ಬೆಂಗಳೂರು ಜನರಿಗೆ ಮೀಸಲಿಟ್ಟ ನಂಬರ್‌ಗೆ ರಾಜ್ಯದ ಮೂಲೆ ಮೂಲೆಗಳಿಂದ ಕರೆಗಳು: ಪೊಲೀಸರಿಗೆ ಕಿರಿಕಿರಿ

ಬೆಂಗಳೂರು: ರೌಡಿ ಚಟುವಟಿಕೆಗಳಿಗೆ ಬ್ರೇಕ್‌ ಹಾಕುವ ಸಲುವಾಗಿ ಸಿಸಿಬಿ ಅಧಿಕಾರಿಗಳು ಸಾರ್ವಜನಿಕರಿಗೆ ಮೀಸಲಿಟ್ಟ ಫೋನ್‌ ನಂಬರಿಗೆ ಇದುವರೆಗೂ 150ಕ್ಕೂ ಹೆಚ್ಚು ಕರೆಗಳು ಬಂದಿವೆ. ಆದರೆ, ಬೆಂಗಳೂರಿಗೆ ಮೀಸಲಾಗಿದ್ದ ಈ ನಂಬರ್‌ಗೆ ರಾಜ್ಯದ ಮೂಲೆ ಮೂಲೆಗಳಿಂದ ಕರೆಗಳು ಬರುತ್ತಿರುವುದರಿಂದ ಹೊಸ ತಲೆ ನೋವು ಸೃಷ್ಟಿಯಾಗಿದೆ.

ಅಪರಾಧ ವಿಭಾಗದ ಹೆಚ್ಚುವರಿ ಆಯುಕ್ತರಾಗಿ ಅಲೋಕ್‌ಕುಮಾರ್‌ ಅವರು ಬಂದ ನಂತರ 9480801555 ನಂಬರನ್ನು ಸಾರ್ವಜನಿಕರಿಗೆ ನೀಡಲಾಗಿತ್ತು. ಪತ್ರಿಕಾಗೋಷ್ಠಿಯಲ್ಲಿ ಈ ನಂಬರ್‌ ಅನ್ನು ಘೋಷಿಸಿ, ಬೆಂಗಳೂರಿನಲ್ಲಿ ರೌಡಿಗಳಿಂದ ತೊಂದರೆ ಆದರೆ, ಹಫ್ತಾ ವಸೂಲಿ ಸೇರಿದಂತೆ ಕಾನೂನುಬಾಹಿರ ಚಟುವಟಿಕೆಗಳು ಗಮನಕ್ಕೆ ಬಂದರೆ ಕರೆ ಮಾಡಿ ತಿಳಿಸುವಂತೆ ಕೋರಲಾಗಿತ್ತು. ಆದರೆ ಆ ಸಂಖ್ಯೆಗೆ ರಾಜ್ಯದ ಮೂಲೆ ಮೂಲೆಗಳಿಂದ ರಾಶಿ ರಾಶಿ ಕರೆಗಳು ಬರುತ್ತಿದ್ದು, ಅವರಿಗೆ ಉತ್ತರ ಕೊಡುವುದೇ ಸವಾಲಾಗಿದೆ.

ಬೀದರ್‌, ಕಲಬುರಗಿ, ರಾಯಚೂರು, ಮಂಡ್ಯ, ಆನೇಕಲ್‌, ಕೋಲಾರ ಮುಂತಾದ ಭಾಗಗಳಿಂದ ಕರೆಗಳು ಬರುತ್ತಿವೆ. ಅವುಗಳಲ್ಲಿ ಬಹುತೇಕ ಅಕ್ಕ ಪಕ್ಕದ ಮನೆ ಜಗಳ, ಕಾಂಪೌಂಡ್‌ ಜಗಳ, ನ್ಯಾಯಾಲಯದ ಮೆಟ್ಟಿಲೇರಿರುವ ಭೂ ವ್ಯಾಜ್ಯಗಳು, ಪಕ್ಕದ ಮನೆಯವರು ಜೋರಾಗಿ ಟೀವಿ ಸೌಂಡ್‌ ಕೊಟ್ಟಿದ್ದಾರೆ ಎನ್ನುವುದರಿಂದ ಹಿಡಿದು ವೈಯಕ್ತಿಕ ಜಗಳದ ಬಗ್ಗೆಯೇ ಹೆಚ್ಚಾಗಿ ಕರೆಗಳು ಬರುತ್ತಿವೆ. ಕರೆ ಸ್ವೀಕರಿಸಿದರೆ, ನಿರಂತರ 4 ನಿಮಿಷಗಳವರೆಗೂ ದೂರು ಹೇಳುತ್ತಾರೆ. ಹೀಗಾಗಿ ಸಿಬ್ಬಂದಿಗಳು ‘ಇದು ರೌಡಿಗಳ ನಿಯಂತ್ರಣಕ್ಕೆ ಮೀಸಲಾದ ಸಂಖ್ಯೆ’ ಎಂದು ಹೇಳುವುದರಲ್ಲೇ ಹೈರಾಣಾಗುತ್ತಾರೆ.

