ಚೆನ್ನೈ: ಬೆಳ್ಳಿತೆರೆಯ ಮೇಲೆ ಸೂಪರ್‌ ಸ್ಟಾರ್‌ ಆಗಿ ಇಡೀ ಚಿತ್ರರಂಗವನ್ನೇ ಆಳಿರುವ ರಜನಿಕಾಂತ್‌ ಈಗ ರಾಜಕೀಯ ರಂಗದ ಮೇಲೆ ತಮ್ಮ ಸ್ಟೈಲ್‌ ತೋರಿಸಲು ಬಂದಿದ್ದಾರೆ.
ಹೊಸ ವರ್ಷ ಆರಂಭಕ್ಕೆ ಮುನ್ನವೇ ಹೊಸ ಪಕ್ಷವನ್ನು ಕಟ್ಟುವ ಇರಾದೆ ವ್ಯಕ್ತಪಡಿಸಿರುವ ರಜನಿಕಾಂತ್‌ ಬುಧವಾರ ಪತ್ರಕರ್ತರ ಜತೆ ಮನ ಬಿಚ್ಚಿ ಮಾತನಾಡಿದ್ದಾರೆ.
ನಾನು ಕೂಡ ಈ ಹಿಂದೆ ಪತ್ರಕರ್ತನಾಗಿದ್ದೆ. ಬೆಂಗಳೂರಿನ ಖ್ಯಾತ ದೈನಿಕವೊಂದರಲ್ಲಿ ಪ್ರೂಫ್‌ ರೀಡರ್‌ ಆಗಿಯೂ ಸೇವೆ ಸಲ್ಲಿಸಿದ್ದೆ. ಕಂಡಕ್ಟರ್‌ ಆದ ಮೇಲೆ ಸಿನಿಮಾ ರಂಗ ಸೆಳೆಯಿತು. ಅಲ್ಲಿಂದ ಇಲ್ಲಿಯವರೆಗೂ ಸಾಗಿ ಬಂದಿದ್ದೇನೆ ಎಂದು ರಜನಿಕಾಂತ್‌ ತಮ್ಮ ಗತ ವೈಭವದ ದಿನಗಳನ್ನು ಮೆಲುಕು ಹಾಕಿದ್ದಾರೆ.
ಸಿನಿಮಾ ರಂಗಕ್ಕೆ ಜಿಗಿದ ಮೇಲೆ ಮೊದಲ ಬಾರಿಗೆ ತಮಿಳು ನಿಯತಕಾಲಿಕ – ಬೊಮ್ಮೈನಲ್ಲಿ 1976ರಲ್ಲಿ ನನ್ನ ಮೊದಲ ಸಂದರ್ಶನ ಪ್ರಕಟವಾಯಿತು. ಸಾಮಾನ್ಯವಾಗಿ ನಾನು ಮಾಧ್ಯಮದ ಮುಂದೆ ಕಾಣಿಸಿಕೊಳ್ಳುವುದಿಲ್ಲ. ಕೆಲವೊಮ್ಮೆ ಹೇಳಿಕೆಗಳನ್ನು ಕೊಟ್ಟಿದ್ದೂ ಉಂಟು (ಬಾಂಬ್‌ ಸಂಸ್ಕೃತಿ, ದೇವರು ಬಂದರೂ ತಮಿಳುನಾಡನ್ನು ಕಾಪಾಡಲು ಆಗುವುದಿಲ್ಲ). ಆದರೆ ಮಾಧ್ಯಮದ ಜತೆ ನನ್ನ ಸಂಬಂಧ ಅಷ್ಟಕ್ಕಷ್ಟೇ ಎಂದು ಸ್ಪಷ್ಟಪಡಿಸಿದ್ದಾರೆ.
ಈಗ ತಮಿಳುನಾಡಿನಲ್ಲಿ ಕ್ರಾಂತಿಯ ಅಗತ್ಯವಿದೆ. ಅದನ್ನು ಮಾಡಲು ಪ್ರಯತ್ನಿಸುತ್ತಿದ್ದೇನೆ. ಇದಕ್ಕಾಗಿ ಕೆಲವು ಕಾರ್ಯತಂತ್ರಗಳನ್ನು ರೂಪಿಸಲಾಗುತ್ತಿದೆ. ಮುಂದಿನ ಬಾರಿಯ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಎಲ್ಲ 234 ಕ್ಷೇತ್ರಗಳಲ್ಲಿಯೂ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಬೇಕಾಗಿದೆ ಎಂದು ಸೂಪರ್‌ ಸ್ಟಾರ್‌ ತಿಳಿಸಿದರು.
ಆಧ್ಯಾತ್ಮಿಕ ರಾಜಕೀಯತೆ ಒತ್ತು ನೀಡಲಾಗುವುದು. ಇದರರ್ಥ ಪ್ರಾಮಾಣಿಕ ಹಾಗೂ ಸತ್ಯದ ಮಾರ್ಗದಲ್ಲಿ ನಡೆಯುವುದು. ಯಾವುದೇ ಜಾತಿ, ಮತ, ಧರ್ಮ ಭೇದವಿಲ್ಲದೇ ಆಡಳಿತ ನಡೆಸುವುದೇ ನಮ್ಮ ಮುಖ್ಯ ಉದ್ದೇಶ ಎಂದು ರಜನಿಕಾಂತ್‌ ತಿಳಿಸಿದರು.
ಪಕ್ಷದ ಹೆಸರು, ಚಿಹ್ನೆ, ಲಾಂಛನ, ನೀತಿಯನ್ನು ರೂಪಿಸಲಾಗುತ್ತಿದೆ. ಅದಾದ ಮೇಲೆ ಮತ್ತೊಮ್ಮೆ ಮಾಧ್ಯಮದ ಮುಂದೆ ಬಂದೇ ಬರುತ್ತೇನೆ ಎಂದು ತಮ್ಮ ಎಂದಿನ ಸೈಲ್‌ನಲ್ಲಿಯೇ ಡೈಲಾಗ್‌ ಹೊಡೆದರು ರಜನಿಕಾಂತ್‌.
Comments are closed.