ಇನ್ನೂ ಮುಂದೆ ರಾಜ್ಯ ಮಹಿಳಾ ಪೊಲೀಸರಿಗೆ ಪ್ಯಾಂಟ್‌, ಶರ್ಟ್‌ ಕಡ್ಡಾಯ

ಬೆಂಗಳೂರು: ಇನ್ನು ಮುಂದೆ ರಾಜ್ಯದ ಮಹಿಳಾ ಪೊಲೀಸರು ಸಮವಸ್ತ್ರವಾಗಿ ಪ್ಯಾಂಟ್‌-ಶರ್ಟ್‌ ಧರಿಸಬೇಕು ಎಂದು ಪೊಲೀಸ್‌ ಮಹಾ ನಿರ್ದೇಶಕಿ ನೀಲಮಣಿ ಎನ್‌. ರಾಜು ಅವರು ಶನಿವಾರ ಆದೇಶ ಹೊರಡಿಸಿದ್ದಾರೆ.

ಕಳೆದ ಹಲವು ವರ್ಷಗಳಿಂದ ಮಹಿಳಾ ಪೊಲೀಸರು ತಮ್ಮ ಅನುಕೂಲಕ್ಕಾಗಿ ಖಾಕಿ ಸೀರೆ ಧರಿಸುತ್ತಿದ್ದರು. ಅದಕ್ಕೆ ಇಲಾಖೆಯಲ್ಲಿ ಅವಕಾಶ ಕಲ್ಪಿಸಲಾಗಿತ್ತು. ಆದರೆ, ಹೊಸ ಸುತ್ತೋಲೆಯಲ್ಲಿ ಖಾಕಿ ಸೀರೆ ಧರಿಸುವ ಪದ್ಧತಿಗೆ ಅಂತ್ಯ ಹಾಡಲಾಗಿದೆ.

2018ರ ಸೆ.3ರಂದು ಪೊಲೀಸ್‌ ಪ್ರಧಾನ ಕಚೇರಿಯಲ್ಲಿ ಡಿಜಿಪಿ ನೀಲಮಣಿ ರಾಜು ಅವರ ನೇತೃತ್ವದ ಸಮವಸ್ತ್ರದ ಕುರಿತಾದ ಸಮಿತಿ ಸಭೆಯಲ್ಲಿ ಸೀರೆ ಧರಿಸುವುದಕ್ಕೆ ಅಂತ್ಯ ಹಾಡುವುದರ ಜತೆಗೆ, ಸಿಬ್ಬಂದಿ ಹೂವು ಮುಡಿದುಕೊಳ್ಳುವಂತಿಲ್ಲ ಮತ್ತು ಕೈಗೆ ಒಂದು ಲೋಹದ ಬಳೆ ಧರಿಸಬಹುದು ಎಂದು ತಿಳಿಸಲಾಗಿದೆ.

ಸಭೆಯಲ್ಲಿ ಮಹಿಳಾ ಕಾನ್ಸ್‌ಟೇಬಲ್‌ಗಳಿಂದ ಹಿಡಿದು ವಿವಿಧ ಹಂತದ ಅಧಿಕಾರಿಗಳು ಭಾಗವಹಿಸಿ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದರು. ಅದರಲ್ಲಿ ಸೀರೆಯ ವಿಷಯ ಪ್ರಮುಖವಾಗಿ ಚರ್ಚೆಯಾಗಿದೆ. ಕಾನೂನು ಸುವ್ಯವಸ್ಥೆ ಕಾಪಾಡುವ ಸಮಯದಲ್ಲಿ ಅಪರಾಧ ಕೃತ್ಯ ಸ್ಥಳಕ್ಕೆ ಭೇಟಿ ನೀಡುವಾಗ, ಕೈದಿಗಳನ್ನು ಬೆಂಗಾವಲು ಮಾಡುವಾಗ, ಕಳ್ಳರನ್ನು ಬೆನ್ನಟ್ಟಿ ಹಿಡಿಯುವಾಗ ಮತ್ತು ಇನ್ನಿತರೆ ಕರ್ತವ್ಯಗಳ ಸಮಯದಲ್ಲಿ ಸೀರೆಯನ್ನು ಧರಿಸಿ ಕೆಲಸ ನಿರ್ವಹಿಸುವುದು ಕಷ್ಟ ಎಂಬ ಅಭಿಪ್ರಾಯ ವ್ಯಕ್ತವಾಗಿತ್ತು.

