ನಾಗಿನ್​ ಸಿನಿಮಾದ ಹಾಡಿಗೆ ಸ್ಟೆಪ್ ಹಾಕಿದ ಸಚಿವ ಎಂಟಿಬಿ ನಾಗರಾಜ್

ಬೆಂಗಳೂರು: ಹಿಂದೊಮ್ಮೆ ಸಚಿವ ಸ್ಥಾನ ಕೊಡದೆ ಇದ್ದರೆ ಗಂಟು ಮೂಟೆ ಕಟ್ಟಿಕೊಂಡು ಹೋಗುತ್ತೇನೆ ಎಂದು ಕಾಂಗ್ರೆಸ್​-ಜೆಡಿಎಸ್​ ಮೈತ್ರಿ ಸರ್ಕಾರದ ವಿರುದ್ಧ ಹರಿಹಾಯ್ದಿದ್ದ ವಸತಿ ಸಚಿವ ಎಂಟಿಬಿ ನಾಗರಾಜ್​ ಅವರು ಈಗ ಫುಲ್​ ಖುಷಿಯಾಗಿ ನಾಗಿಣಿ ನೃತ್ಯ ಮಾಡಿದ್ದಾರೆ.

ಚಿಕ್ಕಬಳ್ಳಾಪುರ ಲೋಕಸಭಾ ಕ್ಷೇತ್ರದ ವ್ಯಾಪ್ತಿಯ ಹೊಸಕೋಟೆಯಲ್ಲಿ ಅಭ್ಯರ್ಥಿ ವೀರಪ್ಪ ಮೊಯ್ಲಿ ಅವರ ಚುನಾವಣಾ ಪ್ರಚಾರದಲ್ಲಿ ತೊಡಗಿದ್ದ ಎಂಟಿಬಿ, ತಮ್ಮ ಪಕ್ಷದ ಕಾರ್ಯಕರ್ತರೊಂದಿಗೆ ಸೇರಿ ಹಿಂದಿಯ ನಾಗಿನ್​ ಸಿನಿಮಾನದ ಸಂಗೀತಕ್ಕೆ ಸಖತ್​ ಸ್ಟೆಪ್​ ಹಾಕಿ ಮತದಾರರನ್ನು ಸೆಳೆಯುವ ಯತ್ನ ಮಾಡಿದ್ದಾರೆ.

1954ರಲ್ಲಿ ತೆರೆ ಕಂಡಿದ್ದ ನಾಗಿನ್​ ಸಿನಿಮಾದ ಮನ್​ ಢೋಲೆ, ತೇರಾ ತನ್​ ಢೋಲೆ ಹಾಡಿನ ಸ್ವರಕ್ಕೆ 67 ವರ್ಷದ ನಾಗರಾಜ್​ ಅವರು ಮೊದಲು ನೃತ್ಯ ಮಾಡಲು ಶುರು ಮಾಡಿದರು. ಕೈ ಮೇಲೆತ್ತಿ ಹಾವಿನ ಹೆಡೆಯಂತೆ ಆಡಿಸುತ್ತ ಸ್ಟೆಪ್​ ಹಾಕಲು ಶುರು ಮಾಡಿದ ಅವರಿಗೆ ಹಲವು ಕಾರ್ಯಕರ್ತರು ಸಾಥ್​ ನೀಡಿದರು. ಸುಮಾರು 10 ನಿಮಿಷಗಳ ಈ ನೃತ್ಯದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್​ ವೈರಲ್​ ಆಗಿದೆ.