ಬೆಂಗಳೂರು: ಪೇಂಟಿಂಗ್‌ ಮೆಚ್ಚಿ ವಿದೇಶದಿಂದ ಉಡುಗೊರೆ ಕಳುಹಿಸುವುದಾಗಿ ನಂಬಿಸಿದ ಇನ್‌ಸ್ಟಾಗ್ರಾಂ ಸೈಬರ್‌ ಖದೀಮ ಸ್ನೇಹಿತನೊಬ್ಬ, ನಗರದ ಶಿಕ್ಷಕಿಯೊಬ್ಬರಿಂದ 1.20 ಲಕ್ಷ ರೂ. ವರ್ಗಾವಣೆ ಮಾಡಿಕೊಂಡು ವಂಚಿಸಿದ್ದಾನೆ. ನಗರದ ಖಾಸಗಿ ಶಾಲೆಯ ಶಿಕ್ಷಕಿಯೊಬ್ಬರು ಈ ಸಂಬಂಧ ಯಶವಂತಪುರ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ.
ಇನ್‌ಸ್ಟಾಗ್ರಾಂನಲ್ಲಿರುವ ಶಿಕ್ಷಕಿಗೆ ಯುಕೆ ಲಿವರ್‌ ಪೂಲ್‌ ಏರಿಯಾ ನಿವಾಸಿ ಎಂದು ಹೇಳಿಕೊಂಡಿದ್ದ ವಿಲಿಯಮ್‌ ಜಾಕ್‌ ಎಂಬಾತ ಫ್ರೆಂಡ್‌ ಆಗಿದ್ದ. ನಂತರ ಪರಿಚಯ ವಾಗಿ, ಫೋನ್‌ ನಂಬರ್‌ ಪಡೆದುಕೊಂಡು ವಾಟ್ಸ್‌ಆ್ಯಪ್‌ ಮೂಲಕ ಸಂದೇಶ ಕಳುಹಿಸುವುದು, ಕಾಲ್‌ ಮಾಡುವುದು ಮಾಡುತ್ತಿದ್ದ. ನಿಮ್ಮ ಪೇಟಿಂಗ್‌ಗಳು ತುಂಬಾ ಚೆನ್ನಾಗಿವೆ. ಅವುಗಳನ್ನು ನನ್ನ ಮಗಳು ಮೆಚ್ಚಿಕೊಂಡಿದ್ದಾಳೆ. ಹೀಗಾಗಿ, ನಿಮ್ಮನ್ನು ಆಗಾಗ ಸಂಪರ್ಕಿಸುತ್ತೇನೆ ಎಂದು ಸಂದೇಶ ಕಳುಹಿಸುತ್ತಿದ್ದ.
ನ.15ರಂದು ಪರಿಚಯವಾಗಿದ್ದ ಜಾಕ್‌, ನಿಮ್ಮ ಪೇಟಿಂಗ್‌ ಮೆಚ್ಚಿ ನಾನು ಉಡುಗೊರೆ ಕಳುಹಿಸುತ್ತಿದ್ದೇನೆ. ಅದನ್ನು ಸ್ವೀಕರಿಸಿ ಎಂದು ನ.21ರಂದು ವಾಟ್ಸ್‌ಆ್ಯಪ್‌ ಸಂದೇಶ ಕಳುಹಿಸಿದ್ದ. ಅಲ್ಲದೇ, ಶಿಕ್ಷಕಿಯ ವಿಳಾಸ ಪಡೆದುಕೊಂಡಿದ್ದ. ‘ವಾಟ್ಸ್‌ಆ್ಯಪ್‌ನಲ್ಲಿ ಉಡುಗೊರೆ ಪಾರ್ಸಲ್‌ ಫೋಟೋ, ಕೋರಿಯರ್‌ ಮಾಡಿರುವ ರಸೀದಿ ಕಳುಹಿಸಿದ್ದ. ನಾನು ಕಳುಹಿಸಿರುವ ಉಡುಗೊರೆ ಅತ್ಯಂತ ಅಮೂಲ್ಯವಾದದ್ದು. ಅದನ್ನು ಸ್ವೀಕರಿಸಿ, ಎಂದು ನನಗೆ ನಂಬಿಕೆ ಬರುವಂತೆ ಮಾಡಿದ’ ಎಂದು ದೂರಿನಲ್ಲಿ ಶಿಕ್ಷಕಿ ವಿವರಿಸಿದ್ದಾರೆ.
ಉಡುಗೊರೆ ಬಿಡಿಸಿಕೊಳ್ಳಲು ಶುಲ್ಕ ಕಟ್ಟಬೇಕಾಗಿದೆ ಎಂದು ಹೇಳಿ ಭಾರತೀಯ ತೆರಿಗೆ, ವಿಮಾನ ನಿಲ್ದಾಣದ ಕಸ್ಟಮ್ಸ್‌ ಶುಲ್ಕ ಸೇರಿದಂತೆ ಹಲವು ಶುಲ್ಕಗಳ ಸೋಗಿನಲ್ಲಿಬೇರೊಬ್ಬ ವ್ಯಕ್ತಿ ಕರೆ ಮಾಡಿ ಶಿಕ್ಷಕಿಯಿಂದ ವಿವಿಧ ಹಂತಗಳಲ್ಲಿನ.26ರವರೆಗೆ ವಿವಿಧ ಬ್ಯಾಂಕ್‌ ಖಾತೆಗಳಿಗೆ 1.20 ಲಕ್ಷ ರೂ.ಗಳನ್ನು ವರ್ಗಾವಣೆ ಮಾಡಿಸಿಕೊಂಡಿದ್ದಾನೆ. ಒಂದು ಶುಲ್ಕ ಕಟ್ಟಿದ ಬಳಿಕ ಮತ್ತೊಂದು ಶುಲ್ಕವೆಂದು ಹಣವನ್ನು ವರ್ಗಾವಣೆ ಮಾಡಿಸಿಕೊಳ್ಳುತ್ತಲೇ ಇದ್ದುದ್ದರಿಂದ ಅನುಮಾನಗೊಂಡ ಶಿಕ್ಷಕಿಗೆ ಮೋಸ ಹೋಗಿರುವುದು ಗೊತ್ತಾಗಿದೆ. ಅಂತಿಮವಾಗಿ ಯಶವಂತಪುರ ಪೊಲೀಸ್‌ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ.
Comments are closed.