ನಾಲ್ಕು ಪ್ರಕರಣಗಳ ವಿಚಾರಣೆ

ಇದುವರೆಗೆ ಬಂದ 150 ಕರೆಗಳಲ್ಲಿ 4 ಕರೆಗಳು ಬೆಂಗಳೂರಿನ ರೌಡಿ ಚಟುವಟಿಕೆ ಬಗ್ಗೆ ಇದೆ. ಈ ಬಗ್ಗೆ ದೂರು ಬಂದ ತಕ್ಷಣ ಸಂಬಂಧಪಟ್ಟ ರೌಡಿಗಳನ್ನು ಕರೆಸಿ ಕಾನೂನು ಕ್ರಮದ ಎಚ್ಚರಿಕೆಯನ್ನೂ ನೀಡಲಾಗಿದೆ. ಒಂದಿಬ್ಬರನ್ನು ತೀವ್ರ ವಿಚಾರಣೆಗೂ ಒಳಪಡಿಸಲಾಗಿದೆ.

ಅವನೂ ರೌಡಿ ಥರಾನೇ

ಕರೆಗಳು ಅನಗತ್ಯವಾದರೂ, ಎಲ್ಲವನ್ನೂ ಕೇಳಿಸಿಕೊಳ್ಳಲೇಬೇಕಾದ ಅನಿವಾರ್ಯತೆ ಸಿಬ್ಬಂದಿಗೆ ಎದುರಾಗಿದೆ. ಸಿಬ್ಬಂದಿ, ‘ಇದು ಬೆಂಗಳೂರಿನ ರೌಡಿಗಳ ಮೇಲೆ ನಿಗಾ ಇಡಲು ಕೊಟ್ಟಿರುವ ನಂಬರ್‌’ ಎಂದು ಹೇಳಿದರೂ ‘‘ನಮ್ಮ ಪಕ್ಕದ ಮನೆಯವನೂ ಒಂಥರಾ.. ರೌಡಿ ಥರಾನೇ ಆಡ್ತಾನೆ’’ ಎನ್ನುವ ಉತ್ತರ ಆ ಕಡೆಯಿಂದ ಬರುತ್ತಿದೆ. ಹೀಗಾಗಿ ಬೆಂಗಳೂರಿಗೆ ಮಾತ್ರ ಲಭ್ಯ ಆಗುವಂತೆ ತಾಂತ್ರಿಕ ಬದಲಾವಣೆ ಮಾಡುವ ಅಗತ್ಯವಿದೆ ಎನ್ನುತ್ತಾರೆ ಸಿಬ್ಬಂದಿಗಳು.

ಮೀಡಿಯಾ ಕ್ಲಬ್‌ ಮೇಲೆ ದಾಳಿ

ನಗರದಾದ್ಯಂತ ಇಸ್ಪೀಟ್‌ ಕ್ಲಬ್‌ಗಳ ಮೇಲೆ ಪ್ರತಿನಿತ್ಯ ದಾಳಿ ನಡೆಸುತ್ತಿರುವ ಸಿಸಿಬಿ ಅಧಿಕಾರಿಗಳ ತಂಡ ಭಾನುವಾರ ಸಂಜೆ ಜಯನಗರ ನಾಲ್ಕನೇ ಹಂತದಲ್ಲಿರುವ ಕರ್ನಾಟಕ ಮೀಡಿಯಾ ಕ್ಲಬ್‌ ಮೇಲೂ ದಾಳಿ ನಡೆಸಿ 78 ಮಂದಿಯನ್ನು ಬಂಧಿಸಿ 2.5 ಲಕ್ಷ ರೂ. , 6 ಲಕ್ಷ ರೂ. ಮೌಲ್ಯದ ಟೋಕನ್‌ಗಳನ್ನು ವಶಪಡಿಸಿಕೊಂಡಿದೆ.
ನಂತರ ಜಯನಗರದ ಕಾರ್ಡ್‌ಡೆಕ್‌ ಪೋಕರ್‌ ಕ್ಲಬ್‌ ಮೇಲೆ ನಡೆದ ದಾಳಿ ವೇಳೆ 29 ಮಂದಿಯನ್ನು ಬಂಧಿಸಿ 1.5 ಲಕ್ಷ ರೂ. ವಶಪಡಿಸಿಕೊಳ್ಳಲಾಗಿದೆ. ಆರ್‌ಆರ್‌ ನಗರದ ಬೆಸ್ಟ್‌ ಕ್ಲಬ್‌ ಮೇಲೆ ನಡೆದ ದಾಳಿಯಲ್ಲಿ 25 ಮಂದಿ ಬಂಧಿತರಾಗಿದ್ದು, 1,15,000 ವಶಪಡಿಸಿಕೊಂಡಿದ್ದಾರೆ. ರಾಜಾಜಿನಗರದ ಬಿಡಿಎಸ್‌ಎ ಕ್ಲಬ್‌ ಮೇಲೆ ದಾಳಿ ನಡೆಸಿ 15 ಮಂದಿಯನ್ನು ಬಂಧಿಸಿ 15 ಸಾವಿರ ರೂ ವಶಪಡಿಸಿಕೊಳ್ಳಲಾಗಿದೆ.

ರೌಡಿ ಆಸಾಮಿಗಳ ಬಂಧನ

ನವರಂಗ್‌ ಬಾರ್‌ನಲ್ಲಿ ಪಾರ್ಟಿ ಮಾಡುತ್ತಿದ್ದ ಸುಮಾರು 15 ಕ್ಕೂ ಹೆಚ್ಚು ಮಂದಿ ರೌಡಿಗಳನ್ನು ಮತ್ತು ಅವರ ಸಹಚರರನ್ನು ವಶಕ್ಕೆ ಪಡೆದ ಸಿಸಿಬಿ ಅಧಿಕಾರಿಗಳು ತೀವ್ರ ವಿಚಾರಣೆಗೆ ಒಳಪಡಿಸಿದ್ದಾರೆ.