ಮುಂಬಯಿ: ಸಮಾನ ಅಧಿಕಾರ ಹಂಚಿಕೆ ಸೂತ್ರದಿಂದ ಹಿಂದೆ ಸರಿಯುವ ಮಾತೇ ಇಲ್ಲ ಎಂದು ಶಿವಸೇನೆ ಶುಕ್ರವಾರ ಮತ್ತೊಮ್ಮೆ ಸ್ಪಷ್ಟಪಡಿಸಿದ್ದರೂ, ನವೆಂಬರ್ 5 ಅಥವಾ 6ರಂದು ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್‌ ಅವರ ಪ್ರಮಾಣ ವಚನ ಸ್ವೀಕಾರ ಸಮಾರಂಭ ಆಯೋಜಿಸಲು ಬಿಜೆಪಿ ಸಿದ್ಧತೆ ನಡೆಸಿದೆ.
ಶಿವಸೇನೆ ಮುಖಂಡ ಸಂಜಯ್‌ ರಾವತ್‌ ಅವರು ಗುರುವಾರ ರಾತ್ರಿ ಎನ್‌ಸಿಪಿ ಮುಖಂಡ ಶರದ್‌ ಪವಾರ್‌ ಅವರನ್ನು ಭೇಟಿ ಮಾಡಿ ಚರ್ಚಿಸಿದ್ದರು. ಜನಾದೇಶಕ್ಕೆ ವಿರುದ್ಧವಾಗಿ ತಾವು ಸರಕಾರ ರಚಿಸುವುದಿಲ್ಲ ಎಂದು ಪವಾರ್‌ ಸ್ಪಷ್ಟಪಡಿಸಿದ್ದಾರೆ ಎನ್ನಲಾಗಿದೆ. ಅದರ ಬೆನ್ನಲ್ಲೇ ಬಿಜೆಪಿ ಪ್ರಮಾಣ ವಚನ ಸ್ವೀಕಾರ ಸಮಾರಂಭದ ದಿನಾಂಕ ನಿಗದಿಪಡಿಸಿದೆ.
‘ಮೈತ್ರಿಕೂಟದಿಂದ ಶಿವಸೇನೆ ಹೊರಗಿದ್ದರೂ ಎರಡನೇ ಅವಧಿಗೆ ಸಿಎಂ ಆಗಿ ಫಡ್ನವಿಸ್‌ ಪ್ರಮಾಣವಚನ ಸ್ವೀಕರಿಸುವುದು ಖಚಿತ. ವಾಂಖೆಡೆ ಕ್ರೀಡಾಂಗಣದಲ್ಲಿ ಸಮಾರಂಭ ಆಯೋಜಿಸಲು ನಿರ್ಧರಿಸಲಾಗಿದ್ದು, ಇದರ ಹೊಣೆಯನ್ನು ರಾಜ್ಯ ಬಿಜೆಪಿ ಅಧ್ಯಕ್ಷ ಚಂದ್ರಕಾಂತ ಪಾಟೀಲ್‌ ಹಾಗೂ ಪ್ರಸಾದ್‌ ಲಾಡ್‌ ಅವರಿಗೆ ನೀಡಲಾಗಿದೆ’ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ. ಪಕ್ಷೇತರರು ಹಾಗೂ ಸಣ್ಣಪುಟ್ಟ ಎಲ್ಲಾ ಶಾಸಕರ ಬೆಂಬಲವನ್ನು ಒಗ್ಗೂಡಿಸಿದರೂ ಬಿಜೆಪಿಗೆ ಮ್ಯಾಜಿಕ್‌ ನಂಬರ್‌ ತಲುಪಲು 11 ಶಾಸಕರ ಬೆಂಬಲದ ಕೊರತೆ ಕಾಡಲಿದೆ.
