ನವದೆಹಲಿ: ಬಾಲಿವುಡ್ ನಟ ಅರ್ಮಾನ್ ಕೊಹ್ಲಿ ತಮ್ಮ ಪ್ರೇಯಸಿ ಮೇಲೆ ದೈಹಿಕ ಹಲ್ಲೆ ನಡೆಸಿದ ಆರೋಪದ ಮೇಲೆ ಪೊಲೀಸರಿಂದ ಬಂಧಿತರಾಗಿದ್ದಾರೆ.
ಅರ್ಮಾನ್ ಕೊಹ್ಲಿ ತಮ್ಮ ಪ್ರೇಯಸಿ ನೀರು ರಾಂಧವ ಜತೆ ಲಿವಿಂಗ್ ಟುಗೆದರ್ನಲ್ಲಿದ್ದರು. ಇವರಿಬ್ಬರ ನಡುವೆ ಹಣಕಾಸಿನ ವಿಚಾರಕ್ಕೆ ಸಂಬಂಧಪಟ್ಟಂತೆ ಜೂನ್ 3ರಂದು ಜಗಳ ಆಗಿತ್ತು. ಈ ವೇಳೆ ಅರ್ಮಾನ್ ನೀರು ಅವರನ್ನು ತಳ್ಳಿದ ರಭಸಕ್ಕೆ ಆಕೆ ಮೆಟ್ಟಿಲುಗಳ ಮೇಲಿಂದ ಕೆಳಗೆ ಬಿದ್ದು ಗಾಯಗೊಂಡಿದ್ದರು ಎನ್ನಲಾಗಿದೆ. ಅಲ್ಲದೆ ಅರ್ಮಾನ್ ಕೊಹ್ಲಿ ತಮ್ಮ ಕೂದಲನ್ನು ಹಿಡಿದು ಎಳೆದಾಡಿದ್ದಲ್ಲದೆ ನೆಲಕ್ಕೆ ತಲೆಯಿಂದ ಬಡಿದಿದ್ದಾರೆ ಎಂದು ನೀರು ಆರೋಪಿಸಿದ್ದಾರೆ.
ತಲೆಗೆ ಗಾಯವಾಗಿದ್ದು 15 ಹೊಲಿಗೆ ಹಾಕಲಾಗಿದೆ. ತುಂಬ ಆಳವಾದ ಗಾಯಗಳಾಗಿದ್ದು ಅದು ಶಸ್ತ್ರಚಿಕಿತ್ಸೆ ನಂತರವೂ ಉಳಿಯುತ್ತದೆ ಎಂದು ಸರ್ಜನ್ ತಿಳಿಸಿದ್ದಾರೆ ಎಂದು ನೀರು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆದ ಬಳಿಕ ತಿಳಿಸಿದ್ದರು.
ಅರ್ಮಾನ್ ಕೊಹ್ಲಿ ಎಂಥವರು ಎಂದು ಎಲ್ಲರಿಗೂ ಗೊತ್ತು. ಸಾರ್ವಜನಿಕರೆದುರು ಹೋಗಬಾರದು ಎಂದು ಬೆದರಿಕೆ ಹಾಕಿದ್ದರು. ಈಗ ನಾನು ಯಾವುದಕ್ಕೂ ಹೆದರುವುದಿಲ್ಲ ಎಂದು ಹೇಳಿದ್ದಾರೆ.
ಅರ್ಮಾನ್ ಮತ್ತು ನೀರು 2015ರಿಂದ ಲಿವಿಂಗ್ ಟುಗೆದರ್ ರಿಲೇಶನ್ಶಿಪ್ನಲ್ಲಿದ್ದರು. ಜಗಳದ ನಂತರ ತಮ್ಮ ಮೇಲೆ ಅರ್ಮಾನ್ ಹಲ್ಲೆ ನಡೆಸಿದ್ದಾಗಿ ನೀರು ನೀಡಿದ್ದ ದೂರಿನ ಮೇರೆಗೆ ಪೊಲೀಸರು ಅವರನ್ನು ಬಂಧಿಸಿದ್ದಾರೆ.
Comments are closed.