಡಳಿಯ ಎಂಎಸ್‌ಜೆ ನಾಯಕ್‌ ನೇತೃತ್ವದಲ್ಲಿ ನಗರದ ವಾಣಿಜ್ಯ, ವಸತಿ ಹಾಗೂ ಶಾಲಾ ವಲಯಗಳಲ್ಲಿನ ಶಬ್ಧ ಮಾಲಿನ್ಯ ಮಟ್ಟವನ್ನು ಅಳೆಯಲಾಗಿದೆ. 60-65 ಡಿಬಿಗಿಂತ ಹೆಚ್ಚಿನ ಸದ್ದು, ದೇಹದಲ್ಲಿ ಒತ್ತಡ ಸೃಷ್ಟಿ ಮಾಡುವ ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡಲು ಸಹಕರಿಸುತ್ತದೆ. ಇದರಿಂದ ಮನುಷ್ಯನ ನಡತೆಯಲ್ಲಿ ಹೆಚ್ಚು ಕೋಪ ಮನೋಭಾವನೆ ಬೆಳೆಯುತ್ತದೆ.

ಶಾಲಾ ವಲಯಗಳಲ್ಲೂ 70ಡಿಬಿಯಷ್ಟು ಶಬ್ಧ ಮಾಲಿನ್ಯವಾಗುತ್ತಿದೆ ಎಂದು ಅಧಿಕಾರಿಗಳು ಕಂಡುಕೊಂಡಿದ್ದಾರೆ. ಹೊರಭಾಗದ ಗಲಾಟೆಗಳಿಂದ ತರಗತಿ ಒಳಗೆ ಶಿಕ್ಷಕರ ಮಾತುಗಳು ಮಕ್ಕಳಿಗೆ ತಲುಪುವುದು ನಿಯಮಿತವಾಗುತ್ತಿದೆ. ಇದರಿಂದ ಮಕ್ಕಳ ಒಟ್ಟಾರೆ ಬೆಳವಣಿಗೆ ಕುಂಠಿತವಾಗುತ್ತಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.