ಎನ್‌ಸಿಪಿ ನಿಲುವು ಅಚಲ: ವಿಧಾನಸಭೆ ಚುನಾವಣೆ ಫಲಿತಾಂಶ ಪ್ರಕಟವಾದ ದಿನ (ಅ.24)ರಿಂದಲೂ ಎನ್‌ಸಿಪಿ ನಿಲುವು ಅಚಲವಾಗಿದೆ. ‘ಬಿಜೆಪಿ-ಶಿವಸೇನೆ ನಡುವೆ ಚುನಾವಣಾ ಪೂರ್ವ ಮೈತ್ರಿ ಏರ್ಪಟ್ಟಿತ್ತು. ಹೀಗಾಗಿ ಆ ಮೈತ್ರಿಕೂಟಕ್ಕೆ ಜನಾದೇಶ ಲಭಿಸಿದೆಯೇ ವಿನಾ ಎನ್‌ಸಿಪಿ-ಕಾಂಗ್ರೆಸ್‌ ಮೈತ್ರಿಕೂಟಕ್ಕೆ ಅಲ್ಲ. ನಾವು ವಿರೋಧ ಪಕ್ಷದಲ್ಲಿ ಕೂರಬೇಕೆಂದು ಜನ ಆದೇಶ ಕೊಟ್ಟಿದ್ದಾರೆ. ಅದಕ್ಕೆ ವಿರುದ್ಧವಾಗಿ ಸರಕಾರ ರಚಿಸುವ ಪ್ರಯತ್ನ ಮಾಡುವುದಿಲ್ಲ’ ಎನ್ನುವ ಮೂಲಕ ಎನ್‌ಸಿಪಿ ವರಿಷ್ಠ ಶರದ್‌ ಪವಾರ್‌ ಮುತ್ಸದ್ದಿತನ ಮೆರೆದಿದ್ದಾರೆ. ಕಾಂಗ್ರೆಸ್‌ನ ಪೃಥ್ವಿರಾಜ್‌ ಚೌಹಾಣ್‌ ಅವರು, ಶಿವಸೇನೆ-ಎನ್‌ಸಿಪಿ-ಕಾಂಗ್ರೆಸ್‌ ಜತೆಯಾಗಿ ಸರಕಾರ ರಚಿಸುವ ಪ್ರಸ್ತಾವ ಇಟ್ಟಾಗಲೂ ಶರದ್‌ ಪವಾರ್‌ ನಿಲುವು ಬದಲಿಸಲಿಲ್ಲ. ಪಕ್ಷದ ಹಿರಿಯ ನಾಯಕ ಅಜಿತ್‌ ಪವಾರ್‌ ಅವರು, ‘ಬಿಜೆಪಿ-ಶಿವಸೇನೆ ಜಗಳ ಏನೇ ಇರಲಿ, ನಾವಂತೂ ಪ್ರತಿಪಕ್ಷ ಸಾಲಿನಲ್ಲಿಯೇ ಕೂರುತ್ತೇವೆ’ ಎಂದು ಶುಕ್ರವಾರವೂ ಸ್ಪಷ್ಟಪಡಿಸಿದ್ದಾರೆ. ಅಲ್ಲಿಗೆ ಶಿವಸೇನೆ ಎಷ್ಟೇ ಕಸರತ್ತು ನಡೆಸಿದರೂ ಸರಕಾರ ರಚನೆಗೆ ಅಗತ್ಯ ಸಂಖ್ಯಾಬಲ ಕ್ರೋಡೀಕರಿಸುವುದು ಸಾಧ್ಯವಿಲ್ಲ ಎನ್ನುವುದು ಖಚಿತವಾಗಿದೆ.