ಸಮವಸ್ತ್ರದ ಹೊರತಾಗಿ ಅಧಿಕಾರಿ ಮತ್ತು ಸಿಬ್ಬಂದಿ ಕೇಶವಿನ್ಯಾಸ, ಕಿವಿಯೋಲೆ, ಹಣೆತಿಲಕ ಮತ್ತು ಬಳೆಗಳನ್ನು ಧರಿಸುವ ಸಂಬಂಧ ಕೆಲವು ಸೂಚನೆ ಪಾಲಿಸಬೇಕು. ರಾಜ್ಯದ ಎಲ್ಲ ಘಟಕಾಧಿಕಾರಿಗಳು ಸುತ್ತೋಲೆಯಲ್ಲಿ ಅಂಶಗಳನ್ನು ಯಥಾವತ್ತಾಗಿ ತಕ್ಷಣದಿಂದಲೇ ಜಾರಿಗೆ ತರಲು ಸೂಕ್ತ ಕ್ರಮ ತೆಗೆದುಕೊಳ್ಳಬೇಕು ಎಂದು ತಿಳಿಸಲಾಗಿದೆ.

ಇಲಾಖೆಯ ಪ್ರತಿ ಸಿಬ್ಬಂದಿಯಲ್ಲಿ ಏಕರೂಪ ಶಿಸ್ತು ತರಲು ಮತ್ತು ಸೀರೆ ಧರಿಸುವುದರಿಂದ ಅನಾನುಕೂಲ ಆಗುವುದನ್ನು ತಪ್ಪಿಸಲು ಈ ಸುತ್ತೋಲೆ ಹೊರಡಿಸಲಾಗಿದೆ. ಮಹಿಳಾ ಸಿಬ್ಬಂದಿಯ ಅಭಿಪ್ರಾಯಗಳನ್ನು ಪಡೆದೇ ಈ ತೀರ್ಮಾನಕ್ಕೆ ಬರಲಾಗಿದೆ. ಇಲಾಖೆಯಲ್ಲಿ ಸಮಾನ ಶಿಸ್ತು ಪಾಲಿಸುವ ಉದ್ದೇಶದ ಸುತ್ತೋಲೆಯಿಂದ ಮಹಿಳಾ ಸಿಬ್ಬಂದಿಗೆ ಯಾವುದೇ ಸಮಸ್ಯೆ ಉಂಟಾಗುವುದಿಲ್ಲ ಎಂದು ಉನ್ನತ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದರು.

ಕೇಶ ವಿನ್ಯಾಸ ಹೇಗಿರಬೇಕು?
ತಲೆಗೂದಲು ಹರಡದಂತೆ ಒಟ್ಟುಗೂಡಿಸಿ ತುರುಬು ಕಟ್ಟಿಕೊಂಡು ಕಪ್ಪು ಬಣ್ಣದ ನೆಟ್ಟೆಡ್‌ ಬ್ಯಾಂಡ್‌ ಸುತ್ತಬೇಕು. ಕಪ್ಪು ಬಣ್ಣದ ಹೇರ್‌ಪಿನ್‌, ಹೇರ್‌ ಬ್ಯಾಂಡ್‌ ಮಾತ್ರ ಧರಿಸಬೇಕು. ಇತರೆ ಬಣ್ಣದ ಹೇರ್‌ ಪಿನ್‌, ಹೇರ್‌ ಬ್ಯಾಂಡ್‌, ಹೂವು ಅಥವಾ ಇತರೆ ಪರಿಕರಗಳನ್ನು ಧರಿಸುವಂತಿಲ್ಲ. ಕೂದಲಿಗೆ ಬಣ್ಣ ಹಚ್ಚುವಂತಿದ್ದಲ್ಲಿ ಕಪ್ಪು ಬಣ್ಣದ ಡೈ ಮಾತ್ರ ಬಳಸಬೇಕು.

ಕಿವಿಯೋಲೆ, ತಿಲಕ, ಬಳೆ ಹೇಗಿರಬೇಕು?
ಕಿವಿಯೋಲೆ ಮತ್ತು ಹಣೆಬಿಂದಿಯನ್ನು ಧರಿಸುವಂತಿದ್ದಲ್ಲಿ ಚಿಕ್ಕ ಮಾದರಿಯ ಒಂದು ಜೊತೆ ಚಿಕ್ಕ ಓಲೆಯನ್ನು ಮಾತ್ರ ಧರಿಸುವುದು ಮತ್ತು ಚಿಕ್ಕ ಹಣೆ ಬಿಂದಿಯನ್ನು ಮಾತ್ರ ಇಟ್ಟುಕೊಳ್ಳಬೇಕು. ಬಳೆಯನ್ನು ಹಾಕಿಕೊಳ್ಳುವಂತಿದ್ದರೆ ಒಂದು ಸಣ್ಣ ಗಾತ್ರದ ಲೋಹದ ಬಳೆಯನ್ನು ಮಾತ್ರ ಧರಿಸಬಹುದು.