ನಾಟಕ ನಂಬಬೇಡಿ: ‘ಶಿವಸೇನೆಯ ನಾಟಕ ನಂಬಿ ಮೋಸ ಹೋಗಬೇಡಿ’ ಎಂದು ಕಾಂಗ್ರೆಸ್‌ನ ಹಿರಿಯ ನಾಯಕ ಸಂಜಯ್‌ ನಿರುಪಮ್‌ ಅವರು ತಮ್ಮ ಪಕ್ಷದ ಮುಖಂಡರಿಗೆ ಎಚ್ಚರಿಕೆ ನೀಡಿದ್ದಾರೆ. ‘ಬಿಜೆಪಿ ಜತೆಗೆ ಜಗಳಕ್ಕೆ ಮುಂದಾಗುವ ಮೂಲಕ ಶಿವಸೇನೆ ನಾಟಕವಾಡುತ್ತಿದೆ. ಅದರ ಅಸಲಿ ಆಟ ಬೇರೆಯೇ ಇದೆ. ಅದನ್ನು ಅರ್ಥಮಾಡಿಕೊಳ್ಳದೇ ಶಿವಸೇನೆ ಜತೆ ಚಲ್ಲಾಟವಾಡಲು ಹೋದರೆ ಕೈ ಸುಟ್ಟುಕೊಳ್ಳಬೇಕಾದೀತು’ ಎಂದು ನಿರುಪಮ್‌ ಹೇಳಿದ್ದಾರೆ. ಕಾಂಗ್ರೆಸ್‌ ಸೇರುವ ಮುನ್ನ ನಿರುಪಮ್‌ ಅವರು ಶಿವಸೇನೆ ಸ್ಥಾಪಕ ಬಾಳಾಸಾಹೇಬ್‌ ಠಾಕ್ರೆ ಅವರ ಆಪ್ತವಲಯದಲ್ಲಿ ಗುರುತಿಸಿಕೊಂಡಿದ್ದರು.
ಅಗತ್ಯ ಸಂಖ್ಯಾಬಲ: ‘ಶಿವಸೇನೆಯವರೇ ಮುಖ್ಯಮಂತ್ರಿಯಾಗುವುದು ಖಚಿತ. ಶಿವಸೇನೆ ದೃಢ ನಿರ್ಧಾರ ಕೈಗೊಂಡರೆ ಸ್ಥಿರ ಸರಕಾರ ರಚನೆಗೆ ಅಗತ್ಯವಿರುವ ಸಂಖ್ಯಾಬಲ ಹೊಂದಿಸುವುದು ಕಷ್ಟವೇ ಅಲ್ಲ. 50:50 ಸೂತ್ರದಿಂದ ಹಿಂದೆ ಸರಿಯುವ ಮಾತೇ ಇಲ್ಲ. ತಲಾ ಎರಡೂವರೆ ವರ್ಷ ಅವಧಿಗೆ ಮುಖ್ಯಮಂತ್ರಿ ಪದವಿ ಹಂಚಿಕೊಳ್ಳಬೇಕೆಂಬ ಬೇಡಿಕೆಯನ್ನು ಯಾವ ಕಾರಣಕ್ಕೂ ಹಿಂದಕ್ಕೆ ಪಡೆಯುವುದಿಲ್ಲ’ ಎಂದು ಶಿವಸೇನೆ ಮುಖಂಡ ಸಂಜಯ್‌ ರಾವತ್‌ ಪುನರುಚ್ಚರಿಸಿದ್ದಾರೆ. ‘ಬರ ಹಾಗೂ ಪ್ರವಾಹದಿಂದ ಕಂಗೆಟ್ಟಿರುವ ರಾಜ್ಯದ ರೈತರಿಗೆ ಪರಿಹಾರ ಹಾಗೂ ಅಗತ್ಯ ನೆರವು ಬೇಕಾಗಿದೆಯೇ ವಿನಾ ಹೊಸ ಸರಕಾರ ಅಲ್ಲ’ ಎಂದು ಶಿವಸೇನೆ ತನ್ನ ಮುಖವಾಣಿ ‘ಸಾಮ್ನಾ’ದಲ್ಲಿ ಶುಕ್ರವಾರವೂ ಬಿಜೆಪಿ ವಿರುದ್ಧ ಕಿಡಿಕಾರಿದೆ.
Comments are closed.